Պատերազմ Ուկրաինայում (լայվ բլոգ, թարմացվող)

Ֆրանսիայի նախագահ Էմանյուել Մակրոնը հայտարարել է մոտ ապագայում Ռուսաստանի նախագահ Վլադիմիր Պուտինի հետ նոր հեռախոսազրույց ունենալու մտադրության մասին։

«Եվրոպան չի կարող ապահով լինել, եթե Ռուսաստանի հետ երկխոսություն չվարի: Սա մեր պատմությունն է, մեր աշխարհագրությունը: Հետևաբար, առաջիկա մի քանի ժամում ես մտադիր եմ կրկին խոսել նախագահ Պուտինի հետ», - ասել է Ֆրանսիայի նախագահը երկրի Առաջին հեռուստաալիքի եթերում:

Սպիտակ տան մամուլի քարտուղար Ջեն Սաքին հայտարարել է, որ ԱՄՆ-ն իր դաշնակիցների հետ «ջախջախել է» ռուսական տնտեսությունը։

«Ո՞րն է լինելու վերջը, հարցը պետք է ուղղվի Պուտինին: Մենք ամբողջությամբ ջախջախեցինք նրա տնտեսությունը», - ասել է Սաքին ճեպազրույցում:

Ուկրաինական լրատվամիջոցները, վկայակոչելով փրկարար ծառայությունը, հաղորդում են, որ Խարկովում գիշերվա ընթացքում արկերից մի քանի տներ և խանութներ են ավերվել ու հրկիզվել, իսկ վերջին 24 ժամվա ընթացքում փլատակներից դուրս են բերվել յոթ զոհվածների մարմիններ։

Միացյալ Նահանգների նախագահի խորհրդականը Հռոմում հանդիպել է Չինաստանի կոմունիստական կուսակցության բարձրաստիճան պաշտոնյայի հետ: Վաշինգտոնը նախազգուշացրել է Պեկինին, որ կլինեն հետևանքներ, եթե որոշում կայացվի աջակցություն ցուցաբերել Մոսկվային Արևմուտքի տնտեսական պատժամիջոցների պայմաններում, հայտարարել է Պետդեպարտամենտի մամուլի ծառայության ղեկավար Նեդ Փրայսը։

Ռուսական ուժերը անցած գիշերը հարվածել են Դնեպր քաղաքի օդանավակայանին։

Դնեպրոպետրովսկի մարզի պետական վարչակազմի ղեկավար Վալենտին Ռեզնիչենկոն ասել է, որ երկու հրթիռների հարվածներով ավերվել է օդանավակայանի թռիչքուղին, վնասվել է տերմինալը։

Կիևի ավտոնորոգման կետերից մեկի աշխատակիցները պատերազմի օրերին փոխել են իրենց մասնագիտությունը։ Այստեղ սկսել են վերանորոգել որպես ռազմավար ուկրաինացիներին անցած ռուսական զենքերը՝ ուկրաինական բանակին ու քաղաքի պաշտպաններին հանձնելու համար։

Մոսկվայում այսօր կայացել են Ռուսաստանի և Իրանի արտգործնախարարներ Սերգեյ Լավրովի և Հոսեյն Ամիր Աբդոլահիանի բանակցությունները։ Հանդիպմանը հաջորդած մամուլի համատեղ ասուլիսում Աբդոլահիանը նաև հայտնել է, որ նախօրեին երկարատև հեռախոսազրույց է ունեցել Ուկրաինայի արտգործնախարար Դմիտրի Կուլեբայի հետ, ու վերջինիս ուղերձը փոխանցել է Լավրովին։

«Ուկրաինայի արտգործնախարարը խնդրեց պարոն Լավրովին փոխանցեմ, որ Ուկրաինան հանդես է գալիս պատերազմը դադարեցնելու և քաղաքական կարգավորման վրա կենտրոնանալու օգտին», - ասել է նա։

«Տարիներ շարունակ մենք լսել ենք ՆԱՏՕ-ի իբր բաց դռների մասին, բայց մենք արդեն լսել ենք, որ չենք կարող անդամակցել։ Սա ճշմարտություն է, որը մենք պետք է ընդունենք, և ես ուրախ եմ, որ մեր ժողովուրդը սկսել է դա հասկանալ և ապավինել սեփական ուժերին և մեր գործընկերներին»,- «Ասոշիեյթեդ Փրեսի» փոխանցմամբ` այսօր ասել է Ուկրաինայի նախագահ Վլադիմիր Զելենսկին։

Զելենսկին կրկին զենք է խնդրել, մասնավորապես ռազմական օդանավեր` Ռուսաստանի ագրեսիային դիմակայելու համար, ասելով, որ բոլորը գիտեն, թե Ուկրաինան ինչ տեսակի սպառազինությունների և պաշտպանական ինչ միջոցների կարիք ունի։