Պատերազմ Ուկրաինայում (լայվ բլոգ, թարմացվող)

Ուկրաինայի նախագահ Վլադիմիր Զելենսկին երեկ օտարերկրացի լրագրողների հետ զրույցում խոսել է 17 օր տևող պատերազմի ընթացքում ուկրաինական կողմի կրած կորուստների մասին: «Այսօրվա դրությամբ մեր բանակն ունի մոտ 1300 զոհ»,- ասել է Ուկրաինայի ղեկավարը:

Ավելի վաղ Ռուսաստանի պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը պնդել է, թե փետրվարի 24-ից ընթացող «հատուկ օպերացիայի» ընթացքում Ուկրաինայի բանակն ունի ավելի քան 2870 զոհ և ավելի քան 3700 վիրավոր:

Ռուսաստանի Անվտանգության խորհրդի փոխնախագահ, Դաշնության նախկին նախագահ և նախկին վարչապետ Դմիտրի Մեդվեդևն այլևս չի օգտվի Instagram-ից, Facebook-ից և Meta ամերիկյան տեխնոլոգիական միավորման ստեղծած այլ ծառայություններից: Այդ մասին հայտնել է Մեդվեդևի օգնական Օլեգ Օսիպովը:

«Դմիտրի Մեդվեդևը չի օգտվի Meta ընկերությունների միավորման մեդիա արտադրանքից: Պատճառը միավորման հակառուսական դիրքորոշումն է», - ասել է Օսիպովը:

Ավելի վաղ Ռուսաստանի գլխավոր դատախազությունը Meta Platforms-ը ճանաչել է «ծայրահեղական կազմակերպություն» և պահանջել է արգելափակել դրա գործունեությունը երկրի տարածքում:

Գլխավոր դատախազությունն այդ որոշումն է կայացրել այն բանից հետո, երբ Meta ընկերությունների միավորման մամլո քարտուղար Էնդի Սթոունը հաստատել է, որ մի շարք երկրներում ժամանակավոր սառեցվում է Ռուսաստանի զինվորականների նկատմամբ բռնություն իրականացնելու մասին կոչեր սոցցանցերում տեղադրելու արգելքը:

Միացյալ Նահանգների նախագահ Ջո Բայդենը պետական քարտուղար Էնթոնի Բլինքենին կարգադրել է 200 միլիոն դոլարի զենք և այլ տեսակի օգնություն տրամադրել Ուկրաինային:

Այդ որոշմամբ մեկ տարվա ընթացքում Կիևին Վաշինգտոնի հատկացրած ռազմական օգնության ծավալը հասել է 1 միլիարդ 200 միլիոն դոլարի:

Ավելի վաղ ԱՄՆ-ի Կոնգրեսը հաստատել է Ուկրաինային 13 միլիարդ 600 միլիոն դոլարի արտակարգ օգնություն հատկացնելու ծրագիրը:

Պորտու քաղաքի քրեական ոստիկանությունը ձերբակալել է ռաբբի Դանիել Լիտվակին, ով կեղծիքների եղանակով կարողացել է Եվրամիության անդամ երկրի քաղաքացիություն ապահովել ռուսաստանցի օլիգարխ, բրիտանական սանկցիաների ցանկում հայտնված Ռոման Աբրամովիչի համար:

Պորտուի հրեական համայնքի ռաբբին պատասխանատվություն է կրել սեֆարդների (Պիրենեյան թերակղզում բնակվող և հալածանքների ենթարկված հրեաները) ժառանգներին սերտիֆիկատներ շնորհելու համար:

Նա կազմել է փաստաթուղթ, ըստ որի Աբրամովիչի նախնիները Պորտուգալիայից 15-րդ դարում արտաքսված սեֆարդներ էին:

Այդ սերտիֆիկատի շնորհիվ Աբրամովիևը Պորտուգալիայի անձնագիր է ստացել:

Իսրայելի վարչապետ Նաֆթալի Բենեթը մարտի 12-ին Ուկրաինայի նախագահ Վլադիմիր Զելենսկու հետ հեռախոսով քննարկել է Ուկրաինայում մարտական գործողությունները դադարեցնելու հարցը և ջանքերը, որոնք այդ ուղղությամբ գործադրում է հրեից պետությունը: Այդ մասին հայտնել է Իսրայելի վարչապետի գրասենյակը:

«Շաբաթ օրը երեկոյան տեղի է ունեցել վարչապետ Բենեթի և նախագահ Զելենսկու հեռախոսազրույցը, այն տևել է ավելի քան մեկ ժամ, լիդերները քննարկել են պատերազմական գործողությունները դադարեցնելու հնարավորությունը»,- նշվում է վարչապետի գրասենյակի տարածած հաղորդագրությունում:

Այսօր վաղ առավոտյան ռուսական ուժերը հրթիռային հարվածներ են հասցրել Լվովի մարզում՝ Լեհաստանի սահմանին մոտ գտնվող ռազմաբազային։

Լվովի մարզային ռազմական ղեկավարության հայտարարության համաձայն՝ Յավորովի Խաղաղարության և անվտանգության միջազգային կենտրոնի տարածքի վրա արձակվել է շուրջ 30 հրթիռ: Զոհվել է 35, վիրավորվել՝ 134 մարդ, հայտարարել է ռազմական վարչակազմի ղեկավար Մաքսիմ Կոզիցկին։

Ռազմաբազան 360 քառակուսի կիլոմետր տարածք է զբաղեցնում և Լեհաստանի սահմանից հեռու է ընդամենը շուրջ 25 կիլոմետր, խոշորագույնն է Ուկրաինայի արևմուտքում։ Այստեղ Ուկրաինան անցկացնում է ՆԱՏՕ-ի հետ համատեղ զորավարժությունների մեծ մասը։

Կոզիցկին հայտնել է նաև, որ ըստ նախնական տվյալների՝ հրթիռներն արձակվել են Ռուսաստանի տարածքից։

Նույնպես Ուկրաինայի արևմուտքում, ռուսական զինուժը օդային հարվածներ է հասցրել Իվանո-Ֆրանկովսկի օդանավակայանին։

Լվովի մարզում հասցրած հարվածներով ռուսաստանցիները ցանկանում են ապացուցել, որ Ուկրաինայում չկա ոչ մի հանգիստ ու անվտանգ կետ, հայտարարել է Ուկրաինայի ներքին գործերի նախարարի խորհրդական Վադիմ Դենիսենկոն։

Թուրքիան չի միանա Ուկրաինայում պատերազմի պատճառով Ռուսաստանի դեմ մի շարք արևմտյան երկրների պատժամիջոցներին, հայտարարել է երկրի արտգործնախարարը։

Այսօր Անթալիայի դիվանագիտական համաժողովում Մևլյութ Չավուշօղլուն, ռուսաստանյան ՏԱՍՍ-ի փոխանցմամբ, ասել է․ - «Մենք համարում ենք, որ պատժամիջոցները խնդիրը չեն լուծի։ Օրինակ՝ օդային տարածքի փակումը։ Մենք չենք կարող այն փակել Մոնտրյոյի կոնվենցիային համապատասխան։ Դա իրավական պարտավորություն է»։

Մինչդեռ ՆԱՏՕ-ի գլխավոր քարտուղար Յենս Ստոլտենբերգը, ինչպես նշում է ռուսական պետական լրատվական գործակալությունը, նույն համաժողովի շրջանակում հայտարարել է, թե Հյուսիսատլանտյան դաշինքը բոլոր անդամներից, որոնց թվում է նաև Թուրքիան, սպասում է Մոսկվայի դեմ սահմանափակումների կիրառում։ Նա հայտնել է, թե այդ դիրքորոշումը ներկայացրել է Թուրքիայի արտաքին քաղաքական գերատեսչության ղեկավարին։

Հռոմի Ֆրանցիսկոս Պապը կիրակնօրյա ավանդական պատարագից հետո դիմելով Վատիկանի Սուրբ Պետրոսի հրապարակում հավաքված հավատացյալներին՝ կոչ է արել դադարեցնել Ուկրաինայի ռմբահարումները և բացել մարդասիրական միջանցքները խաղաղ բնակիչներին մարտական գոտիներից դուրս հանելու համար:

«Սրտիս ցավով միանում եմ պատերազմն ավարտելու մասին մարդկանց աղոթքներին: Ի սեր Աստծո, լսեք տառապյալների աղաչանքը և վերջ դրեք ռմբահարումներին, սկսեք բանակցել և ապահովեք մարդասիրական միջանցքների աշխատանքը, վերջ տվեք այս սպանդին», - ասել է Կաթոլիկ եկեղեցու հովվապետը, ով այսօր նշում է գահակալության 9-րդ տարեդարձը:

«Կարող է լինել միայն խաղաղության, այլ ոչ թե պատերազմի Աստված, մենք աղոթում ենք, որ ձեր սրտերը խաղաղություն պահանջեն», - ասել է Ֆրանցիսկոսը:

Մոտ ժամանակներս Ռուսաստանի և Ուկրաինայի միջև բանակցային գործընթացը կարող է վերաճել երկու պատվիրակությունների միասնական դիրքորոշման։ Այսպիսի կարծիք է հայտնել բանակցություններում ռուսական պատվիրակության անդամ, ՌԴ Պետդումայի միջազգային գործերով կոմիտեի ղեկավար Լեոնիդ Սլուցկին։

«Եթե համեմատենք երկու պատվիրակությունների դիրքորոշումները բանակցություններում դրանց հենց սկզբում և այսօր, կտեսնենք էական առաջընթաց։ Եվ մեկ անգամ ևս գոհունակությամբ կրկնեմ, որ անձամբ իմ սպասելիքներով՝ այդ առաջընթացը կարող է շատ մոտ օրերս վերաճել երկու պատվիրակությունների միասնական դիրքորոշման, ստորագրման ենթակա փաստաթղթերի», - ռուսական ՏԱՍՍ լրատվական գործակալության փոխանցմամբ՝ ասել է Սլուցկին։

Ուկրաինայի նախագահի գրասենյակի ղեկավարի խորհրդական, բանակցություններում ուկրաինական պատվիրակության անդամ Միխայիլ Պոդոլյակը,իր հերթին, Թվիթերում գրել է, որ ռուսական պատվիրակությունն արդեն ոչ թե խոսում է վերջնագրի լեզվով, այլ ուշադրությամբ լսում է Կիևի առաջարկները։

Ուկրաինան չի զիջի իր դիրքերը, պնդել է Վլադիմիր Զելենսկու գրասենյակի պաշտոնյան՝ շարունակելով․ - «Մեր պահանջներն են՝ պատերազմի ավարտ և ռուսաստանյան զորքերի դուրսբերում։ Տեսնում եմ, որ կա այդ գործընթացի ըմբռնում և երկխոսություն»։

Կրեմլի խոսնակ Դմիտրի Պեսկովն այսօր հաստատել է, որ մարտի 14-ին ռուս - ուկրաինական բանակցությունները կշարունակվեն տեսակապի ձևաչափով։

Ուկրաինայի մայրաքաղաք Կիևից ոչ հեռու գտնվող Իրպեն ավանում զոհվել է մարտական գործողությունները լուսաբանող ամերիկացի լրագրող Բրենթ Ռենոն: Նրա գործընկերներից մեկը վիրավորվել և վիրահատվել է ուկրաինական հիվանդանոցում:

Ուկրաինական կողմը պնդում է, որ լրագրողներին փոխադրող մեքենայի վրա ռուսներն են կրակ բացել:

Զոհված լրագրողի մոտ հայտնաբերվել են փաստաթղթեր, որոնց համաձայն նա 50 տարեկան է, կինովավերագրող է, այդ փաստաթղթերի մեջ կա նաև The New York Times պարբերականի վկայականը: Դա թույլ էր տվել ենթադրել, որ Ռենոն այդ պարբերականի թղթակիցն է, սակայն The New York Times-ը ժամեր անց ցավակցություն է հայտնել լրագրողի մահվան կապակցությամբ և միաժամանակ ընդգծել, որ Բրենթ Ռենոն հիմա չի հանդիսանում պարբերականի աշխատակից, թեպետ նախկինում համագործակցել է դրա հետ: «Ուկրաինայում նա հավատարմագրված չէր մեր կողմից», - ասել է The New York Times-ի գլխավոր խմբագրի տեղակալ Քլիֆ Լևին: