Պատերազմ Ուկրաինայում (լայվ բլոգ, թարմացվող)

Դոնեցկի շրջանի Կրամատորսկ քաղաքի երկաթուղային կայարանը հրթիռակոծվել է: Վերջին տվյալներով՝ զոհվել է առնվազն 39 մարդ, վիրավորվել՝ մոտ 100-ը:

Կրամատորսկը գտնվում է ուկրաինական ուժերի հսկողության տակ: Հրթիռակոծման պահին կայարանում հավաքված մեծ թվով խաղաղ բնակիչներ փորձել են գնացքներով հեռանալ քաղաքից:

Ուկրաինայի նախագահ Վլադիմիր Զելենսկին հայտարարել է, որ երկաթուղային կայարանին հարված է հասցվել «Տոչկա-Ու» հրթիռով: Նա պնդում է, որ հրթիռը ռուսներն են արձակել:

Դոնբասի անջատականները և Ռուսաստանի պաշտպանության նախարարությունը հերքում են մեղադրանքը և պնդում են, որ տեղի ունեցածն ուկրաինացիների կազմակերպած սադրանքն է:

Սլովակիան Ուկրաինային է փոխանցում S-300 ՀՕՊ համակարգեր: Այդ մասին հայտնել է վարչապետ Էդուարդ Հեգերը:

Ս-300 համակարգերի փոխադրման տեսագրությունը հրապարակել է Սլովակիայի պաշտպանության նախարարությունը: Գերատեսչությունը չի հայտնել, թե կոնկրետ երբ են համակարգերն ուղարկվել Ուկրաինա:

Սլովակիան դարձավ առաջին երկիրը, որը ՀՕՊ համակարգեր է տրամադրում Ուկրաինային: Սլովակիայի պաշտպանության նախարար Յարոսլավ Նադը հայտնել է, որ երկիրը հաջորդ շաբաթվա ընթացքում կստանա Patriot տեսակի ամերիկյան ՀՕՊ համակարգեր:

Եվրոպական հանձնաժողովի նախագահ Ուրսուլա ֆոն դեր Լայենը նախօրեին Կիևում Ուկրաինայի նախագահ Վլադիմիր Զելենսկուն խոստացել է արագացնել Միությանն Ուկրաինայի անդամակցության մեկնարկի գործընթացը:

Եվրոպական հանձնաժողովի նախագահը Զելենսկուն փոխանցել է պաշտոնական հարցաթերթիկը, որը համարվում է գործընթացի ելակետ և ասել է, թե դրա քննարկումը սովորականի պես երկար չի լինի:

Հանդիպմանը ներկա Եվրամիության արտաքին քաղաքականության և անվտանգության հարցերով պատասխանատու Ժոզեպ Բորելը նշել է, որ էներգակիրների հարցում պետք է առավել զգույշ գործել, քանի որ դա կարող է հանգեցնել էական գնաճի:

Նա ասել է, որ թեման կքննարկվի առաջիկա երկուշաբթի օրը Բրյուսելում: Բորելը նաև հայտնել է, որ Եվրոպական միությունն Ուկրաինային կտրամադրի ևս 500 միլիոն եվրո զենք գնելու համար:

Ամերիկայի Միացյալ Նահանգները մտադիր է օգնել Ուկրաինային Կրամատորսկի երկաթուղային կայարանի սարսափելի հրթիռակոծման հանգամանքները քննելու հարցում:

Երեկ այդ գրոհի հետևանքով զոհվել է ավելի քան 50 մարդ, կան մեծ թվով վիրավորներ: Կայարանում հրթիռակոծման պահին եղել են կանայք, երեխաներ, տարեցներ, ովքեր մտադիր էին գնացքով հեռանալ քաղաքից:

Ուկրաինան պնդում է, որ կայարանը ռուսներն են հրթիռակոծել: Սպիտակ տան խոսնակը տեղի ունեցածն անվանել է «Ռուսաստանի կողմից կատարված ևս մեկ վայրագություն»:

Ռուսաստանը պնդում է, որ Կրամատորսկի կայարանը հրթիռակոծել են ուկրաինական ուժերը: Այդ մասին երեկ հայտարարել է Ռուսաստանի պաշտպանության պաշտոնական ներկայացուցիչը:

Նրա պնդմամբ, հրթիռի բեկորների վերլուծությունը և գետնի վրա ընկած պոչի դիրքը վկայում են, որ այն արձակվել է Կրամատորսկից 45 կիլոմետր հարավ-արևմուտք գտնվող տարածքից:

Ըստ Ռուսաստանի պաշտպանության նախարարության ներկայացուցչի, այդ տարածքում տեղակայված է Ուկրաինայի զինված ուժերի 19-րդ հրթիռային բրիգադը:

Միացյալ Նահանգների նախագահ Ջո Բայդենը ստորագրել է Ուկրաինայի վրա հարձակման կապակցությամբ Ռուսաստանի և Բելառուսի նկատմամբ լրացուցիչ պատժամիջոցների երկու օրինագիծ:

Առաջին օրենքով արգելք է դրվում Ռուսաստանի Դաշնությունից նավթ և այլ էներգակիրներ ներկրելու վրա: Մյուս օրենքով դադարեցվում է Ռուսաստանի և Բելառուսի հետ բնականոն առևտրային հարաբերությունների ռեժիմը:

Ուկրաինայի նախագահ Վլադիմիր Զելենսկին Republic TV հնդկական հեռուստատեսությանը տված հարցազրույցում ասել է, որ Հնդկաստանը և Չինաստանը կարող են միանալ Ուկրաինայի անվտանգությունը երաշխավորող երկրներին:

Հարցազրույցում Ուկրաինայի ղեկավարը նաև նշել է, որ պատրաստ է ցանկացած պահին հանդիպել ռուսաստանցի պաշտոնակցի հետ:

«Պատրաստ եմ Վլադիմիր Պուտինի հետ հենց հիմա դեմ առ դեմ հանդիպել, պատրաստ եմ ցանկացած պահին, պատրաստ եմ քննարկել ցանկացած հարց, բայց դա պետք է Ռուսաստանի նախագահը լինի»,- ասել է Զելենսկին:

Հնդկական հեռուստատեսության թղթակցի հետ զրույցում Զելենսկին ասել է, որ ուկրաինական կողմը կռվելու է բոլոր քաղաքների համար, «կռվելու է այնքան, մինչև չվերականգնի տարածքային ամբողջականությունը»:

Ուկրաինայի նախագահ Վլադիմիր Զելենսկին ենթադրում է, որ առաջիկայում տեղի կունենան ծանր մարտեր, քանի որ ռուսներն ուժերը կուտակում են արևելյան հատվածում: Այդ մասին նա խոսել է Կիև այցելած Ավսրտիայի կանցլեր Կարմ Նեհամերի հետ համատեղ ասուլիսում:

Ավստրիայի կանցլերն ընդգծել է, որ Եվրոպական միությունը կշարունակի սաստկացնել սանկցիաների քաղաքականությունն այնքան ժամանակ մինչև Պուտինը դադարեցնի պատերազմը:

Նախապես չհայտարարված այցով Կիև ժամանած Մեծ Բրիտանիայի վարչապետ Բորիս Ջոնսոնը հայտարարել է, որ Լոնդոնը հետզհետե հզորացնելու է պատժամիջոցները Ռուսաստանի նկատմամբ:

«Մեր գործընկերների հետ միասին մենք ուժեղացնելու ենք տնտեսական ճնշումը Ռուսաստանի վրա: Մենք ամեն շաբաթ ենք սաստկացնելու սանկցիաները: Մենք ոչ միայն սառեցնելու ենք ակտիվներն ու պատժամիջոցներ ընդունելու օլիգարխների դեմ, մենք նաև հրաժարվելու ենք ռուսական ածխաջրածնային էներգակիրներից»,- ասել է Ջոնսոնը:

ՆԱՏՕ-ի գլխավոր քարտուղար Յենս Ստոլտենբերգի խոսքով` դաշինքը նոր ծրագրեր է մշակում արևելքում մշտական զինված ուժերի տեղակայման համար։

Նա ասել է, որ ՆԱՏՕ-ն գտնվում է «ֆունդամենտալ վերափոխման» մեջ, որը տեղի է ունենում Ռուսաստանի ռազմական գործողության արդյունքում։

Հյուսիսատլանտյան դաշինքի գլխավոր քարտուղարը կարծում է, որ կառույցի առաջնորդները կորոշեն այդ հարցը, երբ հանդիպեն Մադրիդում հունիսին կայանալիք գագաթնաժողովին։