Մոլդովայի նախագահ Մայա Սանդուի եվրոպամետ «Գործողություն և համերաշխություն» կուսակցությունը հաղթել է երեկ կայացած խորհրդարանական ընտրություններում՝ ռուսամետ «Հայրենասիրական դաշինքից» երկու անգամ շատ ձայն հավաքելով։
Սանդուն այս ընտրությունները Մոլդովայի եվրաինտեգրման ճանապարհին վճռորոշ իրադարձություն էր որակում՝ հայտարարելով Ռուսաստանից զանգվածային միջամտությունների մասին։ Մոլդովայի ընդդիմությունը մեղադրանքներն անհիմն է որակում, Կրեմլն էլ այս ամբողջ ընթացքում կոշտ էր արձագանքում՝ «հակառուսական հիստերիա», որի նպատակը վերընտրվելն է, չնայած երկրի վատթարացող տնտեսական վիճակին:
«Ընտրությունների արդյունքը ոչ թե կուսակցության կամ ընտրողների, այլ երկրի հաղթանակն է, և մենք պետք է օգտագործենք այն բոլոր քաղաքացիների համար՝ անկախ հանգամանքից, թե ում են ընտրել։ Եկեք խաղաղ ապրենք, ազատության մեջ ու մեր երեխաների համար լավ, ապահով ապագա ապահովենք, այս նպատակներին հասնելու ամենակարճ ճանապարհը եվրոպական ուղին է», - հայտարարել է Մայա Սանդուն:
Ընտրություններին 1․6 միլիոն մարդ է մասնակցել, Սանդուի կուսակցությունը 50 տոկոս ձայն է հավաքել և խորհրդարանում դարձյալ մեծամասնություն կկազմի։ Գլխավոր մրցակից «Հայրենասիրական դաշինքը» 25 տոկոսի շեմը չի անցել։
Քվեարկության նախաշեմին Մոլդովայի կենտրոնական ընտրական հանձնաժողովն արգելեց ընդդիմադիր երկու կուսակցությունների մասնակցությունը։ Իշխանությունը պնդում է, թե այդ ուժերը կապեր ունեն Կրեմլի հետ։ Ընդդիմությունն այս քայլերը «քաղաքական ներկայացում» որակեց:
Թեժ մրցապայքարից բացի, այս ընտրություններն առանձնացան մասնակցության ավելի բարձր ցուցանիշով՝ ընտրատեղամասեր են գնացել քաղաքացիների ավելի քան 52 տոկոսը:
Ընտրություններն առանց միջադեպերի չեն անցել, Մոլդովայում և այլ երկրներում բացված ընտրատեղամասերում ռումբերի տեղադրման ահազանգեր են եղել։ Երեք անձ ձերբակալվել է: Այս միջադեպերի համար իշխող կուսակցությունից սլաքները դարձյալ Մոսկվայի կողմն են թեքում։
Ընդդիմությունն էլ պնդում է, թե իշխանությունները խոչընդոտել են ընտրողների քվեարկությունը անջատողական Մերձդնեստրում, որտեղ մեծամասնությունը ռուսամետ հայացքներ ունի: «Հայրենասիրական դաշինքի» առաջնորդ Իգոր Դոդոնը ձայների հաշվարկն էլ չսկսված ընդդիմության հաղթանակի մասին էր հայտարարում:
Իսկ արդեն ձայների հաշվարկից հետո ընդդիմությունից հայտարարում են՝ չեն ընդունում արդյունքները։ Նախկին նախագահ Դոդոնը պնդում է՝ հենց երկրի ներսում ընդդիմությունն ավելի շատ ձայն է հավաքել, Սանդուի կուսակցությունը մեծամասնություն է ապահովել միայն սփյուռքի հաշվին։ Մոլդովայում ընտրելու հնարավորություն ունեին նաև այլ երկրում բնակվող քաղաքացիները։
Ընտրությունների վերաբերյալ վերջնական գնահատականներ չտալով՝ Կրեմլի ներկայացուցիչ Դմիտրի Պեսկովը հայտարարել է, թե Ռուսաստանում ապրող հարյուր հազարավոր մոլդովացիները քվեարկությանը մասնակցելու հնարավորություն չեն ունեցել. ամբողջ երկրում ընդամենը երկու ընտրատեղամաս է գործել։
Ընդդիմության աջակիցներն այսօր խորհրդարանի դիմաց բողոքի ցույց էին իրականացնում։
Մինչ ընդդիմությունը բողոքում է, եվրոպական առաջնորդները եվրաինտեգրման ճանապարհին Մոլդովային աջակցելու մասին են հայտարարում։ «Եվրոպա։ Ժողովրդավարություն։ Ազատություն», - գրել է Եվրահանձնաժողովի նախագահ Ուրսուլա ֆոն դեր Լայենը։