Կադաստրի պետական կոմիտեի նախկին աշխատակից Վերոնիկա Միքայելյանը պնդում է՝ ամուսնուն առևանգել են, տարել Լուսակերտ, մի ամայի տարածքում դաժանաբար ծեծել:
«Հարվածները անդադար սկսել են, մինչև ուշքը գնացել է, չի հիշում՝ ինչքան են ծեծել, ով է ծեծել», - «Ազատությանը» պատմեց Միքայելյանը:
Նրա խոսքով՝ դեպքը սեպտեմբերի 14-ին է եղել: Վերոնիկա Միքայելյանը վստահ է՝ ամուսնու հետ հաշվեհարդար են տեսել իր նախկին ղեկավարի՝ Կադաստրի պետական կոմիտեի նախագահ Սուրեն Թովմասյանի հրահանգով:
«Ծեծի ընթացքում անընդհատ ասել են՝ «դե Սուրոյին էիր էս ասում, դե կեր, դե ստացիր»: Դրա համար ակնհայտ է, որ իր պատվերն էին կատարում», - պնդեց նա:
Վերոնիկա Միքայելյանը չցանկացավ տեսանկարահանվել, ամուսինն էլ չհամաձայնեց խոսել: Անգամ չցանկացավ, որ ազգանունը նշենք:
Վերոնիկա Միքայելյանը մինչև սեպտեմբերի 9-ը Կադաստրի կոմիտեի արտաքին կապերի վարչությունում է աշխատել՝ որպես ավագ մասնագետ: Նրա ծառայությունը դադարեցրել են խիստ նկատողություններից ու ծառայողական քննությունից հետո: Աշխատանքից ազատելու որոշումը վրդովվեցրել է ամուսնուն, զանգել է կնոջ վերադասին՝ Սուրեն Թովմասյանին, նա չի պատասխանել, ապա ձայնային հաղորդագրություններ է ուղարկել:
«Հաղորդագրությունների բովանդակությունը չեմ ուզում հրապարակել, բնականաբար շնորհակալություն չէր հայտնելու», - ասում է կինը:
Օրեր անց էլ ամուսնուն առևանգել են:
Սուրեն Թովմասյանը իշխող «Քաղաքացիական պայմանագիր» կուսակցության անդամ է: Վարչապետ Փաշինյանի որոշմամբ է նշանակվել այս պաշտոնին 2019 թվականին: Վերոնիկա Միքայելյանի ամուսինն էլ է նախկինում Կադաստրի կոմիտեում աշխատել ու Թովմասյանի հետ տարաձայնությունների պատճառով մի քանի տարի առաջ ազատման դիմում է գրել: Հետո, ըստ Վերոնիկայի, իրեն են թիրախավորել: Այս դեպքից ամիսներ առաջ էլ ոմն Ռոման է Սուրեն Թովմասյանի անունից եկել ՝ ամուսնու հետ բարեխոսելու, որ իրավիճակը հարթվի, կինն էլ դիմում գրի, գնա: Հենց այդ միջնոդին էլ, ըստ Վերոնիկա Միքայելյանի, հաշվեհարդար տեսնողների խմբում նկատել է:
«Սուրան Թևոսյանի անունից եկել էր Ռոմանը, ամուսինս այն ժամանակ էլ իր հետ լարված խոսակցություն էր ունեցել: Երբ հասել են տեղ, այդ ընթացքում տեսել է այդ անձնավորությանը, որը Սուրեն Թովմասյանի կողմից մի քանի ամիս առաջ էլի եկել էր ամուսնուս հետ ռազբորկաների Սուրենի հրահանգումով, դրան է ճանաչել: Նրան հենց ճանաչել է, անմիջապես հասկացել է, որ ծուղակն է ընկել Սուրենի կողմից լարված», - պատմեց կինը:
Ամուսնուն, ասաց, խաբելով են հասցրել իրենց ուզած վայրը, ապա մեքենայից իջեցրել ու 40-50 հոգով ծեծել, այդ ընթացքում Սուրեն Թովմասյանի անունն են տվել, մեկն էլ, հավելեց, ասել է, թե Կոմիտեի գլխավոր քարտուղար Մհեր Խաչատրյանի եղբայրն է:
Ամուսնուն այնպես են հարվածել, որ աչքերն են վնասվել, քիթը, կողերը կոտրել, դեմքի ու մարմնի տարբեր հատվածներ են վնասվել: Այս ամենը հաստատվել է բժշկական հետազոտությամբ: Ամուսինը դեպքից հետո հիվանդանոց է տեղափոխվել, հիմա բուժումը տանն է շարունակում:
«Ուժեղ արյուն էր գալիս աչքերից, ամենաուժեղ հարվածը աչքերին էին հասցրել: Չի կարելի էլի, ես չգիտեմ՝ ինչ սադիստներ են եղել», - ասաց Վերոնիկա Միքայելյանը, որը ոստիկանություն է ահազանգել:
Քննչական կոմիտեում գործ է հարուցվել ծեծի ու առևանգման հոդվածներով: Չնայած տուժողները հրապարակային անուններ են հնչեցնում, դեռ որևէ մեկին մեղադրանք չի առաջադրվել: Կասկածյալների մասին էլ Քննչականից ոչինչ չեն հայտնում:
Կադաստրի պետական կոմիտեից հերքում են Սուրեն Թովմասյանի ու Մհեր Խաչատրյանի առնչությունն այս միջադեպին, այլ մանրամասներ չեն հայտնում, քանի որ նախաքննություն է:
«Հավատում եմ, որ գործը բացահայտվելու է, հանցագործը պատժվելու է: Մի հատ թող Սուրեն Թովմասյանի հեռախոսը առգրավեն, ամեն ինչ պարզ կլինի», - ասաց Միքայելյանը:
Արդյոք Կադաստրի կոմիտեի ղեկավարին ու գլխավոր քարտուղարին հարցաքննել են՝ Քննչականից չեն հայտնում: Այս պատմությանը իշխող «Քաղաքացիական պայմանագրից» էլ դեռ չեն արձագանքել: