«Ազատության» տեղեկություններով՝ Արսեն Թորոսյանը շուտով կվերադառնա վարչապետ Փաշինյանի կաբինետ՝ որպես աշխատանքի և սոցիալական հարցերի նախարար:
ՔՊ-ական պատգամավորն այսօր մանդատից հրաժարվելու դիմում է ներկայացրել: ԱԺ կանոնակարգ օրենքով՝ մեկ շաբաթ է հարկավոր, որ հաստատվի նրա դիմումը, եթե այդ ընթացքում նա հետ չվերցնի այն: Հետևաբար նշանակումն այս շաբաթ չի լինի:
Այս պահին Թորոսյանը խորհրդարանի Առողջապահության հարցերի մշտական հանձնաժողովի նախագահն է, իսկ սոցապ նախարարը Նարեկ Մկրտչյանն է, որը կրկին «Ազատության» տեղեկություններով՝ շուտով ԱՄՆ-ում Հայաստանի դեսպան կնշանակվի՝ փոխարինելով Լիլիթ Մակունցին:
Թորոսյանն այսօր մեր զանգերին չպատասխանեց: 2018-21 թվականներին նա առողջապահության նախարարն էր: COVID-ի համավարակի բուն ճգնաժամը համընկավ նրա պաշտոնավարման շրջանի հետ: Առողջապահության նախարարի պաշտոնից Թորոսյանը հրաժարական տվեց 21 թվականի հունվարին, և նշանակվեց վարչապետի աշխատակազմի ղեկավար, իսկ հետագայում ընտրվեց Ազգային ժողովի պատգամավոր՝ «Քաղաքացիական պայմանագիր» կուսակցությունից։ Նրան առողջապահության նախարարի պաշտոնում փոխարինեց Անահիտ Ավանեսյանը:
43-ամյա Թորոսյանը համավարակի ընթացքում ամենաքննարկվող քաղաքական դեմքերից մեկն էր։ Այդ ընթացքում նրա վարած քաղաքականությունը և կայացրած որոշումները հաճախ քննադատության էին ենթարկվում հատկապես ընդդիմադիր շրջանակների կողմից, որոնք նրան մեղադրում էին սխալ հանրային կառավարման և չհիմնավորված սահմանափակումների համար։ Այս մեղադրանքները Թորոսյանը չէր ընդունում:
Հակակոռուպցիոն կոմիտեի կողմից իրականացվող հետաքննության շրջանակում՝ որը վերաբերում է համավարակի ընթացքում իրականացված պետական գնումներին և հնարավոր չարաշահումներին, Արսեն Թորոսյանը ներգրավվել է որպես վկա։ Նա պարբերաբար ֆեյսբուքյան գրառումներով հայտարարում էր, թե իրավապահաներն իրեն հարցաքննության չեն հրավիրում, բայց ինքը պատրաստ է դա անել: Այս գործի դատաքննությունը դեռ չի ավարտվել:
Որպես պատգամավոր՝ Թորոսյանը հաճախ է հարցազրույցներ տալիս, պաշտպանում վարչապետի վարած արտաքին ու ներքին քաղաքականությունը: Վերջերս նրան բանտից դատի են տվել Տավուշի թեմի նախկին առաջնորդ Բագրատ արքեպիսկոպոս Գալստանյանն ու գործարար Սամվել Կարապետյանը՝ միլիոնավոր դրամների փոխհատուցում պահանջով ՔՊ-ական պատգամավորից՝ իրենց վիրավորելու ու զրպարտելու համար: Քաղաքացիական այս հայցերի քննությունը դեռ չի սկսվել: