Պատերազմ Ուկրաինայում (լայվ բլոգ, թարմացվող)

Ամերիկացի հետախուզական կառույցների վերլուծաբանների համոզմամբ՝ ռուսները թերագնահատել են դժվարությունները, որոնց կարող էին հանդիպել Ուկրաինայում:

«Նրանք այնտեղ ուկրաինացիների կողմից հանդիպել են սպասվածից շատ ավելի համառ դիմադրության, ինչի հետևանքով լուրջ խնդիրների առաջ են կանգնել», - ասել է Ազգային հետախուզության տնօրեն Էվրիլ Հեյնսը Կոնգրեսի Ներկայացուցիչների պալատում կազմակերպված լսումների ընթացքում:

Նրա փոխանցմամբ՝ ռուսները չեն կարողացել միանգամից գրավել Կիևը, ջախջախիչ հարված հասցնել ուկրաինացիներին և արագ հաղթանակ ապահովել ու դրանով Միացյալ Նահանգներին և ՆԱՏՕ-ին զրկել Ուկրաինային լուրջ ռազմական օգնություն տրամադրելու հնարավորությունից:

«Համաձայն մեր գնահատականի, Մոսկվան թերագնահատել է Ուկրաինայի դիմադրողականության աստիճանը և իր ներքին դժվարությունները ռազմական տեսակետից: Դա վատ կազմված ծրագիր է, ակնհայտ են մարտական ոգու, ինչպես նաև լոգիստիկայի հետ կապված խնդիրներ», - ասել է Հեյնսը:

Ուկրաինայում պատերազմի 14-րդ օրն է։ Կիևից առավոտյան տեղեկություններ էին ստացվում մայրաքաղաքում ուժեղ պայթյունների մասին։ Կիևում, Չեռնիգովի և Ժիտոմիրի շրջաններում, ինչպես նաև Կիևի մոտակայքում գտնվող Վասիլկով քաղաքում օդային տագնապ էր հայտարարվել։

Ռուսաստանի պաշտպանության նախարարությունը Կիևում պայթյուններ հնչելուց անմիջապես հետո հայտարարեց, որ պատրաստ է Ուկրաինայի ժամանակով առավոտյան ժամը 9-ից պահպանել լռության ռեժիմ։ Սա նշանակում է, որ մարդասիրական միջանցքները կշարունակեն աշխատել Կիևից, Չեռնիգովից, Սումիից, Խարկովից և Մարիուպոլից խաղաղ բնակիչների տարհանման համար։

Ուկրաինայի իշխանություններին նախօրեին հաջողվել է Սումիից տարհանել 5 հազար մարդու՝ դա առաջին հաջող զանգվածային տարհանումն էր։

1100 օտարերկրացի ուսանողի Սումիից առանձին գնացքով տարհանել են Լվով։

Միացյալ Նահանգների պետքարտուղարի տեղակալ Վիկտորիա Նուլանդը Սենատի արտաքին հարաբերությունների հանձնաժողովում ռուսական «Հյուսիսային հոսք 2» գազատարն անվանել է «ծովի հատակին ննջող մետաղի կտոր»։

«Կարծում եմ, որ «Հյուսիսային հոսք 2»-ն այժմ մեռած է: Չեմ կարծում, որ որևէ մեկը երբևէ դրան հարություն կտա», - ասել է Նուլանդը։

Բրիտանիան հայտարարել է, որ մինչև 2022 թվականի վերջ կդադարեցնի ռուսական նավթի ներկրումը:

Միացյալ Թագավորության տրանսպորտի նախարար Գրանթ Շափսը հայտարարել է, որ ռուսական օդանավերի մուտքը Բրիտանիայի օդային տարածք և վայրէջքը բրիտանական օդանավակայաններում քրեական հանցագործություն է համարվում:

PepsiCo ընկերությունը հայտարարել է, որ դադարեցնում է իր գազավորված ըմպելիքների վաճառքը Ռուսաստանում։ Հայտարարությունը հաջորդեց ընկերության գլխավոր մրցակից Coca Cola-ի որոշմանը՝ դադարեցնել գործունեությունը Ռուսաստանում։

McDonald's-ը, Starbucks-ը, Universal Music-ը և այլ խոշոր ընկերություններ ևս հեռանում են Ռուսաստանից:

Այսօրվանից մինչև սեպտեմբերի 9-ը Ռուսաստանի Բանկը արտարժութային ավանդներից կամ քաղաքացիների հաշիվներից միջոցների օգտագործման նոր կարգ է սահմանել։ Ըստ այդմ՝ հաճախորդը կարող է իր ավանդից կանխիկացնել մինչև 10 հազար դոլար, իսկ մնացած միջոցները կանխիկացնել ռուբլով՝ օրվա շուկայական փոխարժեքով։

Փետրվարի 24-ին Ռուսաստանի Ուկրաինա ներխուժմանը հաջորդած միջազգային պատժամիջոցների հետևանքով ռուսական ռուբլին աննախադեպ արժեզրկվել է։

Ի լրումն Սումիում ռմբակոծությունների հետևանքով 22 զոհվածների մասին հաղորդագրությունների, Ուկրաինայի ներքին գործերի նախարարությունը չորեքշաբթի առավոտյան ավելացրել է հաղորդում նախորդ օրը այլ վայրերում զոհված ևս 7 խաղաղ բնակիչների մասին:

ՆԳՆ-ը հայտնում է, որ երեքշաբթի երեկոյան Ժիտոմիրի շրջանի Մալին քաղաքում ավիահարվածի հետևանքով ավերվել է 7 առանձնատուն, ինչի հետևանքով զոհվել է 5 մարդ, այդ թվում՝ 2 երեխա, իսկ Խարկովի մարզի Դինեց գյուղում արկը ընկել է բնակելի շենքի վրա և սպանել 2 մարդու, այդ թվում՝ երեխայի։

Ռուսները պնդում են, թե ըստ իրենց հայթայթած գաղտնի ուկրաինական փաստաթղթերի, Ուկրաինան, իբր, մտադիր էր այս ամսվա ընթացքում հարձակվել Դոնբասի շրջանի վրա:

Ռուսաստանի պաշտպանության նախարարությունը հրապարակել է 6-էջանոց փաստաթուղթ, որում շարադրված է ենթադրյալ հարձակման ծրագիրը: