ԱՄՆ 41-րդ նախագահ Ջորջ Բուշ ավագի դին փոխադրել են մայրաքաղաք Վաշինգտոն, որտեղ Կապիտոլիումում նախատեսված է պետական պատիվներով հրաժեշտի արարողությունը:
Բուշը մահացել է 94 տարեկանում նոյեմբերի 30-ին Տեքսաս նահանգում:
Դին տեղադրել են ԱՄՆ մայրաքաղաքի Կոնգրեսի համալիրի մաս կազմող գմբեթաձև Ազգային տաճարում, որտեղ հրաժեշտի արարողությանը կմասնակցեն ամերիկացի բարձրաստիճան պաշտոնյաներ, նախկին նախագահներ և օտարերկացի պետական գործիչներ:
Արարողության ընթացքում ելույթ կունենա Բուշի որդին՝ ԱՄՆ 43-րդ նախագահ Ջորջ Բուշ կրտսերը: Դոնալդ Թրամփը, ով հրապարակավ քննադատել է Ջորջ Բուշ ավագին, ներկա կլինի հրաժեշտի արարողությանը, սակայն ելույթ չի ունենա:
Հրաժեշտի արարողությունից հետո Բուշի դին կտեղափոխեն Տեքսաս նահանգ՝ Հյուսթոն, որտեղ կհուղարկավորեն կնոջ՝ Բարբարայի և 1953 թվականին 4 տարեկանում արյան քաղցկեղից մահացած դստեր՝ Ռոբինի շիրիմների կողքին:
Ջորջ Բուշ ավագը նախագահել է 1989-1993 թվականներին, 1981-89 թվականներին Ռոնալդ Ռեյգանի նախագահության օրոք զբաղեցրել է փոխնախագահի պաշտոնը:
Նա որպես մարտական օդաչու մասնակցել է Երկրորդ աշխարհամարտին: 1970-ականներին գլխավորել է Կենտրոնական հետախուզական վարչությունը:
Վերջին տարիներին Ջորջ Բուշ ավագը տառապում էր Պարկինսոնի հիվանդությունից:
