Պատերազմ Ուկրաինայում (լայվ բլոգ, թարմացվող)

Փետրվարի 24-ին Ուկրաինայի վրա Ռուսաստանի բանակի հարձակումից ի վեր մարտական գործողությունների զոհ է դարձել առնվազն 902 խաղաղ բնակիչ: 1459 բնակիչ տարբեր աստիճանի վնասվածքներ է ստացել: Այդ տվյալները հրապարակել է ՄԱԿ-ի մարդու իրավունքների գերագույն հանձնակատարի գրասենյակը:

Զոհերի թվում են 179 տղամարդ, 134 կին, 11 աղջիկ, 25 տղա, ինչպես նաև 39 երեխաներ և 514 չափահասներ, որոնց սեռը դեռևս չի նույնականացվել:

Նշվում է, որ մարդկանց զոհվելու և վիրավորվելու հիմնական պատճառ է դարձել «պայթյունի սկզբունքով մեծ տարածքի ավերում առաջացնող զենքի գործադրումը»: Խոսքը, մասնավորապես, ծանր հրետանու, հրթիռների, ռումբերի և համազարկային կրակի ռեակտիվ համակարգերի մասին է:

Վիճակագրական տվյալները հիմնված են բաց աղբյուրներում հրապարակված թվերի վրա, որոնց արժանահավատությունը երբեմն հնարավոր չէ ստուգել պատերազմի պայմաններում:

Մարտի 21-ին հեռավար կարգով տեղի կունենա ռուս-ուկրաինական քննարկումների 5-րդ փուլը: Այդ մասին «Ուկրաինսկայա պրավդա» պարբերականին ասել է Ուկրաինայի խորհրդարանում՝ Գերագույն ռադայում «Ժողովրդի ծառա» կուսակցության խմբակցության ղեկավար Դավիթ Արախամիան:

Նրա խոսքով, մարտի 20-ին նույնպես տեղի են ունեցել ռուս-ուկրաինական քննարկումներ, որոնց մասնակցել են երկու երկրների փորձագետները:

Ռուս-ուկրաինական բանակցությունների առաջին երեք փուլերը տեղի են ունեցել առկա ձևաչափով Բելառուսում, չորրորդ փուլը հեռավար է անցկացվել:

Ուկրաինայի նախագահ Վլադիմիր Զելենսկին կրկին բանակցություններ վարելու կոչով դիմել է Ռուսաստանի նախագահ Վլադիմիր Պուտինին, թեև մեղադրում է Մոսկվային ռազմական հանցագործությունների և փողոցային մահացու մարտերի համար, որոնք տեղի են ունենում այս պահին Մարիուպոլ քաղաքում։

CNN-ին տված հարցազրույցում Զելենսկին ասել է, որ պատրաստ է Պուտինի հետ բանակցությունների, քանի որ առանց դրա պատերազմին վերջ տալ հնարավոր չի լինի։

«Եթե մեզ համար կա ընդամենը 1 տոկոս հնարավորություն այս պատերազմը դադարեցնելու համար, ես կարծում եմ, որ պետք է օգտվենք դրանից՝ Պուտինի հետ խոսելու հնարավորությունից։ Եթե այս փորձերը ձախողվեն, դա կնշանակի, որ սա երրորդ համաշխարհային պատերազմ է», - ասել է Զելենսկին։

Այսօր մեծ ծավալով տարհանում է նախատեսվում Մարիուպոլում, որտեղ փողոցային մարտեր են տեղի ունենում։

Երեկ ուշ երեկոյան Ուկրաինայի կառավարությունը հայտարարել էր՝ ծրագրում է տասնյակ ավտոբուսներ ուղարկել Մարիուպոլ՝ փախստականների տարհանման համար:

Մոտ 350 հազար մարդ մնում է պաշարված Մարիուպոլում։

Միացյալ Նահանգների նախագահ Ջո Բայդենը Եվրոպա կատարելիք այցի ընթացքում չի պատրաստվում այցելել Ուկրաինա։ Այս մասին հաղորդում է Սպիտակ տունը՝ ընդգծելով՝ ուղևորության ժամանակ աշխարհին ի ցույց կդրվի աջակցությունը ուկրաինացի ժողովրդին և կդատապարտվի Ռուսաստանի նախագահ Պուտինի Ուկրաինա ներխուժումը։

Ուկրաինայի նախագահ Վլադիմիր Զելենսկին, նախկին նախագահ Պետրո Պորոշենկոն և ուկրաինացի այլ պաշտոնյաներ առաջարկել էին ԱՄՆ նախագահին Եվրոպա շրջագայության ժամանակ այցելել պատերազմից տուժած երկիր՝ Ուկրաինա։

Ամենայն հավանականությամբ մարտի 24-ին Բայդենը կլինի Բրյուսելում՝ մասնակցելու ՆԱՏՕ-ի հրատապ հանդիպմանը։

Գերմանիան ձեռք է բերել երկարաժամկետ էներգետիկ գործընկերություն Պարսից ծոցի երկրի՝ Կատարի հետ։

Բեռլինը փորձում է այսպես ավելի քիչ կախվածություն ունենալ ռուսական էներգակիրներից՝ Մոսկվայի Ուկրաինա ներխուժումից հետո: «Չնայած այս տարի մենք դեռ ռուսական գազի կարիք կունենանք, ապագայում, սակայն դա այլևս չի լինի: Եվ սա միայն սկիզբն է», - երեկ Դոհա այցի ժամանակ ասել է Գերմանիայի էկոնոմիկայի նախարար Ռոբերտ Հաբեկը:

Հռոմի Պապը դատապարտում է «բռնի ագրեսիան» Ուկրաինայի դեմ և պահանջում է վերջ տալ «նողկալի պատերազմին», ընդգծելով՝ արդարացում չկա պաշարված երկրում տեղի ունեցող «անիմաստ կոտորածին»:

«Ուկրաինայի դեմ կատաղի ագրեսիան, ցավոք, չի դանդաղում», - ասել է Ֆրանցիսկոս Պապը երեկ Սուրբ Պետրոսի հրապարակում ամենշաբաթյա ելույթի ժամանակ՝ խուսափելով նշել Ռուսաստանի անունը։

Դիմելով միջազգային հանրության բոլոր դերակատարներին՝ Պապը կոչ է արել իսկապես պարտավորվել դադարեցնել «այս նողկալի պատերազմը»։

«Հրթիռներն ու ռումբերը հարվածում են խաղաղ բնակիչներին, ծերերին, երեխաներին և հղիներին», - ասել է Հռոմի Կաթոլիկ եկեղեցու քահանայապետը։

ՄԱԿ-ի տվյալներով՝ ուկրաինացիների գրեթե մեկ քառորդը լքել են իրենց տները կամ երկիրը, ռուսական բանակի ռազմական գործողություններն Ուկրաինայում առաջացրել են Երկրորդ համաշխարհային պատերազմից ի վեր ամենալուրջ միգրացիոն ճգնաժամը Եվրոպայում։

Ուկրաինան մերժել է շրջափակված Մարիուպոլ քաղաքը հանձնելու և մարտի 21-ին սպիտակ դրոշներ բարձրացնելու Ռուսաստանի պահանջը՝ ասելով, որ «հանձնվելու մասին խոսք չկա»։

Մինչ պատերազմի մեկնարկը 400-հազարանոց Մարիուպոլի բնակիչները վերջին երկու շաբաթվա ընթացքում ջրի, սննդի և վառելիքի ձեռքբերման խնդիր ունեն: Ռուսաստանը ձգտում է իր վերահսկողության տակ առնել քաղաքը։

Ռուս զինվորականները Ուկրաինային ժամանակ էին տվել մինչև այսօր առավոտ Մարիուպոլը հանձնելու համար՝ խոստանալով, որ դրա դիմաց կառաջարկվի երկու մարդասիրական միջանցք։

Պաշտոնական Մոսկվան պնդում է, որ անցած գիշեր իրականացված հթրիռային հարվածների հետևանքով նոր կորուստներ է պատճառել Ուկրաինայում գտնվող օտարերկրյա կամավորներին։ Այս մասին այսօր առավոտյան հայտարարել է Ռուսաստանի պաշտպանության նախարարության խոսնակ, գեներալ-մայոր Իգոր Կոնաշենկովը։

«Մարտի 21-ի գիշերը օդային տեղակայման գերճշգրիտ հրթիռներով հարված է հասցվել Ռովնոյի մարզի «Նովայա Լյուբոմիրկա» համազորային ռազմավարժարանին։ Այն օտարերկրյա վարձկանների և ազգայնական ստորաբաժանումների մարտիկների մարզումների վայրն էր։ Հարվածի հետևանքով 80 վարձկան և ազգայնական է ոչնչացվել», - հայտարարել է Կոնաշենկովը։

Ռազմավարժարանին հասցված հարվածների փաստը հաստատել է նաև Ռովնոյի նահանգապետ Վիտալի Կովալը։