Պատերազմ Ուկրաինայում (լայվ բլոգ, թարմացվող)

«Գաղտնիք չէ, որ Ուկրաինայի հարցում Մոսկվայի և Անկարայի տեսակետները չեն համընկնում», - այսօր Թուրքիայի արտգործնախարար Մևլութ Չավուշօղլուի հետ Մոսկվայում կայացած բանակցությունների մեկնարկին հայտարարել է Ռուսաստանի արտգործնախարար Սերգեյ Լավրովը։

«Մենք բարձր ենք գնահատում և մեծ հարգանքով ենք վերաբերում Թուրքիայի դիրքորոշմանը։ Այդ երկիրը փորձում է օբյեկտիվորեն լուծել ներկա ճգնաժամից բխող խնդիրները», - հայտարարել է Լավրովը։

Եթե ռուս-ուկրաինական պատերազմը ձգձգվի՝ Ուկրաինայի բնակչության ճնշող մեծամասնությունը կհայտնվի չքավորության ճիրաններում։ Նման հայտարարությամբ են հանդես եկել ՄԱԿ-ի Զարգացման ծրագրի ղեկավարները։

Կազմակերպության ներկայացուցիչների պնդմամբ՝ պատերազմի շարունակության դեպքում երկրի բնակչության 90 տոկոսին կարող է սպառնալ չքավորության ստորին շեմից ցածր հայտնվելու վտանգը։ «Ուկրաինական տնտեսության վերջին 18 տարիների ձեռքբերումները կարող են զրոյացվել 12-ից 18 ամիսների ընթացքում», - հայտարարել է ՄԱԿ-ի զարգացման ծրագրի ղեկավար Ախիմ Շտայները։

«Կիևի և Մոսկվայի միջև ընթացող բանակցություններում քննարկվում է Ուկրաինայի չեզոքության շվեդական մոդելը», - այսօր լրագրողների հետ զրույցում նշել է Ռուսաստանի նախագահի խոսնակ Դմիտրի Պեսկովը։

Ավելի վաղ բանակցություններում ռուսական պատվիրակության ղեկավար Վլադիմիր Մեդինսկին հայտարարել էր, որ Կիևն առաջարկում է Ուկրաինայում «ավստրիական կամ շվեդական մոդելի չեզոք ապառազմականացված պետություն ստեղծել»։

Չեզոքության շվեդական և ավստրիական մոդելները ենթադրում են այդ երկրների հրաժարում ՆԱՏՕ-ին անդամակցելուց՝ Արևմուտքի հետ սերտ քաղաքական և տնտեսական կապերի պահպանմանը զուգահեռ։

«Ուկրաինայում հատուկ գործողության բոլոր նպատակները կյանքի կկոչվեն», - այսօր Մոսկվայում կայացած խորհրդակցության ժամանակ հայտարարել է Ռուսաստանի նախագահ Վլադիմիր Պուտինը։

Ռուսաստանի Դաշնության ղեկավարի պնդմամբ՝ Մոսկվան այլ ընտրություն չուներ, քան զորք մտցնել Ուկրաինա։

«Մենք հուսալիորեն կապահովենք Ռուսաստանի և դրա ժողովրդի անվտանգությունը և երբեք թույլ չենք տա, որ Ուկրաինան մեր երկրի դեմ իրականացվող նախահարձակ գործողությունների պլացդարմի վերածվի», - հայտարարել է Պուտինը։

ԱՄՆ-ի նախագահ Ջո Բայդենն ասել է, որ Վաշինգտոնն Ուկրաինային կտրամադրի 800 միավոր հակաօդային պաշտպանության համակարգեր, որոնք կօգնեն պաշտպանվել ռուսական օդանավերից և հրթիռներից:

Բացի այդ, Միացյալ Նահանգներն ուկրաինական բանակին կտա 9 հազար հակատանկային շարժական համակարգեր, անօդաչուներ և նռնականետեր:

«Դա կարող է լինել երկարատև և դժվար պայքար, բայց ամերիկացի ժողովուրդն անվերապահորեն կշարունակի սատարել Ուկրաինային խաղաղ բնակչության վրա Պուտինի անբարո և անպարկեշտ հարձակումից պաշտպանվելու գործում», - ասել է Բայդենը:

Ռուսաստանի նախագահ Վլադիմիր Պուտինն «ազգի դավաճաններ» է անվանել այն ռուսաստանցիներին, «ովքեր նախընտրում են արևմտյան կենսակերպը»:

Կրեմլի ղեկավարի խոսքով, «փորձելով վնաս հասցնել Ռուսաստանին՝ Արևմուտքը հենց այդ մարդկանց վրա է հույս դնում»:

Պուտինը քննադատել է արևմտյան երկրների քաղաքականությունը՝ հայտարարելով, թե դրա նպատակն է «չեղարկել Ռուսաստանը և այն դարձնել թույլ, կախյալ երկիր, որը կարելի է իրենց համար նպաստավոր պայմաններում նաև մասնատել»:

Նա հայտարարել է, թե «ռուս ժողովուրդը միշտ կարող է իսկական հայրենասերներին տարբերել սրիկաներից ու դավաճաններից և վերջիններիս թքելով դուրս կհանի, ինչպես պատահմամբ բերանը մտած ճանճի»:

Պուտինի խոսքով, այդօրինակ բնական և անհրաժեշտ ինքնամաքրումը «միայն կնպաստի երկրի ամրապնդմանը»:

Ուկրաինայի նախագահ Վլադիմիր Զելենսկին երեկ հեռավար կարգով դիմել է ԱՄՆ Կոնգրեսի անդամներին՝ մեկ անգամ ևս կոչ անելով անել ամեն ինչ Ուկրաինայի օդային տարածքը ոչ թռիչքային գոտի հայտարարելու համար։

«Այսօր Ռուսաստանի գործողությունների պատճառով ուկրաինական երկինքը հազարավոր մարդկանց մահվան պատճառ է դարձել։ Ռազմական գործողությունների սկզբից ի վեր Ուկրաինայի տարածքի ուղղությամբ շուրջ 1000 հրթիռ է արձակվել։ Մենք ողջ աշխարհից խնդրում ենք, որ այս ահաբեկչությունը պատշաճ պատասխանի արժանանա։ Արդյոք ես ձեզանից շա՞տ բան եմ խնդրում։ Եթե, այո, ապա ես կարող եմ այլընտրանք առաջարկել։ Տրամադրեք մեզ ՀՕՊ համակարգեր, օրինակ, C-300-ներ։ Մենք գիտենք, որ դուք ձեր տրամադրության տակ նման համակարգեր ունեք», - դիմելով ԱՄՆ Կոնգրեսի անդամներին՝ հայտարարում էր Զելենսկին։