Պատերազմ Ուկրաինայում (լայվ բլոգ, թարմացվող)

Ռուսական կողմը տեղեկացրել է ՄԱԿ-ին, ԵԱՀԿ-ին և Կարմիր խաչի միջազգային կոմիտեին, որ հումանիտար միջանցքներ է բացում Ուկրաինայում։ Այդ մասին այսօր հայտնել է Մարդասիրական արձագանքման միջգերատեսչական համակարգման կենտրոնը՝ ընդգծելով, որ տարհանման նկատմամբ հսկողություն կիրականացվի մասնավորապես ռուսական անօդաչու թռչող սարքերի օգնությամբ։

Պաշտոնական Կիևից կոնկրետ գործողություններ են սպասվում՝ մարդասիրական միջանցքներ բացելու համար, նշված է հաղորդագրությունում։

Մարդասիրական արձագանքման միջգերատեսչական համակարգման կենտրոնն այսօր ավելի վաղ հայտնել էր, որ Ռուսաստանի զինված ուժերը հայտարարում են հրադադարի մասին առավոտյան ժամը 10-ից և բացում են մարդասիրական միջանցքները Կիևից, Խարկովից, Սումիից և Մարիուպոլից։

Ուկրաինայի նախագահ Վլադիմիր Զելենսկին կիրակի ուշ երեկոյան հեռարձակված ուղերձում պնդել է, որ արևմտյան պետությունների ղեկավարները պատշաճ կերպով չեն արձագանքում փետրվարի 24-ին սկիզբ առած ռազմական գործողությունների ընթացքում խաղաղ բնակչության կրած զրկանքներին և Ռուսաստանի զինված ուժերի կողմից իրականացվող ռմբակոծություններին ու հրթիռակոծություններին։

Նավթի գինը համաշխարհային շուկաներում այսօր հերթական ռեկորդն է սահմանել՝ հասնելով 13 տարվա առավելագույն մակարդակին։ «Բրենթ» տեսակի նավթի մեկ բարելի գինն այսօր հասել է 140 դոլարի։

Reuters-ը նշում է, որ ռուս-ուկրաինական պատերազմի սկզբից ի վեր նավթի գինը միջազգային շուկաներում աճել է շուրջ 30 տոկոսով։

Վառելիքի գնի հերթական կտրուկ աճը արձանագրվել է ԱՄՆ պետքարտուղար Էնթոնի Բլինքենի երեկ հնչեցրած հայտարարությունից հետո, որի համաձայն՝ Միացյալ Նահանգները և եվրոպական պետությունները քննարկում են ռուսական նավթի ձեռքբերումներից հրաժարվելու տարբերակը։

Հաագայում՝ ՄԱԿ-ի Միջազգային քրեական դատարանում, այսօր մեկնարկել է Ռուսաստանի դեմ Ուկրաինայի ներկայացրած հայցի քննությունը։ Պաշտոնական Կիևը պահանջում է «հրատապ միջոց կիրառել՝ Ռուսաստանի ներխուժմանը վերջ տալու համար։

Այսօրվա լսումների ընթացքում իր մոտեցումներն է ներկայացնում ուկրաինական կողմը, վաղը դատավորները կլսեն պաշտոնական Մոսկվայի տեսակետը։

«Չի բացառվում, որ ԱՄՆ նախկին նախագահ Դոնալդ Թրամփն առաջիկայում ժամանի Ուկրաինա», - հայտարարել է Ռուսաստանի հետ բանակցություններում ուկրաինական պատվիրակությունը գլխավորող Դավիթ Արախամիան։

«Մենք դեռևս չհաստատված տեղեկություններ ունենք, որոնց համաձայն՝ ԱՄՆ նախկին նախագահ Դոնալդ Թրամփը, մի շարք հանրապետական օրենսդիրների ուղեկցությամբ, առաջիկայում կարող է ժամանել Ուկրաինա՝ մեր երկրին աջակցություն ցուցաբերելու և Ուկրաինայի օդային տարածքը ոչ-թռիչքային գոտի հայտարարելու հարցը քննարկելու համար», - նշել է Արախամիան։

Նրա խոսքով՝ ոչ-թռիչքային գոտու ստեղծումն ուկրաինական կողմի համար սուր անհրաժեշտություն է, քանի որ «պատերազմի առաջին օրերին ռուսական կողմն ամբողջությամբ ոչնչացրել է Ուկրաինայի ՀՕՊ համակարգը»։

«Անթալիայում կայանալիք դիվանագիտական ֆորումի շրջանակներում կայանալու են Ռուսաստանի և Ուկրաինայի արտգործնախարարներ Սերգեյ Լավրովի և Դմիտրի Կուլեբայի բանակցությունները», - Reuters գործակալության փոխանցմամբ՝ այսօր հայտարարել է Թուրքիայի դիվանագիտական գերատեսչության ղեկավար Մևլութ Չավուշօղլուն։

Թուրքական դիվանագիտության ղեկավարի խոսքով՝ Լավրովի և Կուլեբայի հանդիպումը կայանալու է առաջիկա հինգշաբթի։ TACC գործակալության փոխանցմամբ՝ Ռուսաստանի ԱԳՆ պաշտոնական ներկայացուցիչը ևս հաստատել է, որ երկու երկրների նախարարների միջև Անթալիայում «շփումներ կլինեն»։