Պատերազմ Ուկրաինայում (լայվ բլոգ, թարմացվող)

Լեհաստանի գյուղատնտեսության նախարարն ասել է, որ ուկրաինական հացահատիկի արտահանումը կարող է անցնել Լեհաստանի տարածքով, քանի դեռ Ռուսաստանը խոչընդոտում է դրա արտահանումը սևծովյան նավահանգիստներով։

Մարիուպոլ քաղաքի «Ազովստալ» մետաղագործական կոմբինատի տարածքում պատերազմի առաջին օրերից դիրքավորված ուկրաինացի զինծառայողները դուրս են գալիս նկուղներից: Դրանով Մարիուպոլն ամբողջությամբ անցնում է ռուսների հսկողությանը:

Հինգ ավտոբուսներով զինծառայողները ռուսական բանակի ուղեկցությամբ մեկնել են Նովոազովսկ: Նրանցից շատերը վիրավոր են: Ուկրաինայի պաշտպանության փոխնախարար Աննա Մալյարի փոխանցմամբ, 53 վիրավորներին փոխադրել են հիվանդանոցներ:

«Զինված ուժերի գլխավոր հետախուզական վարչությունը, Ազգային գվարդիան և Սահմանապահ ծառայությունը համատեղ սկսել են «Ազովստալի» գործարանի տարածքից 53 վիրավորներին Նովոազովսկ փոխադրեելու գործողությունը, ևս 211-ը մարդասիրական միջանցքով տեղափոխվել են Օլենիվկա, նրանց վերադարձի համար փոխանակման գործըինթաց կլինի»,- ասել է փոխնախարար Մալյարը:

Ուկրաինական կողմը չի կիրառում «հանձնվել» եզրույթը, սակայն «Ազովստալից» դուրս եկող ուկրաինացի զինծառայողները գործնականում հանձնվում են:

Ռուսաստանի փոխարտգործնախարար Անդրեյ Ռուդենկոն Նիժնի Նովգորոդում, «Վալդայ» ակումբի կազմակերպած համաժողովում, ասել է, որ Կիևը չի մասնակցում բանակցային գործընթացին:

«Բանակցությունները չեն շարունակվում, Ուկրաինան գործնականում դուրս է եկել այդ գործընթացից, Կիևը չի պատասխանել Ռուսաստանի առաջարկած պայմանագրի նախագծին», - ասել է Ռուդենկոն:

Նա խոսել է նաև Խաղաղության եվրոպական հիմնադրամից Ուկրաինային զենք գնելու համար ևս կես միլիարդ եվրո տրամադրելու Եվրամիության արտգործնախարարների որոշման մասին:

«Զենք գնելու համար ֆինանսական միջոցների տրամադրումը և բուն զենքի մատակարարումը ձգձգում են այս հակամարտության կարգավորումը, և այդ հանգամանքը մեր ղեկավարությունը բազմիցս է նշել»,- ասել է Ռուդենկոն:

Կրեմլը հայտարարել է, թե Մեծ յոթնյակը և Եվրոպական միությունը կդիմեն բացահայտ թալանի, եթե որոշեն Ռուսաստանի սառեցված պետական ակտիվները փոխանցել Ուկրաինային: Այդպես Ռուսաստանի նախագահ Վլադիմիր Պուտինի խոսնակ Դմիտրի Պեսկովն արձագանքել է Գերմանիայի ֆինանսների նախարար Քրիստիան Լինդներին, ով ասել է, թե պատրաստ է քննարկել «ռուսական առգրավված պետական միջոցները Կիևին փոխանցելու և դրանցով Ուկրաինայի վերակառուցումը ֆինանսավորելու հնարավորությունը»:

«Ոչ ոք նման բան ռուսական կողմին կամ Կրեմլին չի ասել, և եթե լինի նման բան, ապա այդ որոշումը կլինի բացարձակ ապօրինի, աղաղակող և կպահանջի համապատասխան արձագանք, դա բացահայտ թալան կլինի»,- ասել է Պեսկովը:

Եվրատեսիլի մրցույթում հաղթած Kalush Orchestra ուկրաինական երաժշտական խումբը որոշել է մրցանակը ներկայացնել աճուրդի և վաճառքից ստացված գումարը փոխանցել Ուկրաինայի զինված ուժերին:

Ամերիկայի Միացյալ Նահանգների ֆինանսների նախարար Ջանեթ Ելենը Վաշինգտոնի դաշնակիցներին կոչ է արել ավելացնել Ուկրաինային տրամադրվող ֆինանսական օգնությունը, նշելով, որ այսօրվա դրությամբ խոստացված գումարը թույլ չի տա հոգալ ռուսական ագրեսիայի ենթարկված երկրի կարիքները:

Նրա խոսքով, մեծ միջոցներ կպահանջվեն առանցքային նշանակության ծառայությունների աշխատանքը վերականգնելու և երկիրը վերակառուցելու համար: Դա կպահանջի աննախադեպ մեծ աջակցություն և մասնավոր ներդրումներ:

Ֆինլանդիայի խորհրդարանն այսօր հավանություն է տվել ՆԱՏՕ-ին միանալու առաջարկին: Շվեդիայի խորհրդարանը երեկ է նման որոշում կայացրել: Վաղը երկու երկրները ՆԱՏՕ-ին անդամակցելու պաշտոնական հայտեր կներկայացնեն:

«Մենք վաղը միասին կներկայացնենք դիմումները»,- հայտնել է Շվեդիայի վարչապետ Մագդալենա Անդերսոնն, ով այսօր Ստոկհոլմում ընդունել է Ֆինլանդիայի նախագահ Սաուլի Նիինիստոյին:

Ռուսաստանի Պետական դուման կքննարկի Առևտրի համաշխարհային կազմակերպությունից և Առողջապահության համաշխարհային կազմակերպությունից երկրի դուրս գալու հարցը: Այդ մասին հայտնել է «Պառլամենտսկայա գազետա» պարբերականը՝ հղում անելով Դումայի փոխխոսնակ Պյոտր Տոլստոյին:

«Ռուսաստանը դուրս է եկել Եվրոպայի խորհրդից, հիմա եկել է Առևտրի համաշխարհային կազմակերպությունից և Առողջապահության համաշխարհային կազմակերպությունից դուրս գալու ժամանակը, դրանք անտեսել են իրենց պարտավորությունները մեր երկրի նկատմամբ»,- ասել է փոխխոսնակը:

Մարիուպոլում ավերված ջրամատակարարման համակարգի պատճառով հնարավոր է վարակիչ հիվանդությունների, մասնավորապես, խոլերայի տարածում, ասել է Առողջապահության համաշխարհային կազմակերպության (ԱՀԿ) ներկայացուցիչը։

Նա հիշեցրել է, որ Մարիուպոլում խոլերայի դեպքեր են գրանցվել 2011 թվականից առաջ, ուստի ԱՀԿ-ն պատրաստվում է նոր բռնկումների հնարավորությանը: