Պատերազմ Ուկրաինայում (լայվ բլոգ, թարմացվող)

Կանադան պատժամիջոցներ է սահմանել տասը ռուսաստանցիների նկատմամբ, որոնք Ուկրաինա ներխուժման մասնակից են։ Այս մասին նախօրեին հայտարարել է վարչապետ Ջասթին Թրյուդոն։ Նրա խոսքով՝ ցուցակում ընդգրկված են նախկին ու ներկայիս բարձրաստիճան պաշտոնյաներ, օլիգարխներ։

Կանադայի կառավարության կայքում հրապարակված ցանկի համաձայն՝ պատժամիջոցներ են կիրառվել Կրեմլի խոսնակ Դմիտրի Պեսկովի, առողջապահության նախարար Միխայիլ Մուրաշկոյի, «Ռոսսելխոզբանկ»-ի խորհրդի նախագահ՝ Նիկոլայ Պատրուշևի որդու՝ Դմիտրի Պատրուշևի, Պետդումայի պատգամավոր Պավել Կրաշենիննիկովի, "Россия 1" պետական հեռուստաալիքի հաղորդավար Վլադիմիր Սոլովյովի, RT-ի գլխավոր խմբագիր Մարգարիտա Սիմոնյանի, Առաջին ալիքի գլխավոր տնօրեն Կոնստանտին Էռնստի, օլիգարխներ Օլեգ Դերիպասկայի, Վիկտոր Գավրիլովի և Դմիտրի Իվանովի նկատմամբ։

Թրյուդոն նշել է, որ այդ անունները վերցվել են ռուս ընդդիմադիր Ալեքսեյ Նավալնիի կազմած ցուցակից։

ՄԱԿ-ի տվյալներով՝ ուկրաինացի փախստականների թիվը հասել է 2 միլիոնի: Կառույցի փախստականների հարցերով գերագույն հանձնակատար Ֆիլիպո Գրանդին համեմատության համար նշել է, որ Բոսնիայում և Կոսովոյում տեղի ունեցած պատերազմների հետևանքով փախստականների թիվը կազմել է «2-3 միլիոն, բայց՝ 8 տարվա ընթացքում»:

Ուկրաինայի փախստականների մեծ մասը մեկնում են դեպի արևմտյան երկրներ՝ հիմնականում՝ Լեհաստան, բայց նաև՝ Ռումինիա, Սլովակիա, Հունգարիա, Մոլդովա։

Ուկրաինայի նախագահ Վլադիմիր Զելենսկին պնդել է, որ վերջին 30 տարիներին «Ռուսաստանը չի կորցրել այնքան մարտական ինքնաթիռ, որքան Ուկրաինայի հետ պատերազմի 13 օրվա ընթացքում»։

Զելենսկին ուշադրություն է հրավիրել ռուսական բանակի կողմից շրջափակված ուկրաինական մի շարք քաղաքներում հումանիտար անմխիթարական իրավիճակի վրա։ Նրա խոսքով՝ Մարիուպոլում ջրազրկման հետևանքով երեխա է մահացել։

Ուկրաինայի ղեկավարը սուր քննադատություն է հնչեցրել արևմտյան գործընկերների հասցեին՝ ռազմական ավիացիա տրամադրելու որոշումը հետաձգելու համար․ - «Օդային հարվածներից և Ուկրաինայի շրջափակված քաղաքներում յուրաքանչյուր մարդու մահվան մեղքը, իհարկե, ռուսական պետության և նրա զինվորականների վրա է… Բայց պատասխանատվությունը նաև նրանց վրա է, ովքեր ինչ-որ տեղ Արևմուտքում իրենց աշխատասենյակներում արդեն 13 օր է չեն կարողանում հավանություն տալ ակնհայտորեն անհրաժեշտ որոշմանը»։

Նավթագազային Shell ընկերությունը հայտարարել է ռուսական նավթի և գազի մատակարարումից հրաժարվելու մասին:

Բրիտանական նավթագազային խոշորագույն ընկերությունը հայտարարության մեջ նշում է, որ անհապաղ դադարեցնում է ռուսական հում նավթի բոլոր գնումները, փակում է լցակայանները, ինչպես նաև ավիացիոն վառելիքի և քսանյութերի արտադրությունը Ռուսաստանում։

Ուկրաինայում պատերազմի մեկնարկից ի վեր շուրջ 250 արտասահմանյան առաջատար ընկերություններ հայտարարել են Ռուսաստանում իրենց աշխատանքը սահմանափակելու կամ դադարեցնելու մասին։

Մի շարք խոշոր ընկերություններ դեռևս շարունակում են իրենց գործունեությունը Ռուսաստանում։ Դրանց թվում են Coca Cola-ն, Pepsi-ին, McDonalds-ը, Nestle-ն, Mars-ը, Philip Morris-ը, Starbucks-ը, Hilton-ը, Mariott-ը:

Ուկրաինական հետախուզության համաձայն` Խարկով քաղաքի մերձակայքում տեղի ունեցած մարտերի ժամանակ սպանվել է ռուս բարձրաստիճան զինվորական։ Ուկրաինայի հատուկ ծառայությունները վկայակոչում են հեռախոսազանգերը, որոնք, ինչպես պնդում են՝ մասամբ հաստատում են գեներալ- մայոր Վիտալի Գերասիմովի մահը։

Տեղեկությունը ռուսական կողմից պաշտոնապես հաստատվելու դեպքում սա կլինի երկրորդ բարձրաստիճան գեներալը, ով սպանվել է Ուկրաինայում շուրջ երկու շաբաթ շարունակվող պատերազմի ընթացքում։ Գերասիմովի մահը մինչ այս պահը չեն հաստատել նաև անկախ աղբյուրները։

ՄԱԿ-ի մարդու իրավունքների գրասենյակը հայտնում է, որ փետրվարի 24-ին Ուկրաինայի վրա Ռուսաստանի հարձակումից ի վեր հաստատել է 474 խաղաղ բնակիչների մահվան դեպքերը։

Գրասենյակը նշում է նաև, որ հաստատված քաղաքացիական վիրավորների թիվը կազմում է 861: Կառույցը միաժամանակ չի բացառում, որ իրական թվերը կարող են շատ ավելի մեծ լինել, մասամբ այն պատճառով, որ ինտենսիվ մարտերը խոչընդոտում են տեղերից տեղեկատվություն ստանալուն։

Միացյալ Նահանգների նախագահ Ջո Բայդենն ընդունել է ռուսական արտադրության բոլոր տեսակի էներգակիրների ներկրումն արգելելու որոշում:

«Այսօր ես հայտնում եմ, որ մենք թիրախավորում ենք Ռուսաստանի տնտեսության մայր երակը, մենք արգելում ենք բոլոր տեսակի էներգակիրների՝ նավթի, գազի և ածխի ներկրումը: Դա նշանակում է, որ ռուսական նավթն այլևս չի հասնի ամերիկյան նավահանգիստներ, և Ամերիկայի ժողովուրդը ևս մեկ հզոր հարված կհասցնի Պուտինի ռազմական մեքենային: Այս քայլին հավանություն են տվել Կոնգրեսի երկու կուսակցությունները, և ես համոզված եմ՝ հավանություն է տալիս նաև ամբողջ ժողովուրդը»,- ասել է Բայդենը:

Միացյալ Նահանգների նախագահը նշել է, թե հասկանում է, որ եվրոպացի դաշնակիցները չեն կարողանա միանալ կոնկրետ այդ պատժամիջոցին:

«Այս քայլը դժվարություններ կառաջացնի նաև այստեղ՝ Միացյալ Նահանգներում: Ե՛վ դեմոկրատականները, և՛ հանրապետականները դա գիտակցում են, և՛ դեմոկրատականները, և՛ հանրապետականները հստակ նկատել են տվել, որ մենք պետք է դիմենք այդ քայլին»,- ասել է Բայդենը: