Միացյալ Նահանգներն ընդլայնել է Ռուսաստանի դեմ պատժամիջոցների ցանկը՝ դրանում ավելացնելով Սերգեյ Սկրիպալի և նրա դստեր թունավորման մեջ կասկածվող Ռուսաստանի զինված ուժերի ռազմական հետախուզության (ГРУ) աշխատակիցներ Անատոլի Չեպիգային և Ալեքսանդր Մաշկինին:
Արևմտյան մի շարք երկրներ, այդ թվում՝ Միացյալ Նահանգները, Նիդերլանդները, Մեծ Բրիտանիան և Կանադան ռուսաստանյան այդ կառույցին մեղադրում են աշխարհով մեկ կիբերհարձակումներ իրականացնելու մեջ:
Ամերիկյան կառավարությունն ամիսներ առաջ Ռուսաստանի թերևս ամենաազդեցիկ ծառայության՝ ГРУ-ի մի խումբ աշխատակիցների դեմ մեղադրանքներ է առաջադրել, նրանց մի մասն անցնում է ամերիկյան նախագահական ընտրություններին Ռուսաստանի հնարավոր միջամտության գործով:
ԱՄՆ-ի նոր սահմանափակումները կտարածվեն նաև նախագահ Պուտինի մերձավորներից համարվող ռուսաստանցի օլիգարխ Եվգենի Պրիգոժինի անվան հետ կապվող ընկերությունների վրա: