Պատերազմ Ուկրաինայում (լայվ բլոգ, թարմացվող)

Ուկրաինական իշխանությունները պնդում են, որ անցած գիշեր Դնեպրոպետրովսկի մարզի Նիկոպոլ և Մարգանեց քաղաքների հրթիռակոծության հետևանքով 13 խաղաղ բնակիչ է զոհվել, ևս 11-ը վիրավորվել են, նրանցից 5-ի վիճակը ծանր է։

Դնեպրոպետրովսկի մարզային վարչակազմի ղեկավար Վալենտին Ռեզնիչենկոն այսօր առավոտյան սոցիալական ցանցերում գրել է, որ ռուսական զորքերի հարվածի հիմնական թիրախը Մարգանեց քաղաքն էր, որտեղ առնվազն 20 բնակելի շենք է վնասվել։

Միացյալ Նահանգների պաշտպանության նախարար Լոյդ Օսթինը վերահաստատում է Վաշինգտոնի անվերապահ աջակցությունն Ուկրաինային ինչպես նաև ՆԱՏՕ-ի արևելաեվրոպական անդամներին։

«Մենք շարունակելու ենք սերտորեն համագործակցել ձեզ հետ, ՆԱՏՕ-ի մյուս անդամների և աշխարհում մեր մյուս դաշնակիցների հետ՝ Ուկրաինայի դեմ Ռուսաստանի դաժան և կանխամտածված ագրեսիայի պայմաններում ուկրաինացի ժողովրդին աջակցելու նպատակով։ Ուկրաինայի պաշտպանական կարողությունների ուժեղացմանն ուղղված միջազգային ջանքերը շարունակում են փոխել իրավիճակը մարտի դաշտում», - հայտարարել է Միացյալ Նահանգների պաշտպանության նախարարը Լատվիա կատարած այցի շրջանակներում վարչապետ Կրիսյանիշ Կարինշի հետ բանակցությունների մեկնարկին։

Ռուսաստանի պաշտպանության նախարարությունը պնդում է, որ վերջին 24 ժամերին Նիկոլաևի մարզի օդային տարածքում երեք ուկրաինական ռազմական օդանավ է խոցվել։

«Ռուսաստանի ռազմատիեզերական ուժերի կործանիչ ավիացիան Նիկոլաևի մարզում ծավալված օդային մարտերի ընթացքում ոչնչացրել է ուկրաինական մեկ Սու-25, մեկ Սու-27 և մեկ ՄիԳ-29 օդանավ», - այսօր հայտարարել է Ռուսաստանի ռազմական գերատեսչության պաշտոնական ներկայացուցիչ գեներալ Իգոր Կոնաշենկովը։

Ռուսական կողմն այսօր հայտարարել է նաև Նիկոլաևի մարզում տեղակայված գերմանական արտադրության «Հեպարդ» տեսակի ՀՕՊ համակարգի ոչնչացման ինչպես նաև ամերիկյան արտադրության HIMARS տեսակի հթրիռային համակարգերից արձակված յոթ արկերի խոցման մասին։

«Հեպարդ» համակարգը ոչնչացվել է Նիկոլաևի մարզի Նովոպավլովկա բնակավայրի հարևանությամբ իսկ HIMARS-ների հթրիռները՝ Խերսոնի մարզի տարածքում», - հայտարարել է Կոնաշենկովը։

Շվեյցարիան պատրաստակամություն է հայտնել ներկայացնել Ուկրաինայի շահերը Ռուսաստանի տարածքում՝ Ռուսաստանի և Ուկրաինայի միջև դիվանագիտական հարաբերությունների բացակայության պատճառով, երեկ հաղորդել է SRF հեռուստաընկերությունը՝ վկայակոչելով Շվեյցարիայի արտաքին գործերի նախարարությանը։

Շվեյցարիայի արտաքին քաղաքական գերատեսչության պաշտոնական ներկայացուցիչն ասել է, որ «Ուկրաինան ցանկություն է հայտնել, որ Շվեյցարիան ներկայացնի իր շահերը Ռուսաստանի տարածքում: Այդ հարցի շուրջ բանակցություններն ավարտվել են: Որպեսզի այս համաձայնագիրն ուժի մեջ մտնի, Ռուսաստանը պետք է իր համաձայնությունը հայտնի»

Դիվանագիտական շրջանակների ևս մեկ աղբյուր հայտնել է, որ ՄԱԿ-ի Անվտանգության խորհրդի անդամ 15 երկրները կհանդիպեն Ռուսաստանի խնդրանքով։

Երեկ Telegram-ի իր ալիքում ՄԱԿ-ում Ռուսաստանի մշտական ներկայացուցչի առաջին տեղակալ Դմիտրի Պոլյանսկին գրել էր, որ Զապորոժիեի ատոմակայանի գնդակոծման հարցով Ռուսաստանն օգոստոսի 11-ին ՄԱԿ-ի Անվտանգության խորհրդի նիստ է խնդրել:

Կիևն ու Մոսկվան միմյանց մեղադրում են Եվրոպայի ամենամեծ ատոմակայանին սպառնացող վտանգի համար։

Ուկրաինայի զինված ուժերի գլխավոր շտաբի փոխանցմամբ, ռուսները փորձում են հսկողության տակ առնել ամբողջ Դոնբասի շրջանը և այդ նպատակով ծանր հարվածներ են հասցնում ուկրաինացիների ավելի քան 60՝ թե՛ քաղաքացիական և թե՛ ռազմական թիրախներին:

Անցած գիշերվա ընթացքում ռուսները «Գրադ» տեսակի առնվազն 120 հրթիռ են արձակել Նիկոպոլ քաղաքի ուղղությամբ:

«Թշնամին ուժեր է կենտրոնացնում, ցանկանալով ամբողջական հսկողություն սահմանել Լուգանսկի և Դոնեցկի շրջանների վրա, պահել ժամանակավոր զավթած Խերսոնի շրջանը և մասամբ զավթած Նիկոլաևի, Խարկովի ու Զապորոժիեի շրջանները, բարենպաստ պայմաններ ստեղծել տարբեր ուղղություններով գրոհներ իրականացնելու և սևծովյան հաղորդակցության ուղիների արգելափակումը շարունակելու համար», - ասել է Ուկրաինայի բանակի գլխավոր շտաբի խոսնակ Օլեքսանդր Շտուպունը:

Լատվիայի խորհրդարանը՝ Սեյմը Ռուսաստանը ճանաչեց ահաբեկչությունը հովանավորող պետություն: Հայտարարությունն ընդունվել է խորհրդարանի այսօրվա նիստում:

Հայտարարության տեքստում ասվում է, որ «Ռուսաստանը նպատակաուղղված թիրախավորում է Ուկրաինայի տարածքում ապրող խաղաղ բնակիչներին»:

Սեյմի հայտարարության նախագիծն ընդունվել է 67 կողմ քվեներով, չի քվեարկել 16 պատգամավոր:

Ուկրաինայի նախագահ Վլադիմիր Զելենսկին այսօր Արևմուտքին կոչ է արել շարունակել Ուկրաինային զենք և ֆինանսական միջոցներ տրամադրելու և միջուկային ահաբեկչություն իրականացնող Ռուսաստանի նկատմամբ պատժամիջոցները խստացնելու քաղաքականությունը:

Նա հայտարարել է, թե ռուսները պատանդ են դարձրել Զապորոժիեի ատոմակայանը: Նրա խոսքով, Չերնոբիլի աղետից հետո Ուկրաինան միջոցներ է ձեռնարել ատոմակայանների անվտանգությունը երաշխավորելու համար:

Տարիներ շարունակ Եվրոպայում ոչ ոք չի մտածել, թե նորից կառաջանա միջուկային աղետի սպառնալիք, բայց հիմա այն կա, որովհետև Ռուսաստանը, Զելենսկու փոխանցմամբ, ահաբեկչական գործողություններ է կատարում:

«Մեմք համոզված ենք, որ ռուսների արձակած թևավոր հրթիռների հետագիծը պատահական չի անցնում ուկրաինական ատոմակայանների վրայով: Դա ռուսական միջուկային ահաբեկչության վկայությունն է: Ռուսաստանը վերածվել է ահաբեկչական պետության և ատոմակայանները պատանդ դարձրել ու միջուկային աղետի վտանգով շանտաժի է ենթարկում բոլորին»,- ասել է Զելենսկին:

Մոսկվայի Բասմաննի շրջանի դատարանը Ռուսաստանի Հանրային հեռուստատեսության նախկին աշխատակից, զինված ուժերը վարկաբեկելու հոդվածով մեղադրվող Մարինա Օվսյաննիկովայի համար խափանման միջոց է սահմանել տնային կալանքը:

«Դատարանը բավարարել է հետաքննության հայտը և Մարինա Օվսյաննիկովային դատապարտել է տնային կալանքի մինչև հոկտեմբերի 9-ը»,- հայտարարել է դատավորը:

Նախօրեին Օվսյաննիկովային ներկայացվել է մեղադրանք Ռուսաստանի Քրեական օրենսգրքի 207 հոդվածի 3-րդ կետի երկրորդ մասով՝ «Ռուսաստանի Զինված ուժերի օգտագործման մասին գիտակցաբար կեղծ տեղեկատվության տարածում»: Այդ մեղադրանքով Օվսյաննիկովան կարող է դատապարտվել մինչև 10-ը տարվա ազատազրկման:

Դանիայում տեղի ունեցած «Կոպենհագեն-Ուկրաինա 2022» դոնորականհամաժողովը որոշել է Կիևին տրամադրել մեկ և կես միլիարդ եվրո զենք գնելու համար, այսօր հայտնել է Դանիայի պաշտպանության նախարար Մորտեն Բոդսկովը:

«Ընդհանուր հաշվով համաժողովը հավաքել է 1.5 միլիարդ եվրո»,- ասել է նախարարը և ավելացրել, թե որոշ երկրների պատվիրակներ կվերադառնան տուն և կքննարկեն թեման, ուստի, հանգանակված գումարը կարող է ավելանալ:

Նախարարի խոսքով, նշված գումարը կտրամադրվի սպառազենի արտադրման և գնումների, ուկրաինացի զինծառայողների ուսուցման, ինչպես նաև ականազերծման համար:

Սեպտեմբերին նախատեսվում է համաժողովի ներկայացուցիչների նոր հավաք, որի ընթացքում կքննարկվեն կատարված աշխատանքի ընթացքն ու նոր հանգանակություններ հայթայթելու հնարավորությունը: