Սպիտակ տունը վերականգնել է CNN հեռուստակայանի թղթակից Ջիմ Ակոստայի վկայականը, որը Միացյալ Նահանգների նախագահի աշխատակազմը բռնագրավել է անցած ասուլիսում լրագրողի և Դոնալդ Թրամփի սուր բանավեճից հետո:
Միաժամանակ, Սպիտակ տան խոսնակ Սառա Սանդերսը հայտնել է, որ հետայսու սահմանվում են ասուլիսների նոր կանոններ, մասնավորապես՝ յուրաքանչյուր լրագրողին կտրվի մեկական հարցի իրավունք: Պարզաբանման համար լրացուցիչ հարց տալու համար անհրաժեշտ կլինի Սպիտակ տան թույլտվությունը:
CNN-ը բողոքարկել է Ակոստայի վկայականը բռնագրավելու Սպիտակ տան որոշումը, և դատարանը կարգադրել է Թրամփի աշխատակազմին այն վերականգնել:
Սպիտակ տանը հավատարմագրված լրագրողների ընկերակցությունը ողջունել է դատարանի որոշումը, բայց քննադատել է ասուլիսներ կազմակերպելու նոր կանոնները:
Թրամփն իր նախագահության տարիներին բազմիցս է ներքաշվել լրագրողների հետ սուր վեճերի մեջ և լրատվամիջոցներին մեղադրել է կողմնակալություն դրսևորելու և կեղծ տեղեկություններ տարածելու համար:
