Պատերազմ Ուկրաինայում (լայվ բլոգ, թարմացվող)

Բալթյան երկրները միաժամանակ հայտարարել են ռուս դիվանագետների արտաքսման մասին​:

Լատվիայի իշխանությունները երկրից արտաքսում են ռուսաստանյան դեսպանատան երեք աշխատակիցների` «դիվանագիտական կարգավիճակին հակասող գործունեության» պատճառով։ Նմանատիպ որոշում է ընդունել նաև Էստոնիան. այդ երկրի դիվանագիտական գերատեսչության համաձայն` անցանկալի անձ են ճանաչվել երեք ռուսաստանցիներ, որոնք դիվանագիտական կարգավիճակ ունեն։

Իր հերթին Լիտվան հայտարարել է 4 ռուսաստանցի դիվանագետների արտաքսման մասին:

Մոսկվայի «Լուժնիկի» մարզադաշտում Ղրիմի և Սևաստոպոլի բռնակցման ութերորդ տարվան նվիրված համերգ-հանրահավաք է կազմակերպվել, որի ընթացքում ելույթ է ունեցել նաև ՌԴ նախագահը։ Վլադիմիր Պուտինի ելույթի կեսից, սակայն, հեռարձակումը, անհասկանալի պատճառով ընդհատվել է։

Լեհաստանը շեշտակի մեծացնում՝ գրեթե կրկնապատկում է զինվորականների թիվը։ «Հայրենիքի պաշտպանության մասին» համապատասխան նոր օրենք է ստորագրել երկրի նախագահ Անջեյ Դուդան։

Լեհաստանի նախագահի գրասենյակի հաղորդագրության համաձայն` փաստաթուղթը ենթադրում է լեհական բանակի անձնակազմի թվի կրկնակի ավելացում՝ մինչև 300 հազար մարդ (250 հազար պրոֆեսիոնալ զինծառայող և 50 հազար տարածքային պաշտպանության զորքերի զինծառայող): Լեհաստանի բանակի զինծառայողների թիվը այժմ մոտ 150 հազար է։

Փետրվարի 24-ին Լեհաստանի հարևան Ուկրաինա Ռուսաստանի ներխուժումից հետո պաշտպանության նախարար Մարիուշ Բլաշչակը հրամայել է բարձրացնել լեհական բանակի առանձին ստորաբաժանումների պատրաստվածության մակարդակը։

Իտալիայի ֆինանսական ոստիկանությունը կալանքի որոշում է կայացրել Եվրամիության կողմից պատժամիջոցների ցանկում ներառված «Սևերստալ» ընկերության սեփականատեր Ալեքսեյ Մորդաշովի անշարժ գույքի նկատմամբ:

Ուկրաինայի նախագահ Վլադիմիր Զելենսկին Մոսկվային «բովանդակային և ազնիվ» բանակցությունների կոչ է անում՝ երկրում խաղաղություն և անվտանգություն հաստատելու նպատակով։

Զելենսկիի խոսքով՝ դա Ռուսաստանի «միակ հնարավորությունն է նվազեցնելու սեփական սխալների վնասները։

Ռուսաստանի պաշտպանության նախարարության մամուլի խոսնակ Իգոր Կոնաշենկովն այսօր ասել է, որ մարտի 18-ին գերձայնային "Кинжал" հրթիռային համակարգով ոչնչացրել են ուկրաինական ստորգետնյա մեծ զինապահեստ, որը գտնվում էր երկրի արևմուտքում՝ Իվանո-Ֆրանկովսկի Դելյատին բնակավայրի մոտ։

Նա նաև ասել է, որ ծովափնյա պաշտպանության "Бастион" համակարգով Օդեսայի մարզում ոչնչացվել է ուկրաինական ուժերի ռադիո-էլեկտրոնային հետախուզության երկու կետ։ Իսկ ռուսական օդուժը հարվածներ է հասցրել Ուկրաինայի 69 ռազմական օբյեկտների։

Վլադիմիր Զելեսկու դեմքով լոգո խաղալիքների վաճառքից 145 հազար դոլար է ստացվել, որն ուղղվելու է Ուկրաինայի օգնությանը։

Չիկագոյի արվարձանում գտնող խաղալիքների փոքր արտադրամասի սեփականատեր Ջո Թրյուփիան ասել է, որ սկզբում պարզ դրամահավաք կազմակերպելու գաղափար ունեին, որն ավելի մեծ նախաձեռնության վերածվեց:

Զելենսկու դեմքով լոգո խաղալիքները վաճառվում են 100 դոլարով, իսկ ուկրաինական դրոշի գույներով «մոլոտովյան կոկտեյլի» դիզայնով խաղալիքները՝ 20 դոլարով։ Վաճառքից ստացված գումարները փոխանցվելու է Direct Relief բարեգործական հիմնադրամին, որը 30 տոննա դեղամիջոց է ուղարկել Ուկրաինա։

Նիկոլաևի մոտ գտնվող ուկրաինական զորամասի ռմբահարման հետևանքներից հաղորդվում է տասնյակ զոհերի մասին։ Պաշտոնական հաղորդագրություններ դեռ չկան, չնայած ռուսական ուժերի հարձակումը տեղի է ունեցել մարտի 18-ին։

Քաղաքի վարչակազմի ղեկավար Ալեքսանդր Սենկևիչն ասել է, որ չեն հասցրել միացնել տագնապի ազդանշանները, քանի որ ռուսական ուժերի հրետակոծությունը կատարվել է հարևան Խերսոնի մարզից։

Ռմբահարման վայր հասած BBC-ի, ինչպես նաև բելգիական HLN-ի լրագրողները, վկայակոչելով տեղի աղբյուրները, հաղորդել են, որ ռմբակոծության պահին զորամասում մոտավորապես 200 զինվոր է գտնվել, ենթադրաբար տասնյակ զինվորներ են զոհվել, 57 վիրավոր է տեղափոխվել հիվանդանոցներ, փլատակները մաքրելու, փրկարարական-որոնողական աշխատանքները շարունակվում են։