- Հեղինակ՝ Արմեն Քոլոյան
Միացյալ Նահանգները մերժում է Լեհաստանի խորհրդային արտադրության մարտական օդանավերն Ուկրաինային փոխանցելու և դրանց փոխարեն Լեհաստանին ամերիկյան մարտական օդանավեր տրամադրելու գաղափարը:
Դրանով լեհերը պետք է իրենց ունեցած MiG-29 տեսակի կործանիչներն ուղարկեին Գերմանիա՝ Ռամշտայնում գտնվող ամերիկյան ռազմակայան, և հետագայում դրանք պետք է համալրեին Ուկրաինայի օդուժը:
Միացյալ Նահանգների պետական քարտուղարի քաղաքական հարցերով տեղակալ Վիկտորիա Նուլանդն ասել է, թե «Վարշավայի այդ առաջարկն անակնկալ էր Վաշինգտոնի համար»: Պենտագոնի ներկայացուցիչները նշել են, որ պատերազմի գոտում ՆԱՏՕ-ի օդուժի միջամտությունը լուրջ խնդիրներ կարող է առաջացնել ամբողջ դաշինքի համար:
- Հեղինակ՝ Արմեն Քոլոյան
Թուրքիայի նախագահ Ռեջեփ Թայիփ Էրդողանը հույս է հայտնել, որ Ռուսաստանի և Ուկրաինայի արտաքին գործերի նախարարներ Սերգեյ Լավրովը և Դմիտրի Կուլեբան Անթալիայում միջազգային դիվանագիտական հավաքի շրջանակներում նախատեսված հանդիպման ընթացքում կպայմանավորվեն հրադադար հաստատելու շուրջ: Այդ մասին հայտնել է «Անադոլու» լրատվական գործակալությունը:
Թուրքիայի ղեկավարը քննադատել և անբավարար է որակել միջազգային հանրության արձագանքը ռուս-ուկրաինական առճակատմանը:
- Հեղինակ՝ Արմեն Քոլոյան
Եվրոպական միությունը համաձայնեցրել է Բելառուսի նկատմամբ ֆինանսական պատժամիջոցները, որոնք սահմանվում են Ուկրաինայի վրա Ռուսաստանի ագրեսիային մասնակցելու համար:
Բելառուսի երեք խոշոր բանկերը կանջատվեն SWIFT միջազգային վճարային համակարգից, սահմանափակումներ կգործեն Կենտրոնական բանկի վերաբերյալ, կարգելվի կանխիկով եվրո փոխադրել Բելառուս և կսահմանափակվեն բանկային ավանդները:
SWIFT-ից կանջատվեն Белагропромбанк-ը, «Дабрабыт» բանկը և Բելառուսի զարգացման բանկը:
- Հեղինակ՝ Արմեն Քոլոյան
Բրիտանիայում քննարկում են Ուկրաինա հակաօդային պաշտպանության բրիտանական համակարգեր տրամադրելու հնարավորությունը:
Խոսքը Thales ընկերության արտադրած Starstreak շարժական հակաօդային հրթիռի մասին է, որը փոխադրելու, սպասարկելու և արձակելու համար ընդամենը մեկ զինծառայող է պետք:
- Հեղինակ՝ Արմեն Քոլոյան
Աբխազիայի ինքնահռչակ «հանրապետությունը» Դոնբասի և Լուգանսկի ինքնահռչակ «ժողովրդական հանրապետությունների» հետ «դիվանագիտական կապեր» է հաստատել:
Աբխազիայի «արտաքին գործերի նախարարությունը» հայտնել է, որ մարտի 9-ին Աբխազիան և Դոնեցկի ու Լուգանսկի ինքնահռչակ կազմավորումները դիվանագիտական կապեր հաստատելու մասին նոտաներ են փոխանակել:
Աբխազիայի «նախագահ» Ասլան Բժանիան ավելի վաղ ստորագրել է երկու կազմավորումների անկախությունը ճանաչելու հրամանագրեր:
- Հեղինակ՝ Արմեն Քոլոյան
Ռուսաստանի պաշտպանության նախարարությունը խոստովանել է, որ Ուկրաինայում «հատուկ օպերացիային» մասնակցել են նաև զորակոչիկներ, որոնց թվում կան գերեվարվածներ:
«Դժբախտաբար, մենք պարզել ենք, որ Ուկրաինայում «հատուկ օպերացիային» մասնակցել են զորակոչիկներ: Փաստորեն գրեթե բոլորն արդեն հեռացվել են Ուկրաինայի տարածքից»,- ասել է Ռուսաստանի պաշտպանության նախարարության մամլո խոսնակ, գեներալ-մայոր Իգոր Կոնաշենկովը: Նրա հավաստիացմամբ, նախարարությունն ամեն ինչ անում է զորակոչիկներին Ուկրաինա ուղարկելու հնարավորությունը կանխելու համար:
Ռուսաստանի նախագահ Վլադիմիր Պուտինը գլխավոր զինվորական դատախազությունից պահանջել է հետաքննել զորակոչիներին Ուկրաինա ուղարկելու փաստերը և պատժել մեղավորներին: