Ռուսաստանի Զինված ուժերի գլխավոր շտաբի պետ Վալերի Գերասիմովը հուլիսի 19-ին ԱՄՆ զինված ուժերի շտաբերի միացյալ կոմիտեի նախագահ Ջոզեֆ Դանֆորդին նամակ է ուղարկել, որում Սիրիայի հարցով մի շարք առաջարկներ է ներկայացրել:
Խոսքը, մասնավորապես, Սիրիայի վերականգման և փախստականների վերադարձի հարցում համագործակցության մասին է, հաղորդում է «Ռոյթերզ» գործակալությունը՝ վկայակոչելով ամերիկյան կառավարության իր աղբյուրը:
Գործակալության փոխանցմամբ՝ նամակում Ասադի դաշնակիցը համարվող ռուսական կողմը նշում է, որ սիրիական ռեժիմը սարքավորումների, վառելիքի և այլ միջոցների կարիք ունի՝ երկիրը վերականգնելու և տուն վերադարձող փախստականներին ընդունելու համար: Աղբյուրը նշում է, որ ռուսական պլանը «սառը ընդունելության է» արժանացել Վաշինգտոնում:
Պաշտոնական Մոսկվան հաստատել է, որ երկրի ռազմական գերատեսչությունը նման առաջարկներով նամակ է ուղարկել Պենտագոնի ներկայացուցչին: