Պատերազմ Ուկրաինայում (լայվ բլոգ, թարմացվող)

Մարտի 15-ին Ռուսաստանի նախագահ Վլադիմիր Պուտինը հեռախոսազրույց է ունեցել Եվրոպական խորհրդի նախագահ Շառլ Միշելի հետ և նրան ասել է, որ ուկրաինական կողմը լուրջ տրամադրվածություն չի ցուցաբերում իրավիճակի կարգավորման ուղիներ գտնելու համար։

«Վլադիմիր Պուտինը ներկայացրել է Ռուսաստանի և Ուկրաինայի ներկայացուցիչների ընթացող բանակցությունների սկզբունքային գնահատականները՝ համաձայնությունների մշակման վերաբերյալ, հաշվի առնելով ռուսական կողմի հայտնի պահանջները։ Միաժամանակ նշվել է, որ Կիևը լուրջ վերաբերմունք չի ցուցաբերում փոխադարձ ընդունելի հանգուցալուծում գտնելու համար»,- նշված է Կրեմլի մամուլի ծառայության հաղորդագրությունում։

Ռուսական Առաջին հեռուստաընկերության ուղիղ եթերում հակապատերազմական ակցիա անցկացրած խմբագիր Մարինա Օվսյաննիկովան տուգանվել է 30 հազար ռուբլով և ազատ արձակվել։ Որոշումը մարտի 15-ին ընդունել է Մոսկվայի Օստանկինոյի շրջանի դատարանը` նրան մեղավոր ճանաչելով անօրինական ակցիաներին մասնակցելու կոչերի համար։

Միացյալ Նահանգների պետական քարտուղար Էնթոնի Բլինքենը հեռախոսով զրուցել է Ադրբեջանի նախագահ Իլհամ Ալիևի հետ:

Երկու պաշտոնյաները քննարկել են Ուկրաինայի պատերազմին և Հարավային Կովկասի քաղաքական զարգացումներին առնչվող հարցեր: Այդ մասին հայտնել է Պետական դեպարտամենտի խոսնակ Նեդ Փրայսը:

Ռուսաստանի Դաշնությունը դուրս եկավ Եվրոպայի խորհրդից: Այդ մասին արտաքին գործերի նախարար Սերգեյ Լավրովի պաշտոնական ծանուցումը փոխանցվել է Եվրոպայի խորհրդի գլխավոր քարտուղար Մարիա Պեյչինովիչ-Բուրիչին:

Ռուսաստանի արտաքին գերատեսչությունը նշել է, որ «Եվրոպայի խորհրդում մեծամասնություն կազմած ՆԱՏՕ-ի և Եվրամիության երկրները չարաշահում են այդ հանգամանքը և հետևողականորեն կազմակերպությունը վերածում են հակառուսաստանյան քաղաքականության գործիք»:

Թուրքիայի արտաքին գործերի նախարար Մևլյութ Չավուշօղլուն մեկնում է Մոսկվա, որտեղ մարտի 16-ին բանակցելու է ռուսաստանցի պաշտոնակից Սերգեյ Լավրովի հետ:

Արտգործնախարարների հանդիպման օրակարգում երկկողմ և միջազգային խնդիրներ են, այդ թվում՝ Ուկրաինայի ճգնաժամը:

«Ռուսական կողմը տեղեկություններ կներկայացնի Ուկրաինայում շարունակվող հատուկ օպերացիայի և խաղաղ բնակիչներին մարդասիրական միջանցքներով տարհանելու մասին»,- ասվում է ՌԴ ԱԳՆ-ի հաղորդագրությունում:

Մոսկովյան հանդիպումից հետո Թուրքիայի արտգործնախարարը մարտի 17-ին կմեկնի Կիև:

Թուրքիայի նախագահ Ռեջեփ Էրդողանը այսօր Անկարայում տեղի ունեցած կառավարության նիստից հետո հայտնել է Չավուշօղլուի առաջիկա այցերի մասին:

Էրդողանը հայտարարել է, որ արտգործնախարարը հանդիպումներ կունենա հակամարտող կողմերի հետ՝ շարունակելով Անկարայի ջանքերը հրադադարի հաստատման և խաղաղության վերականգնման ուղղությամբ:

Ի պատասխան Ուկրաինայի պատերազմի կապակցությամբ Ռուսաստանի պետական պաշտոնյաների և ընկերությունների ղեկավարների նկատմամբ Վաշինգտոնի սահմանած պատժամիջոցների՝ Մոսկվան պատժամիջոցներ է սահմանում Միացյալ Նահանգների ղեկավարների նկատմամբ:

Պատժամիջոցների ցանկում են ԱՄՆ-ի նախագահ Ջո Բայդենը, պետական քարտուղար Էնթոնի Բլինքենը, պաշտպանության նախարար Լլոյդ Օսթինը և մի խումբ քաղաքական ու զինվորական ղեկավարներ:

Այդ սանկցիաներով արգելվում է «սև ցուցակում» հայտնված ամերիկացիների մուտքը Ռուսաստանի Դաշնության տարածք:

Ռուսաստանի արտաքին գերատեսչությունը հայտնել է, որ առաջիկայում ցուցակը կընդլայնվի:

Մոսկվայի խոշորագույն առևտրային գործընկեր Եվրամիությունը Ռուսաստանի դեմ պատժամիջոցների հերթական փաթեթն է հրապարակել: «Այս պատժամիջոցների նպատակն է, որպեսզի նախագահ Պուտինը դադարեցնի այդ անմարդկային և անիմաստ պատերազմը», - հայտարարել է Եվրամիության դիվանագիտության ղեկավար Ժոզեպ Բորելը։

Երեկ հրապարակված փաստաթղթի համաձայն՝ արգելվում է Ռուսաստան ներկրել թանկարժեք մեքենաներ, ժամացույցներ, հագուստ, Ռուսաստանից գնել մետաղական արտադրանքի որոշ տեսակներ, ինչպես նաև ներդրումներ անել Ռուսաստանի էներգետիկ ոլորտում։

Եվրամիությունը պատժամիջոցներ է սահմանել նաև տասնյակ անձանց նկատմամբ։

Ֆրանսիայի նախագահ Էմանյուել Մակրոնը երեկ երեկոյան հայտարարել է Ռուսաստանի Առաջին հեռուստաալիքի խմբագիր Մարինա Օվսյաննիկովային դիվանագիտական «պաշտպանություն» և Ֆրանսիայում ապաստան առաջարկելու պատրաստակամության մասին։ Լրագրողին աջակցել է նաև ՄԱԿ-ը՝ կոչ անելով Ռուսաստանի իշխանություններին բռնաճնշումների չենթարկել կնոջը։

Երեկ ավելի վաղ Մոսկվայի Օստանկինո շրջանի դատարանը 30 հազար ռուբլով տուգանել է Օվսյաննիկովային՝ անօրինական ցույցեր կազմակերպելու կոչերի համար։

Embed Տարածել

Կիևում առավոտյան պայթյուններ են որոտացել

Embed Տարածել

The code has been copied to your clipboard.

---

width px height px

---

The URL has been copied to your clipboard

No media source currently available

0:00 0:01:22 0:00

Ուկրաինական լրատվամիջոցները գիշերը հաղորդում էին Վիննիցայում պայթյունների մասին։ Վիննիցան գտնվում է մարտական շրջաններից հեռու, և խոսքը հավանաբար նոր հրթիռակոծության մասին է։ Մանրամասներ դեռ չեն փոխանցվում։

Ուկրաինական լրատվամիջոցները տեղեկացնում են, որ հրթիռներ են արձակվել Մարիուպոլի ուղղությամբ: Գիշերը Խարկովում պայթյուններ են որոտացել։ Առավոտյան պայթյուններ են լսվել նաև Կիևում: Հաղորդվում է Օդեսայից մի քանի կիլոմետր դեպի արևմուտք գտնվող Միրնոյե գյուղում ուժգին պայթյունի մասին։

Ուկրաինական ալիքները հայտնում են, որ գիշերվա ընթացքում օդային տագնապ է հայտարարվել գրեթե ամբողջ երկրում։

Ուկրաինայի նախագահ Վլադիմիր Զելենսկին երեկ երեկոյան տեսաուղերձում հայտնել է, որ երեքշաբթի օրը արևելյան երեք շրջաններից՝ Սումիից, Խարկովից և Դոնեցկից տարհանվել է մոտ 30 հազար մարդ։

Ուկրաինայի նախագահ Վլադիմիր Զելենսկին Կիևում հանդիպել է Լեհաստանի, Չեխիայի և Սլովենիայի վարչապետների հետ։

Այդ կերպ այս երկրների քաղաքական գործիչներն իրենց համերաշխությունն են հայտնել Ուկրաինայի ժողովրդին։ Նրանք քննարկել են Ռուսաստանի դեմ պատժամիջոցները և աջակցությունը Ուկրաինային։