Պատերազմ Ուկրաինայում (լայվ բլոգ, թարմացվող)

Վրաստանի պատրիարք Իլյա Երկրորդը ցավակցություն է հայտնել Ուկրաինայի Բախմուտ քաղաքի մարտերում դեկտեմբերի 3-ին զոհված հինգ վրացիների հարազատներին։

Ռուսական զորքերը վերջին շրջանում ուժեղացրել են գրոհները Բախմուտի վրա։ Քաղաքի ծայրամասերում կատաղի մարտեր են ընթանում։

Դեկտեմբերի 3-ին զոհվել են Ավթանդիլ Ռուրուան, Ռոմեո Կվարացխելիան, Ռոմեո Պիչխայան, Մերաբ Ալադաշվիլին և Բադրի Մարկելիան։

Վրաստանի պատրիարքն ասել է, որ նրանք իրենց կյանքը տվել են մերձավորին օգնելու համար։

Ռուսաստանի նախագահ Վլադիմիր Պուտինը այսօր հայտարարել է, որ Ռուսաստանը բոլոր հնարավոր միջոցներով կպայքարի իր շահերը պաշտպանելու համար։

Նա ելույթ է ունեցել Ռուսաստանի նախագահին կից մարդու իրավունքների խորհրդի հեռավար անցկացված նիստում և իր խոսքում դժգոհել, որ Արևմուտքը Ռուսաստանին վերաբերվում է որպես երկրորդ կարգի երկրի, որը գոյություն ունենալու իրավունք չունի։

Ռուսաստանի նախագահ Վլադիմիր Պուտինն ամեն ինչ անում է պատերազմը շարունակելու համար, միայն թե չխոստովանի, որ պատմական սխալ է թույլ տվել, ասել է Ուկրաինայի նախագահ Վլադիմիր Զելենսկին:

Նա տեսակապով ելույթ է ունեցել ԱՄՆ-ի նախկին պետքարտուղար Մադլեն Օլբրայթի անվան ժողովրդավարության մրցանակաբաշխությանը, ասել, որ Պուտինը թույլ է տվել իր կյանքի ու ռուսների ժամանակակից սերնդի կյանքի ամենամեծ սխալը։

Նրա խոսքերով՝ ցանկացած բռնապետի իդեա-ֆիքսը սխալների անտեսումն է և ձևացնելը, թե ոչ մի սխալ չի կատարվել։

«Հենց այդպես է հիմա իրեն պահում Ռուսաստանը։ Ակնհայտ է, որ բռնակալը պարտվել է, սակայն նա ամեն ինչ անում է, որպեսզի Ռուսաստանը շարունակի պատերազմը, միայն թե իրեն ու ուրիշներին չխոստովանի, որ պատմական սխալ է կատարվել»,- ասել է Զելենսկին, ընդգծելով, որ Ուկրաինան և ազատ աշխարհը հաստատ չեն փոխի իրենց նպատակները և իրենց արժեքների ինչ-որ զիջումների գնան։

Ռուսական և բելառուսական ստորաբաժանումները մարտավարական զորավարժություններ են անցկացնում Բելառուսի տարածքում:

Վերլուծաբանները չեն բացառում, որ Մոսկվան Մինսկի վրա ճնշում է բանեցնում՝ համոզելով այս կամ այն ձևաչափով ներգրավվել Ուկրաինայի դեմ պատերազմում:

Մինսկը մի քանի անգամ հավաստիացրել, թե չի ներքաշվի պատերազմի մեջ, սակայն նախագահ Ալեքսանդր Լուկաշենկոն հրամայել է բանակի ստորաբաժանումները տեղակայել Ուկրաինայի հետ սահմանին, որտեղ արդեն տեղակայված են ռուսական ուժերը:

Ռուսաստանի պաշտպանության նախարարությունը հաղորդել է, որ «Ռուսաստանի Արևմտյան զինտարածքի ստորաբաժանումները շարունակում են ակտիվ համատեղ զորավարժությունները Բելառուսի բանակի հետ»:

ԱՄՆ-ի Սենատի արտաքին հարաբերությունների հանձնաժողովը հավանություն է տվել բանաձևին, որով «ցեղասպանություն» են որակվում Ռուսաստանի գործողություններն Ուկրաինայում:

Նախագիծը հեղինակել են դեմոկրատականներ Բեն Քարդինը, ով նախագահում է ամերիկյան Հելսինկյան կոմիտեն, և Ռիչարդ Բլյումենթալը, հանրապետականներ Ջիմ Ռիշը և Լինդսի Գրեմը:

Բանաձևը դատապարտում է Ռուսաստանին «Ուկրաինայում ցեղասպան գործողություններ կատարելու համար» և կոչ է անում ԱՄՆ-ին ու դաշնակիցներին շարունակել աջակցությունը Կիևին:

Բանաձևը նաև կոչ է անում նախագահ Ջո Բայդենին «Մագնիտսկու օրենքով» պատժամիջոցներ սահմանել Ուկրաինայում ցեղասպանության համար պատասխանատվություն կրողների նկատմամբ:

«Իր գործողություններով [Ռուսաստանի նախագահ Վլադիմիր] Պուտինյը վստահ նկատել է տվել, որ նպատակն ուկրաինացի ժողովրդի գոյության դադարեցումն է: Ես անձամբ եմ տեսել նրա վայրագությունների հետևանքներն Իրպենում և Կիևի շրջանի այլ հատվածներում», - ասել է սենատոր Ռիշը:

Politico հանդեսն Ուկրաինայի նախագահ Վլադիմիր Զելենսկուն անվանել է Եվրոպայի «ամենաազդեցիկ մարդը», որին վստահում են և որով հիանում են եվրոպացի բոլոր լիդերները:

«Տեսեք, թե ովքեր են շտապում Կիև՝ լուսանկարվելու 44-ամյա տղամարդու հետ, ով մշտապես իր արդեն հայտնի դարձած կանաչ շապիկով է: Կանգնել նրա կողքին՝ այդ են հիմա ուզում բոլոր քաղաքական գործիչները: Զելենսկին համոզել է ամբողջ Եվրոպային, որ մայրցամաքի ապագան կապված է Ուկրաինայի հետ, ինչին քչերն են հավատացել մինչև ռուսների փետրվարյան ներխուժումը»,- գրել է Politico-ն:

Իսկ Ռուսաստանի նախագահ Վլադիմիր Պուտինին հանդեսն անվանել է «տարվա անհաջողակը», որի երազանքը Մեծ Ռուսաստան ստեղծելու մասին դժվար թե իրականանա:

«Որքան արագ էր Ուկրաինա նրա լայնածավալ ներխուժումը, նույնքան արագ էր դրա փլուզումը: Նա վաղուց է երազել Ռուսաստանին մեծ տերության կարգավիճակը վերադարձնելու մասին: Բայց փոխարենն իր ծաղրանքի ու հեգնանքի թիրախ դարձած Ուկրաինա ներխուժելով՝ չկարողացավ հաղթել հակառակորդին և Ռուսաստանն իջեցրեց երրորդ կարգի երկրի կարգավիճակին», - գրել է հանդեսը:

Ըստ Politico-ի՝ ուրիշներն այդ կացության մեջ կանգ կառնեին և կնահանջեին, բայց Պուտինի համառությունը վկայում է, որ պատերազմը կերկարաձգվի: Եվրոպայի համար դա նշանակում է սղաճ, էներգակիրների գնաճ, գազի և պարարտանյութի պակաս, ճնշում տնտեսական և քաղաքական համակարգերի վրա:

«Երազանքն իրականացնելու անկարողությունը չի նշանակում, որ Պուտինը կդադարի իր հարևանների սարսափը լինել», - գրել է Politico-ն:

Եվրոպական հանձնաժողովը ներկայացրել է Ռուսաստանի նկատմամբ պատժամիջոցների իններորդ փաթեթը: Դրանում ընդգրկված է մոտ 200 ֆիզիկական և իրավաբանական անձ:

Փաթեթը նախատեսում է պատժամիջոցներ, այդ թվում՝ բարձրաստիճան զինծառայողների և ռուսական ռազմարդյունաբերական համալիրի պաշտոնյաների և այդ ոլորտի հիմնարկների նկատմամբ:

Բացի այդ, ցանկում բանկեր են, քիմիական, էլեկտրոնային և տեղեկատվական ոլորտի ընկերություններ:

Եվրոպական հանձնաժողովի նախագահ Ուրսուլա ֆոն դեր Լայենի փոխանցմամբ, պատժամիջոցները թույլ կտան սահմանափակել անօդաչու թռչող սարքեր ձեռք բերելու և արտադրելու Մոսկվայի հնարավորությունները:

Այսօրվա դրությամբ Եվրամիության սահմանած պատժամիջոցների ցուցակում են 118 իրավաբանական և ավելի քան 1200 ֆիզիկական անձինք, նեռարյալ նախագահ Վլադիմիր Պուտինը և նրա մերձավոր շրջապատը:

Փաթեթն ուժի մեջ կմտնի Եվրոպական միության Խորհրդի և Եվրոպական խորհրդարանի կողմից վավերացվելուց հետո:

Ռուսաստանի արտաքին գործերի նախարարության մամուլի խոսնակ Մարիա Զախարովան ասել է, որ Մոսկվան պատասխան միջոցներ կձեռնարկի:

Հռոմի Ֆրանցիսկոս պապն այսօր աղոթում է Ուկրաինայում խաղաղության համար: Նա ասել է, թե կգնա Հռոմում Սանտա Մարիա Մաջորե եկեղեցի, որտեղ կաղոթի Տիրամոր և մանուկ Հիսուսի բյուզանդական սրբապատկերի առաջ, ապա դրանից հետո կգնա Իսպանական աստիճանի մոտ՝ Անարատ Հղության արձանի առաջ աղոթելու համար:

«Այստեղ ես կխնդրեմ, որ դուք հոգով միանաք ինձ, և մենք, դիմելով մեր Մորը, աղոթենք աշխարհում խաղաղության համար, հատկապես նահատակվող Ուկրաինայի համար, որն այդքան տառապանք է կրում: Աստծո համար անհնարին բան չկա: Աստծո կամոք հնարավոր է խաղաղությունը, հնարավոր է հրաժարումը զենքից»,- ասել է Ֆրանցիսկոս պապը:

Հռոմի քահանայապետը փետրվարի 24-ին սկսված ռուս-ուկրաինական պատերազմի ավելի քան 10 ամիսների ընթացքում գրեթե ամեն շաբաթ աղոթել է Ուկրաինայում խաղաղություն հաստատելու համար, դատապարտել է Ռուսաստանի հարձակումը և Մոսկվային կոչ է արել դադարեցնել պատերազմը:

Ռուսաստանի նախագահ Վլադիմիր Պուտինն այսօր Կրեմլում ընդունել է Ռուսաստանի Հերոսի կոչմանն արժանացած քաղաքացիներին: Հերոսի մեդալները շնորհելու հանդիսավոր արարողությունից հետո Պուտինը նրանց հետ զրույցում հաստատել է, որ ռուսական ուժերը հարվածներ են հասցնում Ուկրաինայի էներգետիկայի համակարգին:

«Հենց հիմա ամբողջ աշխարհով աղմուկ են բարձրացրել, թե տեսեք՝ ինչ են անում ռուսները: Այո, հարվածում ենք, բայց ո՞վ առաջինը սկսեց, ո՞վ հարվածեց Ղրիմի կամրջին, ո՞վ պայթեցրեց Կուրսկի ատոմակայանից էլեկտրահաղորդման գծերը»,- հռետորական հարց է տվել Պուտինը և հավաստիացրել, որ նշված աղմուկը բանակին չի խանգարի մինչև վերջ կատարել առաջադրանքը:

Այսօրվա հանդիպման ընթացքում նա ասել է, թե հերոս է համարում յուրաքանչյուրին, ով հիմա կռվում է Ուկրաինայում:

Ռուսաստանն անցած ամիսներին գրեթե ամեն օր հարվածներ է հասցնում Ուկրաինայում հոսանքի, ջրի, ջեռուցման և կապի մատակարարման հիմնարկներին:

Ըստ վերլուծաբանների, Կրեմլի նպատակն է Ուկրաինայում մարդկանց կյանքն անտանելի դարձնել ձմռան ամիսներին և դրանով թուլացնել երկրի դիմադրությունը:

Ուկրաինան և արևմտյան պետությունները քաղաքացիական ենթակառուցվածքի միտումնավոր թիրախավորումը պատերազմի հանցագործություն են որակում:

«Հատուկ ռազմական գործողությունն ընթանում է իր հունով։ Մեզ մոտ ամեն ինչ կայուն է։ Այնտեղ այսօր որեւէ հարց եւ խնդիր չկա», - հայտարարել է Ռուսաստանի նախագահ Վլադիմիր Պուտինը լրագրողների հետ զրույցում։

Կրեմլի ղեկավարի գնահատմամբ՝ Ռուսաստանի ռազմական գերատեսչությունը «բավական թափանցիկ է» գործում: Նրա խոսքերով՝ այն ամենն, ինչ տեղի է ունենում գետնի վրա, Պաշտպանության նախարարության ամենօրյա տեղեկագրում արտացոլված է։

Ռուսաստանյան անկախ աղբյուրները կասկածի տակ են դնում Ուկրաինայում մասնավորապես մարդկային ուժի կորուստների մասին պաշտոնական Մոսկվայի հրապարակած տվյալները։ Վերջին անգամ ՌԴ պաշտպանության նախարարությունը սեփական կորուստների մասին հաղորդել է սեպտեմբերի 21-ին, նախարար Սերգեյ Շոյգուն հայտնել է 5937 զոհի մասին։

Պենտագոնը նոյեմբերին հայտարարել է, որ իր գնահատականներով Ուկրաինայում ռուսաստանյան զորքի շրջանում զոհերի թիվը մոտ 100 հազար է։