Պատերազմ Ուկրաինայում (լայվ բլոգ, թարմացվող)

Ուկրաինայի պաշտպանական գերատեսչության ղեկավարի փոխանցմամբ, Կրեմլը փորձում է Ուկրաինայի հարավում գրաված տարածքներում պաշտպանական գծերի միջոցով պատերազմը տեղափոխել ձգձգվող փուլ:

«Իրավիճակը հարավում ժամանակավոր զավթված տարածքներում, մասնավորապես, Խերսոնի շրջանում, ապացուցում է, որ առաջ շարժվելու մտադրության փոխարեն, ռուսական բանակը փորձում է շերտ առ շերտ տեղակայել պաշտպանական գծեր»,- ասել է նախարարը:

Նա այսօր նաև հայտարարել է, թե ճիշտ կլինի, որ ՆԱՏՕ-ին Ուկրաինայի անդամակցումը ներառվի առաջիկա տասնամյակում դաշինքի զարգացման ծրագրում, որը պետք է հաստատվի հունիսի վերջին Մադրիդում կայանալիք գագաթնաժողովում:

Խոսելով ռուսական բանակը երկրից վտարելու հնարավորության մասին, Ռեզնիկովը հույս է հայտնել, թե դրան միանգամայն հնարավոր կլինի հասնել այս տարվա ընթացքում:

Ռուսաստանին մտահոգում է Գերմանիայի վերառազմականացումը: Այդ մասին այսօր ասել է Ռուսաստանի արտաքին գործերի նախարարության մամլո խոսնակ Մարիա Զախարովան:

Նրա փոխանցմամբ, Գերմանիայում ռազմական ծախսերին հատկացվող գումարի էական ավելացումը կհանգեցնի այդ երկրի վերառազմականացմանը և կստեղծի նոր ռիսկեր Եվրոպայի անվտանգության համար:

«Գերմանիայի կանցլեր Օլաֆ Շոլցի հայտարարությունը համարում ենք հերթական վկայություն այն բանի, որ Բեռլինը նախընտրում է առաջ շարժվել ռեմիլիտարիզացման ճանապարհով: Ինչի՞ն դա կարող է հանգեցնել: Դե, դա արդեն հայտնի է պատմությունից»,- ասել է Զախավորան:

Նրա փոխանցմամբ, Մոսկվան ուշադրությամբ հետևելու է այդ գործընթացին: Ըստ Զախարովայի, հիմա Եվրոպայում փոխադարձ սպառնալիքները չեզոքացնելու ժամանակն է, սակայն դրա փոխարեն Գերմանիան, «անտեսելով սոցիալական և տնտեսական հիմնախնդիրները, որոշել է միլիարդավոր եվրոներ հատկացնել բանակին»:

Ֆրանսիայի արտաքին գործերի նախարարությունը հաստատել է Ուկրաինայում ֆրանսիացու մահվան փաստը և քաղաքացիներին ևս մեկ անգամ կոչ է արել չմեկնել Ուկրաինա:

«Մենք ցավալի լուր ենք ստացել այն մասին, որ Ուկրաինայում մահացու վիրավորում է ստացել Ֆրանսիայի քաղաքացի»,- ասել է արտաքին գերատեսչության ներկայացուցիչը:

Նա չի հայտնել, թե Ուկրաինայի որ շրջանում, կոնկրետ երբ և ինչ հանգամանքներում է զոհվել այդ մարդը: Զոհվածի անունն էլ չի հրապարակվել:

Միաժամանակ պաշտոնյան հիշեցրել է, որ Ուկրաինայում մարտական գործողություններ են ընթանում:

Ռուսաստանը տիեզերք է արձակել «Պրոգրես-ՄՍ-17» տեսակի բեռնատար հրթիռ, որը պետք է միջազգային տիեզերակայան հասցնի մոտ 1.5 տոննա գիտական սարքավորումներ, վառելիք, ջուր և անհրաժեշտ այլ պարագաներ:

Ռուսներն այս բեռնատար նավն անվանել են «Դոնբաս» և դրա վրա ռուսական եռագույնի կողքը պատկերել նաև Դոնեցկի և Լուգանսկի ինքնահռչակ կազմավորումների դրոշները:

Նավի արձակումը տեղի է ունեցել Ուկրաինայի վրա Ռուսաստանի նախաձեռնած հարձակման ճիշտ 100-րդ օրը: Ռուսներն ասում են, թե այդ արձակումը նվիրում են Դոնեցկի և Լուգանսկի ժողովրդին:

Ուկրաինայի նախագահ Վլադիմիր Զելենսկին այսօր տեսկապով United 24 պլատֆորմը ներկայացրել է վաշինգտոնյան հավաքին՝ կոչ անլով հանգանակություն կատարել Ուկրաինայի ենթակառուցվածքները վերականգնելու համար։

«Ռուսական բանակն անողոք է։ Նրանք ոչ միայն փորձում են որքան հնարավոր է շատ մարդ սպանել, այլև ավիրել ապրելու համար անհրաժեշտ բոլոր ենթակառույցները՝ կամուրջներ և ճանապարհներ, տներ և հիվանդանոցներ, դպրոցներ ու գործարաններ։

Ռուսաստանի պաշտպանության նախարարության խոսնակ Իգոր Կոնաշենկովը հունիսի 4-ի հաղորդագրությունում ասել է, որ օդային բազավորման գերճշգրիտ հրթիռներով հարվածներ են հասցվել Սումիի մարզի Ստեցկիվկա գյուղի մոտ գտնվող ուկրաինական բանակի հրետանային ուսումնական կենտրոնին։

Նրա խոսքով՝ այդ կենտրոնում արտասահմանցի հրահանգիչները ուկրաինացի զինվորականներին սովորեցնում էին ինչպես օգտագործել M777 հաուբիցները։ Հրթիռակոծվել է նաև Օդեսայի մարզում Դաչնոե շրջանում տեղակայված օտարերկրյա վարձկանների բազան, նշել է նա։

Ուկրաինայի Զինված ուժերի գլխավոր շտաբի մամուլի խոսնակ Օեքսանդր Շտուպունն այսօր ասել է, թե ռուսական ուժերը գնդակոծում են Դոնեցկի ամբողջ շրջանը, բայց ստորաբաժանումների առաջխաղացումը դանդաղել է, նրա խոսքով, զինծառայողների ֆիզիկական հյուծվածության և ցածր բարոյական ու հոգեբանական վիճակի պատճառով։

Նա նշել է, որ ռուսները հիմնական ուժերը կենտրոնացրել են Սևերոդոնեցկի ու Բախմուտի ուղղությունների վրա։

Վերջին շաբաթների ընթացքում առաջին անգամ, գիշերը Կիևում պայթյուններ են որոտացել:

Ինչպես այսօր Տելեգրամում հայտնել է քաղաքապետ Վիտալի Կլիչկոն, պայթյունները տեղի են ունեցել քաղաքի Դարնիցկի և Դնիպրովսկի շրջաններում, տեղերում աշխատում են փրկարարները: Մեկ մարդ վիրավորվել է, զոհեր չկան:

UNIAN լրատվական գործակալության փոխանցմամբ՝ Ուկրաինայի ռազմաօդային ուժերի հրամանատարությունը հաղորդել է, որ մայրաքաղաքը հրթիռակոծվել է, հրթիռներն արձակվել են ռուսական օդուժի Ту-95 օդանավերից՝ Կասպից ծովի ավազանից: Հրթիռներից մեկը ուկրաինական հակաօդային պաշտպանությունը ոչնչացրել է օդում:

Կիևը չէր ռմբակոծվել տարածաշրջանից ռուսական զորքերի հետքաշումից ի վեր:

Ռուսաստանի պաշտպանության նախարարությունը հաղորդում է, որ օդային բազավորման բարձր ճշգրտությամբ հրթիռներով ոչնչացվել են Կիևի արվարձանում՝ վագոնների վերանորոգման ձեռնարկության տարածքում տեղակայված Т-72 տանկերը և արևելաեվրոպական երկրների տրամադրած այլ զրահատեխնիկան:

Հաղորդվում է Դոնբասում կատաղի մարտերի մասին, որտեղ Լուգանսկի շրջանում երեկ 11 քաղաքացիական անձ է սպանվել, իսկ Դոնեցկում ուկրաինական զինված ուժերը, ըստ «Դոնեցկի ժողովրդական միլիցիայի», ոչնչացրել են Չելյուսկինցների անվան հանքը: Նույն աղբյուրի վկայությամբ՝ ուկրաինական ուժերի կողմից Դոնեցկի հրետակոծության հետևանքով անցած օրը 5 մարդ է սպանվել, կան տասնյակ վիրավորներ, այդ թվում՝ մեկ երեխա:

Լուգանսկի Սևերոդոնեցկ քաղաքում փողոցային մարտերը շարունակվում են, ըստ Ուկրաինայի նախագահ Վլադիմիր Զելենսկու՝ իրավիճակն այստեղ ծայրաստիճան բարդ է մնում: