Ուկրաինական հակահարձակման ժամկետը չի հայտարարվել, պաշտպանության նախարար Ալեքսեյ Ռեզնիկովը երեկ ասել է, թե Կիևը շտապելու կարիք չունի:
«Ռուսաստանի «սողացող» հարձակումն ուկրաինական ճակատում գնալով ավելի է բարդանում, տապալվում են առնվազն Դոնեցկի և Լուգանսկի շրջանները գրավելու ծրագրերը, իսկ հսկայական կորուստները նվազեցնում են ռուսական բանակի ներուժը։ Այսօր ժամանակն Ուկրաինայի դաշնակիցն է, մենք հնարավորություն ունենք լավագույնս նախապատրաստվելու հակահարձակմանը», - ասել է Ռեզնիկովը լիտվական մեդիային տված հարցազրույցում:
«Պենտագոնից հույժ գաղտնի փաստաթղթերի արտահոսքից հետո Ուկրաինան ստիպված է եղել մասնակիորեն փոխել լայնորեն գովազդվող հակահարձակման պլանը», - հաղորդում է CNN հեռուստաընկերությունը՝ վկայակոչելով Վլադիմիր Զելենսկուն մոտ կանգնած աղբյուրներից մեկը։
«Գաղտնի» և «Հույժ գաղտնի» մակագրություններով հարյուրավոր փաստաթղթերի արտահոսքը տեղի էր ունեցել անցած շաբաթավերջին, դրանք տեղադրվել էին Discord սոցիալական ցանցում։
Փաստաթղթերի զգալի մասը վերաբերում է ռուս-ուկրաինական պատերազմին, ինչպես նաև Վաշինգտոնի և դաշնակից պետությունների հարաբերություններին։
«Ամերիկացի պաշտոնյաները վստահ են, որ գաղտնազերծված փաստաթղթերի մեծ մասը իրական են», - պնդում է Reuters գործակալությունը։
Միացյալ Նահանգների Պետդեպարտամենտը լրտեսության մեղադրանքով ռուսական բանտում գտնվող Wall Street Journal պարբերականի լրագրող Էվան Գերշկովիչին «անօրինականորեն կալանավորված անձի» կարգավիճակ է շնորհել։
Այս քայլով Գերշկովիչը դե-ֆակտո պատանդի կարգավիճակ կստանա, ինչը հնարավորություն կտա Վաշինգտոնին ռուսական կողմի հետ նրա փոխանակման շուրջ բանակցություններ վարել։
«Գերշկովիչի ճակատագրով այսուհետ զբաղվելու է Պետդեպարտամենտի կազմում գործող «Պատանդների հարցերով նախագահի հատուկ ներկայացուցչի գրասենյակը», - հաղորդում է Wall Street Journal-ը։
Գերշկովիչը ձերբակալվել էր մարտի 30-ին Եկատերինբուրգում։
«Մոսկվայից մոտ 500 կիլոմետր հարավ գտնվող Բելգորոդ քաղաքի օդանավակայանի տարածքում անօդաչու թռչող սարքի պայթյուն է արձանագրվել», - հաղորդում է Ռուսաստանի պետական РИА Новости լրատվական գործակալությունը՝ վկայակոչելով տեղացի ուժայիններին։
Լրատվամիջոցի փոխանցմամբ, միջադեպը տեղի է ունեցել երկուշաբթի օրը, զոհեր և վիրավորներ չկան։
«Նախնական տեղեկությունների համաձայն, թեթևակիորեն վնասվել է օդանավակայանի պարիսպը», - հաղորդում է РИА Новости գործակալությունը։
ԱԹՍ-ի պատկանելությունը չի հստակեցվում։
Ուկրաինայի նախագահ Վլադիմիր Զելենսկին հայտարարել է, որ աշխարհի առաջնորդները պետք է արձագանքեն ինտերնետում տեղադրված տեսանյութին, որտեղ ենթադրաբար ցուցադրված է գերեվարված ուկրաինացու դաժան սպանությունը ռուս զինվորների կողմից։
Ապրիլի 11-ին երեկոյան սոցցանցերում տեղադրված տեսանյութում սպիտակ թևկապով մարդը, այդպիսի նշաններ են կրում ռուս զինվորները, գլխատում է ուկրաինացի ռազմագերուն։
Ուկրաինայի անվտանգության ծառայությունը այսօր հայտարարել է, որ պատերազմական օրենքերը խախտելու հատկանիշով հետաքննություն է սկսում։
«Մենք կգտնենք այդ հրեշներին որտեղ էլ լինեն, գետնի տակից, կամ այն աշխարհից։ Նրանք հաստատ պատժվելու են իրենց արարքների համար», - ասել է անվտանգության ծառայության ղեկավար Վասիլի Մալյուկը։
ԱՄՆ պաշտպանության նախարար Լլոյդ Օսթինը հայտարարել է, որ Միացյալ Նահանգները շատ լուրջ է վերաբերվում գաղտնի փաստաթղթերի վերջին խոշոր արտահոսքին, և հիշեցրել է, որ Արդարադատության նախարարությունը հետաքննություն է անցկացնում:
«Այժմ ես շատ բան չեմ կարող ասել, մինչ Արդարադատության նախարարությունը հետաքննում է, բայց մենք այս արտահոսքին շատ լուրջ ենք վերաբերվում», - Օսթինի խոսքերն են մեջբերում լրատվամիջոցները: - «Մենք կշարունակենք հետաքննել և կորոնենք բառացիորեն ամեն տեղ, մինչև գտնենք արտահոսքի աղբյուրը և պարզենք դրա ծավալները»:
ԱՄՆ պաշտպանության նախարարն ասել է, որ ամեն օր արտահոսքի մասին խորհրդակցում է բարձրաստիճան զինվորականների հետ:
Պետքարտուղար Էնթոնի Բլինքենը Օսթինի հետ իր ելույթում ասել է , որ ԱՄՆ-ը վերջին օրերին արտահոսքի մասին քննարկում է անցկացրել դաշնակիցների հետ ու հավաստիացրել է նրանց, որ Վաշինգտոնը ջանում է գաղտնիքները պահել և հավատարիմ է իր դաշնակցային պարտավորություններին:
Բլինքենը նշել է, որ երեքշաբթի օրը խոսել է Ուկրաինայի արտաքին գործերի նախարար Դմիտրի Կուլեբայի հետ և վստահեցրել նրան, որ Միացյալ Նահանգները շարունակում է հաստատակամորեն և ակտիվորեն աջակցել Ուկրաինային Ռուսաստանի հետ պատերազմում։
Ուկրաինական բանակի հակահարձակումը կարող է սկսվել արդեն այս ամառ, հայտարարել է երկրի վարչապետ Դենիս Շմիհալը (Շմիգալ) Վաշինգտոն այցի կապակցությամբ The Hill-ին տված հարցազրույցում:
«Մեր բոլոր ընկերներն ու գործընկերները հստակ հասկանում են, որ հակահարձակման անցնելու համար պետք է 100 տոկոսով պատրաստ լինել դրան և նույնիսկ ավելին», - ասել է նա։
Հարցին, թե ինչպես են ամերիկյան գաղտնի փաստաթղթերի վերջին արտահոսքերն ազդում հակահարձակման պլանավորման վրա, Շմիհալն արձագանքել է, թե Ուկրաինան ամեն դեպքում կազատի իր տարածքները։
«Մենք բազմիցս ապացուցել ենք, որ կարող ենք դա անել: Մենք մեր գործընկերներից ամբողջ աշխարհում […] խնդրում ենք տանկեր, զինամթերք, ինքնաթիռներ և զրահատեխնիկա», - հայտարարել է նա:
Ուկրաինայում հետախուզում է հայտարարվել Ռուսաստանի նախագահ Վլադիմիր Պուտինի մերձավոր Վիկտոր Մեդվեդչուկի կնոջ՝ նախկին հեռուստահաղորդավարուհի Օքսանա Մարչենկոյի նկատմամբ:
Համապատասխան քարտը հրապարակված է Ուկրաինայի ՆԳՆ կայքում։ Դրանում ասվում է, որ Մարչենկոն թաքնվում է նախաքննական մարմիններից 2023 թվականի մարտի 24-ից։
Մարտի վերջին Ուկրաինայում կալանք է դրվել Օքսանա Մարչենկոյի ակտիվների վրա՝ ավելի քան 440 մլն գրիվնայի (11,8 մլն դոլար) չափով։ Խոսքը Զապորոժիեի «Դնեպրոսպեցստալ» -ի 6,8 տոկոս բաժնետոմսերի մասին է, որոնք Մարչենկոյին են պատկանում երեք օֆշորային ընկերությունների միջոցով:
Եվրամիությունը խոստացել է պատասխանատվության ենթարկել Ուկրաինայում ռազմական հանցագործությունների մեղավորներին, ասել է ԵՄ խոսնակը՝ մեկնաբանելով ուկրաինացի ռազմագերուն գլխատելու տեսանյութը։
Սոցցանցերում նախօրեին տարածված ցնցող տեսանյութն արդեն իսկ առաջացրել է Կիևի սուր արձագանքը։ Նախագահ Վլադիմիր Զելենսկին ասել է, որ աշխարհի յուրաքանչյուր առաջնորդ պետք է արձագանքի այս վայրագությանը. - «Սա աշխարհում ոչ ոք չի կարող անտեսել. այս գազանները որքան հեշտությամբ են սպանում: Այս տեսանյութը՝ ուկրաինացի բանտարկյալի մահապատիժը, աշխարհը պետք է տեսնի։ Սա Ռուսաստանի դեմքն է, ինչպիսին կա: Սա դրվագ չէ։ Այդպես էր Բուչայում։ Հազար անգամ։ Բոլորը պետք է արձագանքեն։ Յուրաքանչյուր առաջնորդ։ Մի սպասեք, որ դա կմոռացվի ։ Մենք չենք պատրաստվում ոչինչ մոռանալ և ներել մարդասպաններին»։
Ուկրաինայում ՄԱԿ-ի մարդու իրավունքների մոնիտորինգի առաքելությունը նույնպես արձագանքել է՝ հայտարարելով, թե «ցնցված է սոցիալական ցանցերում հրապարակված սարսափելի տեսանյութերից»:
Վերջին 24 ժամվա ընթացքում համացանցում գլխատված զինծառայողների՝ ըստ երևույթին ուկրաինացի, միանգամից երկու ցնցող տեսանյութ է հայտնվել։ Ենթադրաբար, դաժան սպանությունները կատարել են ռուս զինվորականները։ Տեսանյութերից մեկում պատկերված է մահապատժի տեսարան, իսկ մյուսում՝ գետնին ընկած երկու ուկրաինացի զինվորների գլխատված և անդամահատված մարմինները։
Կրեմլը նույնպես խոսել է գլխատման տեսանյութի մասին՝ այն անվանելով սարսափելի։
Կրեմլի խոսնակը միաժամանակ ասել է, որ ցանկացած եզրակացություն անելուց առաջ անհրաժեշտ է հաստատել տեսանյութի իսկությունը, քանի որ, ըստ նրա, «մենք ապրում ենք ֆեյքերի աշխարհում»։
Ռուսները շարունակում են գրոհել ուկրաինական դիրքերը Դոնբասում։
Պատերազմի ուսումնասիրման ամերիկյան ինստիտուտի տվյալներով, ռուսական ուժերն այժմ վերահսկում են Բախմուտի տարածքի 76,5 տոկոսը, ռուսները սակայն պնդում են, թե վերահսկում են քաղաքի առնըվազն 86,1 տոկոսը։
Ուկրաինական կողմը, Բախմուտը պաշտպանելու հետ մեկտեղ, նախապատրաստվում է հակահարձակման։ Այն հայտարարված էր գարնանը, սակայն պաշտոնական Կիևը չի հնչեցրել հակահարձակման ո'չ կոնկրետ ժամկետը, ո'չ էլ պլանը։