Պատերազմ Ուկրաինայում (լայվ բլոգ, թարմացվող)

Մեծ Բրիտանիայի պաշտպանության նախարարության վերլուծաբանների փոխանցմամբ, անհասկանալի է, թե ինչի հաշվին Մոսկվան կարող է ավելացնել ՌԴ Զինված ուժերի զինծառայողների թիվը, բայց եթե նույնիսկ դա արվի՝ Ուկրաինայում տեղակայված բանակի մարտունակությունը հզորացնելու հնարավորություն չի լինի:

Ռուսաստանի նախագահ Վլադիմիր Պուտինն անցած շաբաթ, երբ սկսվել է ռուս-ուկրաինական պատերազմի 7-րդ ամիսը՝ ստորագրել է Զինված ուժերի զինծառայողների թիվը 1 միլիոն 900 հազարից 2 միլիոն 40 հազարի հասցնելու հրամանագիր:

Բրիտանիայի պաշտպանության նախարարության հետախուզական ծառայության այսօրվա վերլուծական ամփոփագրում նշվում է, որ առայժմ պարզ չէ, թե ինչի հաշվին է մեծանալու զինծառայողների թիվը՝ կամավորների հավաքագրմա՞ն, թե՞ պարտադիր զորակոչի ավելացման:

Որ տարբերակն էլ Մոսկվան կիրառի, ըստ բրիտանացի վերլուծաբանների, այն առանձնապես չի խթանի Ուկրաինայում տեղակայված բանակի մարտունակությունը և մեծ ազդեցություն պատերազմի ընթացքի վրա չի գործի:

«Ռուսաստանը տասնյակ հազարավոր զինծառայող է կորցրել, հավաքագրվում են շատ փոքր թվով պայմանագրային զինծառայողներ, իսկ նորակոչիկներն, ըստ գործող օրենքի, պարտավոր չեն ծառայել Ռուսաստանի Դաշնության սահմաններից դուրս»,- նշվում է Բրիտանիայի պաշտպանության նախարարության Թվիթերի էջում:

Ատոմային էներգիայի միջազգային գործակալությունը (ԱՏԷՄԻԳ) հավաքել է փորձագետների թիմ, որը հաջորդ շաբաթ պետք է այցելի Զապորոժիեի ատոմակայան: Այդ մասին հայտնել է The New York Times պարբերականը:

Թիմի կազմում են ԱՏԷՄԻԳ-ի գլխավոր տնօրեն Ռաֆայել Գրոսսին և 13 փորձագետներ, հիմնականում «չեզոք» պետություններից:

Ընդգրկված են փորձագետներ Ուկրաինայի բարեկամներ համարվող Լեհաստանից ու Լիտվայից և Ռուսաստանի բարեկամներ համարվող Սերբիայից ու Չինաստանից:

Թիմում են նաև Ալբանիայի, Ֆրանսիայի, Իտալիայի, Հորդանանի, Մեքսիկայի և Հյուսիսային Մակեդոնիայի ներկայացուցիչները:

Այդ երկրները կամ հեռու են մնացել պատերազմից, կամ դրա ընթացքում Ռուսաստանի հետ բաց կապի ուղիներ են պահպանել:

Ոչ Միացյալ Նահանգները և ոչ էլ Մեծ Բրիտանիան, ըստ The New York Times-ի, Զապորոժիե մասնագետ չեն գործուղելու:

Զապորոժիեի ԱԷԿ-ն ամենախոշորն է Եվրոպայում և ունի վեց ռեակտոր: Դրանց կամ միջուկային թափոնների պահեստների միտումնավոր կամ պատահական թիրախավորումը կարող է հանգեցնել միջուկային համաեվրոպական աղետի:

Կողմերը միմյանց են մեղադրում ատոմակայանի շրջանում մարտական գործողություններ վարելու համար:

Զապորոժիեի ԱԷԿ-ը գտնվում է ռուսական բանակի հսկողության տակ, սակայն աշխատող անձնակազմն ուկրաինացիներ են:

Dell Technologies ամերիկյան ընկերությունն ամբողջությամբ դադարեցրել է գործունեությունը ռուսաստանյան շուկայում:

«Օգոստոսի կեսին մենք փակել ենք մեր բոլոր գրասենյակները և ավարտել ենք բոլոր գործառույթները Ռուսաստանում: Դեռ փետրվարին մենք որոշել ենք չվաճառել և չսպասարկել մեր արտադրանքը Ռուսաստանում, Բելառուսում, ինչպես նաև Ուկրաինայի Դոնեցկի և Լուգանսկի շրջաններում»,- հայտարարել է Dell ընկերության ներկայացուցիչ Մայքլ Սիեմանսը, հավելելով, որ բռնազավթված Ղրիմի վերաբերյալ այդ որոշումը շատ ավելի վաղ է ընդունվել:

Dell-ը կրճատել է ռուսական գրասենյակների բոլոր աշխատակիցնեին` նրանց վճարելով 8 ամսվա աշխատավարձ: Մոսկվայում Dell-ն ուներ վաճառքի գրասենյակ, որտեղ մոտ 50 մարդ է աշխատել, իսկ Սանկտ Պետերբուրգում գործել է զարգացման կենտրոն, որտեղ մոտ 400 մասնագետ է աշխատել:

Dell-ը համակարգիչներ արտադրող աշխարհի ամենախոշոր ընկերություններից մեկն է և սերվերների ամենախոշոր մատակարարը ռուսական շուկա:

Յեյլի համալսարանի մասնագետների հաշվարկով, ռուս-ուկրաինական պատերազմի մեկնարկից ի վեր ավելի քան հազար արտասահմանյան ընկերություններ հայտնել են Ռուսաստանից հեռանալու կամ Ռուսաստանում գործունեությունը սահմանափակելու մասին:

ԵՄ արտաքին գործերի նախարարները ծրագրում են աջակցել Ռուսաստանի հետ վիզային ռեժիմի դյուրացման համաձայնագրի կասեցմանը, որպեսզի կրճատեն ռուսաստանցիներին տրվող շենգենյան վիզաների թիվը, կիրակի գրում է Financial Times-ը։

Բացի այդ, ըստ FT-ի աղբյուրներից մեկի, մինչև տարեվերջ կարող են ավելի արմատական որոշումներ կայացվել ռուսների համար վիզաների հետ կապված։

Ռուսներին շենգենյան վիզաների տրամադրման արգելքի հնարավորությունը նախկինում քննարկվել է Էստոնիայում, Ֆինլանդիայում, Լատվիայում և Լիտվայում, սակայն Եվրամիությունում այս հարցում կոնսենսուս չկա. Գերմանիան Հունաստանի և Կիպրոսի հետ անհամաձայնություն է հայտնել սրան:

Ուկրաինայի զինված ուժերը շարունակում են կասեցնել Ռուսաստանի` Դոնեցկի մարզի Բախմուտ քաղաքի պաշտպանությունը ճեղքելու ջանքերը։

Շաբաթներ առաջ գրավելով Սևերոդոնեցկն ու Լիսիչանսկը և վերահսկողություն հաստատելով Լուգանսկի մարզի նկատմամբ՝ ռուսական ուժերը կենտրոնացել են ռազմավարական նշանակություն ունեցող Բախմուտի վրա: Քաղաքը, որը մինչ պատերազմը մոտ 70 հազար բնակիչ ուներ, շաբաթվա վերջին կրկին հրետակոծվել է, հարվածներ են հասցվել նաև մոտակայքում գտնվող Սոլեդար և Զայցևե քաղաքներին։

Ուկրաինական ռազմական զեկույցում նշվում է, նաև որ Ուկրաինան դադարեցրել է ռուսական առաջխաղացումը Դոնեցի մարզի երկու այլ խոշոր քաղաքների՝ Սլովյանսկի և Կրամատորսկի մոտ: Ուկրաինացի զինվորականները նաև հայտնել են, որ ածուխ արտադրող Ավդիևկա քաղաքում իրենց զորքերը կարողացել են հետ մղել ռուսական հարձակումը՝ չնայած հակառակորդի հրետանային և օդային հարվածներին:

Ուկրաինայի արտաքին գործերի նախարար Դմիտրի Կուլեբան այսօր կմեկնի Շվեդիա, իսկ հաջորդ օրը՝ Չեխիա՝ ամրապնդելու միջազգային աջակցությունը Կիևին։

Պրահայում Կուլեբան կմասնակցի Եվրամիության ԱԳ նախարարների ոչ պաշտոնական հանդիպմանը՝ քննարկելու Ռուսաստանի դեմ նոր պատժամիջոցները և ռուս զբոսաշրջիկների համար ԵՄ ամբողջ տարածքում վիզային ռեժիմի հնարավոր արգելքը։

ՄԱԿ-ի Ատոմային էներգիայի միջազգային գործակալության՝ ՄԱԳԱՏԷ-ի ղեկավարն ասել է, որ գործակալության առաքելությունն այս շաբաթ կայցելի Ուկրաինայի Զապորոժիեի ատոմակայան։

«Եկել է օրը, ՄԱԳԱՏԷ-ի աջակցությունն ու առաքելությունը Զապորոժիեի ճանապարհին է», - Թվիթերում գրել է Ռաֆայել Գրոսսին։

«Մենք պետք է պաշտպանենք Ուկրաինայի և Եվրոպայի ամենամեծ միջուկային օբյեկտի անվտանգությունը։ Հպարտ եմ՝ ղեկավարել այս առաքելությունը», - ասել է Գրոսսին:

ՄԱԿ-ի Ատոմային էներգիայի միջազգային գործակալության՝ ՄԱԳԱՏԷ-ի ղեկավարն ասել է, որ գործակալության առաքելությունն այս շաբաթ կայցելի Ուկրաինայի Զապորոժիեի ատոմակայան։

«Եկել է օրը, ՄԱԳԱՏԷ-ի աջակցությունն ու առաքելությունը Զապորոժիեի ճանապարհին է», - Թվիթերում գրել է Ռաֆայել Գրոսսին։

Միջուկային զենքի չտարածման պայմանագիրը մնում է անփոփոխ՝ չնայած Ռուսաստանի «ցինիկ խոչընդոտմանը», ասված է ԱՄՆ Պետդեպարտամենտի երեկվա հայտարարությունում։

Ռուսաստանը ՄԱԿ-ի համաժողովում արգելափակել էր միջուկային զենքի չտարածման պայմանագիրը կատարելու մասին ամփոփիչ փաստաթղթի ընդունումը, քանի որ այնտեղ խոսք կար Ուկրաինայում իրավիճակի մասին։ Փաստաթուղթը լուրջ մտահոգություն էր հայտնում Ուկրաինայի էլեկտրակայանների, ներառյալ պատերազմի՝ սկզբում ռուսական ուժերի կողմից գրաված Զապորոժիեի ատոմակայանի շուրջ ռազմական գործողությունների կապակցությամբ։

Ռուսաստանի Անվտանգության դաշնային ծառայությունը (ԱԴԾ) հայտարարում է, որ բացահայտել է երկրորդ ուկրաինացու ինքնությունը, ով ենթադրաբար առնչություն ունի ռուս ազգայնական գաղափարախոս, Արևմուտքի կողմից «Պուտինի ուղեղ» անվան արժանացած Ալեքսանդր Դուգինի դստեր՝ Դարյա Դուգինայի սպանությանը։

ԱԴԾ-ի հաղորդմամբ՝ Բոգդան Ցիգանենկոն օգնել է Դուգինայի սպանության նախապատրաստմանը։ Ըստ այդ վարկածի՝ Ցիգանենկոն գլխավոր կասկածյալին՝ Նատալյա Վովկին, անձը հաստատող կեղծ փաստաթուղթ և ավտոմեքենայի կեղծ պետհամարանիշեր է տրամադրել, նա օգնել է նաև հավաքել պայթուցիկ սարքը, որը դրվել էր Դուգինայի մեքենայում:

Վովկը, ըստ ԱԴԾ-ի, հուլիսին Ռուսաստան է ժամանել 12-ամյա դստեր հետ և բնակարան է վարձել այն շենքում, որտեղ ապրում էր Դուգինան։ Նույն վարկածի համաձայն՝ 44-ամյա Ցիգանենկոն Էստոնիայի տարածքով Ռուսաստան է ժամանել հուլիսի 30-ին և լքել երկիրը սպանությունից մեկ օր առաջ։

Ըստ ՌԴ Անվտանգության դաշնային ծառայության՝ Դուգինայի սպանությունը «պատրաստվել և իրականացվել է ուկրաինական հատուկ ծառայությունների կողմից», ինչը Կիևը կտրականապես հերքում է:

Գերմանիան կշարունակի օժանդակել Ուկրաինային այնքան ժամանակ, որքան անհրաժեշտ է, Պրահայի Կառլի համալսարանում ելույթի ընթացքում հայտարարել է կանցլեր Օլաֆ Շոլցը:

Reuters լրատվական գործակալության փոխանցմամբ՝ կանցլերն ասել է, որ Գերմանիան կարող է նաև պատասխանատվություն ստանձնել Ուկրաինայի հրետանու և հակաօդային պաշտպանության կարողությունների զարգացման համար։

Շոլցն ընդգծել է, որ Գերմանիան հանձնառու է Եվրամիության ընդլայնմանը, հավելելով՝ Արևմտյան Բալկանների երկրները, Ուկրաինան, Մոլդովան և ի վերջո նաև Վրաստանը պետք է միանան դաշինքին։