Պատերազմ Ուկրաինայում (լայվ բլոգ, թարմացվող)

Եվրամիության առաջնորդները հայտարարել են, որ Ուկրաինայի դեմ պատերազմ սկսելու համար մեղավորները կպատժվեն, և ողջունել են Միջազգային քրեական դատարանի որոշումը հետաքննություն սկսելու վերաբերյալ։

Հայտարարության մեջ ասվում է, որ Եվրամիությունը, չսպասելով Եվրահանձնաժողովի կողմից ԵՄ-ին անդամակցության վերաբերյալ Ուկրաինայի պաշտոնական դիմումի քննարկման արդյունքներին, կամրապնդի կապերը Ուկրաինայի հետ:

Եվրոպական խորհրդի նախագահ Շառլ Միշելն էլ ասել է, որ ԵՄ-ն Ուկրաինային խոստանում է նաև քաղաքական, ֆինանսական, նյութական և հումանիտար աջակցություն՝ վստահեցնելով, որ ամբողջ ուժով կօգնի պատերազմից հետո ժողովրդավարական Ուկրաինայի վերականգնմանը։

Մեծ յոթնյակի երկրները պատրաստվում են Ռուսաստանի դեմ պատժամիջոցների նոր փաթեթ ներկայացնել՝ կապված Ուկրաինայում պատերազմի հետ։

Չի հստակեցվում, թե կոնկրետ ինչ միջոցների մասին է խոսքը, սակայն նշվում է, որ Մոսկվայի դեմ պատժամիջոցներն ուղղված են «ռուսական տնտեսության թուլացմանը»։

Air Astana-ն հայտարարել է, որ դադարեցնում է թռիչքները դեպի Ռուսաստան։

Ղազախստանյան ավիանկերությունը բացատրել է, որ ապահովագրական ընկերությունները չեղարկել են Ռուսաստանի օդային տարածքում թռիչքների ապահովագրությունը:

Ուկրաինական ալիքները՝ հղում անելով Վոլինի շրջանային վարչակազմի ղեկավարին, հայտնում են, որ Լուցկի մերձակայքում գտնվող օդանավակայանի վրա հրթիռային հարձակման հետևանքով զոհեր և վիրավորներ չկան։ Փրկարարները մարում եմ բռնկված հրդեհը:

«Ինտերֆաքս-Ուկրաինա» գործակալությունը, վկայակոչելով տեղական կոմունալ ծառայություններին, հայտնում է, որ Չեռնիգովի ջրամատակարարման ցանցը վնասվել է, ինչի հետևանքով քաղաքը մնացել է առանց ջրի։ Ուկրաինայի հյուսիսում գտնվող Չեռնիգովը շրջափակված է ռուսական բանակի կողմից և գտնվում է կրակի տակ:

Ռուսաստանի էկոնոմիկայի նախարարությունը օրենսդրության նախագիծ է մշակել, որն ուղղված է ուկրաինական պատերազմի պատճառով Ռուսաստանից միջազգային ձեռնարկությունների աճող ելքը կանխելուն և դրանց ազգայնացման համար պոտենցիալ հիմքեր ստեղծելուն:

«Իզվեստիա»-ի տվյալներով՝ ՌԴ էկոնոմիկայի նախարարությունն արդեն կառավարություն և գլխավոր դատախազություն է ուղարկել մոտ վեց տասնյակ օտարերկրյա ընկերությունների ցուցակ, որոնք լքել են ռուսական շուկան և կարող են պետականացվել։

Սպիտակ տան մամուլի քարտուղար Ջեն Սաքին, մեկնաբանելով Ռուսաստանը լքած արևմտյան ընկերությունների արտադրությունն ազգայնացնելու հնարավորության քննարկումը, հայտարարել է․ - «Ռուսական իշխանությունների ցանկացած անօրինական որոշում՝ բռնագրավելու այդ ընկերությունների ակտիվները, ի վերջո միայն լրացուցիչ տնտեսական տառապանք կբերի Ռուսաստանի համար: Դա կուժեղացնի արդեն առանց այդ էլ հստակ ազդանշանները համաշխարհային գործարար հանրությանը, որ Ռուսաստանում բիզնեսով զբաղվելն անվտանգ չէ»։

Լուցկի վրա ռուսական ուժերի հարվածի հետևանքով 2 ուկրաինացի զինվոր է զոհվել, ևս 6-ը վիրավորվել են, հայտնել է Վոլինի շրջանային վարչակազմի ղեկավար Յուրի Պոգուլայկոն։ Ավելի վաղ ուկրաինական ալիքները նրան հղումով գրել էին, որ զոհեր չկան։

Ռուսական բանակի կողմից շրջափակված Մարիուպոլը կրիտիկական իրավիճակում է, քաղաքը ռմբակոծվում է կես ժամը մեկ, հաղորդում է UNIAN-ը՝ վկայակոչելով քաղաքապետ Վադիմ Բոյչենկոյին։