Պատերազմ Ուկրաինայում (լայվ բլոգ, թարմացվող)

Մեծ Բրիտանիայի վարչապետ Բորիս Ջոնսոնը Բլեքփուլում Պահպանողական կուսակցության համագումարում հայտարարել է, որ հնարավոր չի համարում Ուկրաինայում Ռուսաստանի «հատուկ օպերացիայի» ավարտից հետո Ռուսաստանի նախագահ Վլադիմիր Պուտինի հետ հարաբերությունների բարելավումը:

Նրա խոսքով, Պուտինն ուներ Ուկրաինայի վրա հարձակվելու մեկ այլ դրդապատճառ, որը նրա վախն է Ուկրաինայից:

«Նա սարսափել էր, որովհետև Ուկրաինայում իսկապես կար ազատ մամուլ, իսկապես ազատ ընտրություններ էին»,- ասել է Բրիտանիայի վարչապետը:

Հռոմի Ֆրանցիսկոս պապն այցելել է մանկական հիվանդանոցում բուժում ստացող ուկրաինացի երեխաներին: Հռոմի «Մանուկ Հիսուսի» հիվանդանոցի հովանավորն ու կառավարիչը Վատիկանն է:

Փոքրիկ հիվանդները, որոնց թվում կան նաև օնկոլոգիական խնդիրներ ունեցողներ, վերջին օրերին են Ուկրաինայից բերվել Հռոմ:

Ուկրաինայի իշխանությունները պնդում են, որ փետրվարի 24-ին մեկնարկած պատերազմի ընթացքում գերեվարվել է առնվազն 562 ռուս զինծառայող: Այդ թիվը հայտնել է Ուկրաինայի փոխվարչապետ Իրինա Վերեշչուկը:

Նրա փոխանցմամբ, «բոլոր գերիներին վերաբերվում են միջազգային մարդասիրական իրավունքին համապատասխան»:

Ռուս զինվորականները վերջին 24 ժամվա ընթացքում ակտիվ հարձակողական գործողություն չեն իրականացրել, հայտնում է Ուկրաինայի զինված ուժերի գլխավոր շտաբը։

Ուկրաինայի ազգային անվտանգության և պաշտպանության խորհուրդը որոշել է դադարեցնել Ռուսաստանի հետ առնչվող մի շարք կուսակցությունների գործունեությունը: Այս մասին հայտարարել է Ուկրաինայի նախագահ Վլադիմիր Զելենսկին:

Չինաստանի արտաքին գործերի նախարար Վան Ին ասել է, որ երկրի դիրքորոշումը Ուկրաինայում Ռուսաստանի պատերազմի վերաբերյալ մնում է «անկախ»:

«Մենք չենք ընդունում որևէ արտաքին պարտադրանք և ճնշում, ինչպես նաև դեմ ենք Չինաստանի հասցեին ցանկացած անհիմն մեղադրանքի և կասկածի»,- ասել է դիվանագետը։

Ռուսաստանի և Ուկրաինայի դիրքորոշումները մի շարք կարևորագույն հարցերի շուրջ մոտեցել են, սակայն դրանցից մի քանիսը պետք է լուծվի նախագահների մակարդակով, ասել է Թուրքիայի արտգործնախարաչ Մևլութ Չավուշօղլուն։

Ֆրանսիայի իշխանությունները սառեցրել են Ռուսաստանի Կենտրոնական բանկի 22 միլիարդ եվրոյի չափով միջոցները, ինչպես նաև արևմտյան երկրների հակառուսական պատժամիջոցների տակ հայտնված ֆիզիկական անձանց հաշիվներն ու անշարժ գույքը։

Նրա խոսքով՝ Ֆրանսիայում սառեցվել է մոտ 30 ռուսաստանցիների պատկանող «կես միլիարդ եվրոյի» անշարժ գույք, կալանավորվել է նաև 150 միլիոն եվրո արժողությամբ երկու խոշոր զբոսանավ։

Մարիուպոլի մոտ ընթացող մարտերում զոհվել է Ռուսաստանի Սևծովյան նավատորմի հրամանատարի տեղակալ, առաջին ռանգի կապիտան Անդրեյ Պալիյը:

Այդ մասին հայտնել են Սևաստոպոլի նահանգապետ Միխայիլ Ռազվոզժաևը և սենատոր Եկատերինա Ալտաբաևան:

Փետրվարի 24-ին Ուկրաինայի դեմ Ռուսաստանի սկսած պատերազմում արդեն մի քանի բարձրաստիճան ռուս սպա է զոհվել:

Sky News Arabia հեռուստակայանի փոխանցմամբ, Վաշինգտոնն Անկարայի հետ բանակցում է ռուսական արտադրության S-400 զենիթահրթիռային համակարգերն Ուկրաինային փոխանցելու և դրա դիմաց Թուրքիայի նկատմամբ ընդունած սահմանափակումները վերացնելու շուրջ:

Վաշինգտոնը, մասնավորապես, առաջարկում է վերականգնել Թուրքիայի մասնակցությունը F-35 կործանիչների ստեղծման և արտադրության ծրագրում և չեղարկել մնացած պատժամիջոցները:

Ըստ Sky News Arabia-ի, Սլովակիան ստացել է Patriot տեսակի ամերիկյան զենիթահրթիռային համակարգեր, ինչի դիմաց Ուկրաինային պետք է փոխանցի ռուսական արտադրության ավելի հին սերնդի S-300 տեսակի ՀՕՊ համակարգեր: