Պատերազմ Ուկրաինայում (լայվ բլոգ, թարմացվող)

Ռուսաստանն, ամենայն հավանականությամբ, կփորձի վերախմբավորել իր ուժերը՝ առաջիկա օրերին հարձակումը վերսկսելու համար։ Այս մասին հայտնում է Մեծ Բրիտանիայի պաշտպանության նախարարությունը՝ զգուշացնելով՝ դա կարող է ներառել նաև «Կիևի դեմ գործողություններ»։

Maxar ընկերության արբանյակային լուսանկարների համաձայն, ռուսաստանյան ռազմական տեխնիկայի հսկայական շարասյունը կենտրոնացվել է Կիևից դեպի հյուսիս։

Associated Press գործակալությունը, վկայակոչելով Maxar-ի տվյալները, նշում է, որ տեխնիկայի մի մասը, այդ թվում՝ հրետանին, դիրքավորվել է անտառային գոտում՝ հավանաբար պատրաստվելով հարվածի։

Ռուսաստանի նախագահը համաձայնել է Ուկրաինայի հետ պատերազմում ներգրավել նաև կամավորներին։

«Եթե տեսնում եք մարդկանց, որոնց ցանկանում են կամավորական հիմունքներով, առավել ևս՝ ոչ փողի դիմաց, մեկնել և օգնել Դոնբասի բնակիչներին, դե ինչ, պետք է ընդառաջ գնալ և օգնել նրանց հասնել մարտի դաշտ», - հայտարարել է Վլադիմիր Պուտինը ՌԴ Անվտանգության խորհրդի մշտական անդամների հետ հանդիպման ժամանակ՝ շարունակելով․ - «Ուկրաինայի, ուկրաինական ռեժիմի արևմտյան հովանավորները չեն թաքցնում՝ նրանք դա անում են բացահայտ՝ արհամարհելով միջազգային իրավունքի բոլոր նորմերը»:

Ռուսաստանի նախագահը հավանություն է տվել նաև պաշտպանության նախարար Սերգեյ Շոյգուի առաջարկին՝ Դոնբասի ռուսամետ անջատական ուժերին փոխանցել ուկրաինական զինուժից առգրավված հակաօդային պաշտպանության և հակատանկային հրթիռային համակարգերը, այդ թվում՝ Javelin-ները և Stinger-ները:

Ռուսաստանի պաշտպանության նախարարն այսօր հայտարարել է, որ Ուկրաինայում պատերազմել ցանկացող կամավորների ամենամեծ թիվը Մերձավոր Արևելքից է։ «Արդեն 16 հազար հայտ ունենք», - ասել է Շոյգուն։

Մարտի 11-ի դրությամբ ՄԱԿ-ի տվյալներով 2,5 միլիոն մարդ լքել է Ուկրաինան, ևս 2 միլիոնը ներքին տեղահանվածներ են։ Փախստականների մեծ մասը՝ ավելի քան 1,5 միլիոնը, ապաստանել է հարևան Լեհաստանում։

ՄԱԿ-ի Միգրացիայի միջազգային կազմակերպության խոսնակ Փոլ Դիլոնի խոսքով՝ 2,5 միլիոն փախստականների թվում 116 հազար օտարերկրյա քաղաքացիներ կան:

Կիևի քաղաքապետ Վիտալի Կլիչկոն նախօրեին հայտարարել է, որ պատերազմի մեկնարկից ի վեր Ուկրաինայի մայրաքաղաքից հեռացել է յուրաքանչյուր երկրորդ բնակիչ։

Ընդդիմադիր առաջնորդ Ալեքսեյ Նավալնին բանտից կոչ է արել Մոսկվայի, Սանկտ Պետերբուրգի և երկրի այլ քաղաքների բնակիչներին՝ շաբաթավերջին կրկին դուրս գալ փողոց՝ ընդդեմ Ուկրաինայի պատերազմի։

«Խելագար, մոլագար Պուտինին ամենաշուտը կարող է կանգնեցնել Ռուսաստանի ժողովուրդը, եթե դուրս գա ընդդեմ պատերազմի։ Սա ծանր մարաթոն է, հյուծող պայքար է՝ վախով, ձերբակալություններով: Բայց սա հաստատ անօգուտ պայքար չէ», - հայտարարել է Նավալնին։

Ռուսաստանում հակապատերազմական գործողությունների համար փետրվարի 24-ից ի վեր ձերբակալվել է շուրջ 14 հազար մարդ։

Եվրամիության անդամ երկրների առաջնորդները համաձայնության չեն եկել Ուկրաինայի անդամակցության արագացված ընթացակարգի շուրջ։

Վերսալում տեղի ունեցած գագաթնաժողովի ընթացքում եվրոպացի առաջնորդները փոխարենը պայմանավորվել են ավելացնել Ուկրաինային հատկացվող «մարդասիրական, բժշկական և ֆինանսական» օգնությունը, աջակցել փախստականներին, մեծացնել ճնշումը Ռուսաստանի և Բելառուսի վրա։

Դաշինքը Կիևին խոստանում է նաև պատերազմի ավարտից հետո «աջակցել ժողովրդավարական Ուկրաինայի վերականգնմանը»։

Ինչ վերաբերում է Կիևի՝ անդամակցության մասին դիմումին, ինչպես հայտարարել է Նիդերլանդների վարչապետ Մարկ Ռյուտեն՝ գործընթացը ժամանակատար է, և ԵՄ-ին անդամակցելու արագացված ընթացակարգ չկա․ - «Սա ապտակ կլինի Չեռնոգորիայի, Սերբիայի, Ալբանիայի և Հյուսիսային Մակեդոնիայի համար, որոնք այսքան ժամանակ սպասում էին անդամակցության գործընթացին»։

Կիևը պնդում է, որ Ռուսաստանը Ուկրաինայի հետ սահմանի մերձակայքում գտնվող Բելառուսի բնակավայրի ուղղությամբ կրակ է արձակել` փորձելով Մինսկին ներքաշել ռուս-ուկրաինական պատերազմին։

Ուկրաինայի ռազմաօդային հրամանատարության հաղորդագրության համաձայն` ռուսական ինքնաթիռը Բելառուսի օդանավակայանից օդ է բարձրացել, անցել Ուկրաինայի օդային տարածք, ապա կրակել բելառուսական Կոպանի գյուղի ուղղությամբ:

Այսօր հեռախոսազրույց են ունեցել ԱՄՆ-ի և Ուկրաինայի նախագահներ Ջո Բայդենն ու Վլադիմիր Զելենսկին: