Պատերազմ Ուկրաինայում (լայվ բլոգ, թարմացվող)

Այսօր տեղի է ունենում պատերազմն ավարտելու խնդրով ռուս-ուկրաինական բանակցությունների չորրորդ փուլը: Ի տարբերություն Բելառուսի տարածքում կայացած առաջին երեք հանդիպումների՝ այս մեկն ընթանում է հեռավար եղանակով տեսակապի միջոցով:

Եվրոպական միության արտաքին քաղաքականության և անվտանգության հարցերով բարձր ներկայացուցիչ Ժոզեպ Բորելը Հյուսիսային Մակեդոնիայի մայրաքաղաք Սկոպյեում հայտարարել է, թե Մարիուպոլում մեծ թվով խաղաղ բնակիչներ են զոհվել, և աննախադեպ թվով բնակիչներ, պատերազմից փախչելով, լքել են Ուկրաինայի տարածքը: Նա «բարբարոսություն» է անվանել ռուսների ագրեսիան:

«Մարտական գործողությունների ընթացքում Մարիուպոլում սպանվել է ավելի քան 2 հազար 400 մարդ: Պատերազմի ընդամենը 17 օրում 2 միլիոն 600 հազար բնակիչ է հեռացել Ուկրաինայից, դա Եվրոպայում ամենախոշոր արտագաղթն է Երկրորդ աշխարհամարտից հետո»,- ասել է Եվրամիության դիվանագիտության ղեկավարը:

Ժոզեպ Բորելը հայտարարել է, որ Ռուսաստանի նկատմամբ ընդունվում է պատժամիջոցների չորրորդ փաթեթը: Դրանով ենթադրվում է արգելափակել Ռուսաստանի արտաքին առևտուրը և կապերը ֆինանսական միջազգային հաստատությունների հետ:

Եվրոպայի խորհրդի խորհրդարանական վեհաժողովը երեկ հատուկ նիստում քննարկել է Ուկրաինայի պատերազմի հարցը:

Նիստի մեկնարկին վեհաժողովի նախագահ Թինի Քոքսը խնդրել է մեկ րոպե լռությամբ հարգել Ուկրաինայում զոհված մարդկանց հիշատակը:

«Ռուսաստանի Դաշնությունն անտեսեց ոչ միայն մեր, այլև ամբողջ միջազգային համայնքի հորդորներն ու նախևառաջ պատերազմից զերծ մնալու ՄԱԿ-ի կոչերը: Մենք կքննարկենք հնարավոր հետագա քայլերը»,- հայտարարել է ԵԽԽՎ-ի խոսնակ Թինի Քոքսը:

Եվրոպայի խորհրդի խորհրդարանական վեհաժողովում Ռուսաստանի լիազորությունները փետրվարի 25-ից սառեցվել են:

«Սքուոթերները»՝ օտարի անշարժ գույքն ապօրինաբար գրավող և այնտեղ բնակություն հաստատող մարդիկ, ներխուժել և գրավել են Լոնդոնի ամենաշքեղ թաղամասում՝ Բելգրեյվում գտնվող ռուս միլիարդատեր Օլեգ Դերիպասկայի գերթանկարժեք առանձնատունը:

«Գրավելով այս դղյակը մենք մեր համերաշխությունն ենք հայտնում ոչ միայն Ուկրաինայի, այլև Ռուսաստանի ժողովրդին, քանի որ ռուսները երբեք հավանություն չէին տա այս խելագար պատերազմին»,- հայտարարել են «սքուոթերները»:

Իրանի Իսլամական Հանրապետության արտաքին գերատեսչության ղեկավար Հոսեյն Ամիր Աբդոլահիանն այսօր պաշտոնական այցով մեկնում է Ռուսաստանի Դաշնության մայրաքաղաք, որտեղ բանակցելու է իր պաշտոնակից Սերգեյ Լավրովի հետ:

Ռուսաստանի արտաքին գերատեսչության մամլո վարչությունը հայտնել է, որ նախարարները կանդրադառնան Իրանի միջուկային պայմանագրի վերականգնման շուրջ Վիեննայում ընթացող բանակցություններին, ինչպես նաև Ուկրաինայի ճգնաժամին:

Ռուսաստանի ԱԳՆ-ն ընդգծել է, որ ռուս-իրանական հարաբերությունները կշարունակեն զարգանալ «չնայած Արևմուտքի սահմանած պատժամիջոցներին»:

Վարչապետ Նիկոլ Փաշինյանը մարտի 14-ին հեռախոսազրույց է ունեցել Ամերիկայի Միացյալ Նահանգների պետքարտուղար Էնթոնի Բլինքենի հետ: Նրանք քննարկել են Հարավային Կովկասում տեղի ունեցող գործընթացները, Լեռնային Ղարաբաղի շուրջ իրավիճակն և լարվածության աճը, խոսել են նաև միջազգային ասպարեզում տեղի ունեցող գործընթացների, այդ թվում՝ Ուկրաինայում ստեղծված իրավիճակի մասին:

Եվրոպական միությունը հաստատել է Ռուսաստանի նկատմամբ պատժամիջոցների չորրորդ փաթեթը:

Փաթեթում ներառված են Ուկրաինայի վրա ռուսական ագրեսիային առնչություն ունեցող մի շարք ֆիզիկական և իրավաբանական անձինք, ինչպես նաև Ռուսաստանի Դաշնության արդյունաբերության համար ռազմավարական նշանակություն ունեցող ոլորտներ:

Եվրամիությունը նաև համաձայնեցրել է Առևտրի համաշխարհային կազմակերպությանը հասցեագրված նամակը, որով կոչ է անում սառեցնել Ռուսաստանին ժամանակին շնորհված «առևտրի իրականացման առավել բարենպաստ ռեժիմը»:

Նամակում կա նաև ԱՀԿ-ին անդամակցելու Բելառուսի դիմումի քննարկումը սառեցնելու կոչ:

Ուկրաինայում պատերազմի դեմ բողոքի աննախադեպ ակցիա է տեղի ունեցել Ռուսաստանի հեռուստատեսությունում:

Մարտի 14-ին Առաջին ալիքով հեռարձակվող «Վրեմյա» լրատվական ծրագրի ընթացքում մի երիտասարդ կին հայտնվել է հաղորդավարուհու ֆոնին` ձեռքում պահելով «Ո՛չ պատերազմին» գրությամբ պաստառը և վանկարկելով հակապատերազմական կարգախոսներ:

Երիտասարդ կնոջը՝ Առաջին ալիքի աշխատակցուհի Մարիա Օվսյաննիկովային ձերբակալել են: Նա կարող է պատասխանատվության կանչվել Ռուսաստանի Վարչական իրավախախտումների օրենսգրքի 20 հոդվածով՝ «Հանրային գործողություն, որն ուղղված է Ռուսաստանի Զինված ուժերի վարկաբեկմանը»:

«Ուկրաինա 24» ալիքը հայտնում է Կիևում երկու ուժգին պայթյունների մասին։

Հեռուստաալիքի տվյալներով՝ Ուկրաինայի վրա հրթիռներ են արձակվել բելառուսական Մոզիրից։ Օդային տագնապ է հայտարարվել Կիևում և երկրի մի շարք այլ վայրերում:

Ուկրաինական լրատվական գործակալությունները հայտնում են, որ Կիևում պայթյունների հետևանքով բնակելի շենք է այրվել։ 10-հարկանի շենքը գտնվում է Պոդոլսկի թաղամասում, որն Ուկրաինայի մայրաքաղաքի կենտրոնական թաղամասերից է։

Փրկարարների նախնական տեղեկություններով՝ այրված շենքում մի մարդ վիրավորվել է, նա հոսպիտալացվել է։

Հրդեհը մարվել է տեղական ժամանակով առավոտյան ժամը 7-ին։

Ուկրաինայում պատերազմի հետևանքով 90 երեխա է զոհվել, մոտ 100-ը՝ վիրավորվել։ Այս մասին հաղորդում են ուկրաինական լրատվամիջոցները՝ վկայակոչելով օմբուդսմեն Լյուդմիլա Դենիսովային։

Դենիսովայի խոսքով՝ տվյալները կարող են թերի լինել. տեղեկություններ չկան բազմաթիվ վայրերից, որտեղ մարտեր և ռմբակոծություններ են տեղի ունենում։