Պատերազմ Ուկրաինայում (լայվ բլոգ, թարմացվող)

Ռուսաստանցի անվանի հեռուստալրագրող Ժաննա Ագալակովան, ով վերջին տարիներին Ռուսաստանի Առաջին ալիքի համար ռեպորտաժներ է պատրաստել արտասահմանից, ի նշան բողոքի հեռանում է աշխատանքից:

«Ես հեռացա Առաջին ալիքից հենց պատերազմի առաջին օրը»,- այսօր Փարիզում ասել է Ագալակովան:

Նրա խոսքով, Ռուսաստանում վերջին տարիների ընթացքում սկսել են խեղդել անկախ մամուլը, որը դժվարությամբ է գոյատևում:

Ռուսաստանի և Ֆրանսիայի ղեկավարները մարտի 22-ին հեռախոսով քննարկել են Ուկրաինայում ստեղծված իրավիճակը, ռուս-ուկրաինական բանակցությունների և գերիների փոխանակման հարցերը:

«Ֆրանսիական կողմի նախաձեռնությամբ տեղի է ունեցել Ռուսաստանի Դաշնության և Ֆրանսիայի Հանրապետության նախագահներ Վլադիմիր Պուտինի և Էմանյուել Մակրոնի հեռախոսազրույցը: Շարունակվել է մտքերի փոխանակությունը Ուկրաինայում ստեղծված իրավիճակի վերաբերյալ», - ասվում է Կրեմլի հաղորդագրությունում:

BFM հեռուստակայանը՝ վկայակոչելով Ելիսեյան պալատը, հայտնել է, որ Մակրոնը Պուտինին հորդորել է անհապաղ դադարեցնել կրակն Ուկրաինայում:

«Չկա որևէ այլ լուծում, քան կրակի դադարեցումը», - ասել է Մակրոնը Պուտինին:

Մակրոնը նույն օրը հեռախոսով զրուցել է նաև Ուկրաինայի նախագահ Վլադիմիր Զելենսկու հետ:

Ռուսաստանի նախագահ Վլադիմիր Պուտինի մամլո խոսնակ Դմիտրի Պեսկովը CNN ամերիկյան հեռուստակայանին մարտի 22-ին տված հարցազրույցում ասել է, որ Ուկրաինայում «հատուկ օպերացիան» ընթանում է ըստ կազմված ծրագրի։

«Ոչ ոք ամենասկզբից չի մտածել, թե օպերացիան երկու օր կտևի: Դա լուրջ գործողություն է՝ լուրջ նպատակներով», - ասել է Պեսկովը:

Պեսկովի փոխանցմամբ, Մարիուպոլում բանակի նպատակն է «քաղաքը մաքրել ազգայնական խմբավորումներից»: Կրեմլի խոսնակը պնդել է, թե «նացիոնալիստները խաղաղ մարդկանց չեն թողում դուրս գալ քաղաքից»:

Ռուսական ներխուժումն Ուկրաինա արդեն շարունակվում է չորս շաբաթ, ռազմական դրությունը Ուկրաինայում երկարաձգվել է մինչև ապրիլի 25-ը։

ՄԱԿ-ի տվյալներով՝ Ուկրաինայում 953 խաղաղ բնակիչ է սպանվել, 1557-ը վիրավորվել են, ավելի քան 3,5 միլիոնը փախստական են դարձել։

Զինվորական կորուստների մասին ստույգ տվյալներ չեն հայտնում ո՛չ Ուկրաինան, ո՛չ Ռուսաստանը։

Ուկրաինայի նախագահ Վլադիմիր Զելենսկին հայտարարել է, որ Ռուսաստանը խափանել է Մարիուպոլ մարդասիրական օգնության տրամադրումը՝ թույլ չտալով, որ փրկարարներն ու բեռները տեղ հասնեն։

Կարմիր Խաչը հաստատել է, որ հումանիտար բեռներով շարասյունը չի կարողացել Մարիուպոլ մտնել։

Մարիուպոլը շրջափակված է և հարձակման է ենթարկվում արդեն ոչ միայն օդից և ցամաքից, այլև Ազովի ծովից։

Ռուսական ներխուժումն Ուկրաինա արդեն շարունակվո

Ռուսաստանը միջուկային զենք կարող է կիրառել, եթե պետության գոյությանը վտանգ սպառնա։ Այդ մասին CNN-ին տված հարցազրույցում ասել է Կրեմլի խոսնակ Դմիտրի Պեսկովը։

Ռուսաստանի նախագահի խոսնակը հղում է արել ազգային անվտանգության գործող փաստաթղթերին՝ նշելով, որ այնտեղ նկարագրված են միջուկային զենքի կիրառման բոլոր հիմքերը։

Միացյալ Նահանգների նախագահ Ջո Բայդենը կմեկնի Եվրոպա՝ հինգշաբթի օրը ՆԱՏՕ-ի արտահերթ նիստին մասնակցելու համար, որը Ուկրաինա ռուսական ներխուժմանն է վերաբերելու:

Բայդենը կայցելի Բրյուսել և Լեհաստան:

ԱՄՆ նախագահը կմասնակցի նաև Մեծ յոթնյակի հավաքին և Եվրամիության գագաթնաժողովին, իսկ Լեհաստանում կհանդիպի այդ երկրի նախագահի հետ:

Ուկրաինայի նախագահ Վլադիմիր Զելենսկու հետ հանդիպում նախատեսված չէ:

Մեծ Բրիտանիայի պաշտպանության նախարարությյան համաձայն՝ Ուկրաինայի հյուսիսում իրավիճակը հիմնականում նույնն է, «ռուսական ուժերը, ամենայն հավանականությամբ, կվերակազմակերպվեն նախքան լայնածավալ հարձակողական գործողությունները վերսկսելը»:

«Ռուսական ուժերը փորձում են շրջափակել ուկրաինական զորքերը երկրի արևելքում, առաջ շարժվելով հյուսիսից՝ Խարկովի մարզից, և հարավից՝ Մարիուպոլի շրջանից», - ասվում է հաղորդագրությունում։

Ըստ բրիտանական ռազմական գերատեսչության, ռուսական ուժերը շարունակում են փորձել շրջապատել Նիկոլաևը՝ նպատակ ունենալով ավելի առաջ շարժվել դեպի արևմուտք՝ Օդեսա։

Լեհաստանի հատուկ ծառայությունները արտգործնախարարությանը խնդրում են վտարել 45 ռուս դիվանագետների, որոնցից մի քանիսը, ենթադրաբար, դիվանագիտական աշխատանքի քողի տակ աշխատում են Մոսկվայի գաղտնի ծառայություններում։

Լեհաստանի Ազգային անվտանգության ծառայության հաղորդագրության համաձայն՝ ապացույցներ են ձեռք բերվել, որոնք փաստում են, որ «երկրում բացահայտված սպաների և նրանց հետ համագործակցող անձանց գործունեությունը ծառայում է ռուսական հետախուզական գործունեությանը՝ ուղղված միջազգային ասպարեզում Լեհաստանի Հանրապետության և նրա գործընկերների կայունության դեմ, և վտանգ է ներկայացնում Լեհաստանի շահերի և անվտանգության համար»։

Լեհաստանի կառավարության խոսնակի համաձայն՝ Ռուսաստանի դեսպանը կանչվել է ԱԳՆ, և հետագա քայլերի վերաբերյալ որոշումները կհրապարակվեն հանդիպումից հետո։

Ռուսաստանի արտաքին գործերի նախարարությունը նախազգուշացրել է, որ դիվանագետներին Լեհաստանից արտաքսելու դեպքում պատասխան քայլեր կձեռնարկեն:

Իտալիան 880 միլիոն դոլարի, Նիդերլանդները՝ 431 միլիոն դոլարի, Լեհաստանը՝ 33 միլիոն դոլարի ակտիվներ է սառեցրել, որոնք պատկանում են ռուսաստանցի օլիգարխների։ Ուկրաինայի վրա Ռուսաստանի հարձակմամբ պայմանավորված որոշման մասին հայտարարել են Եվրամիության անդամ այդ երկրների իշխանությունները։

Ավելի վաղ Ֆրանսիան սառեցրել է Ռուսաստանի կենտրոնական բանկին պատկանող 22 միլիարդ եվրոն, ինչպես նաև պատժամիջոցների տակ հայտնված մասնավոր անձանց պատկանող 850 միլիոն եվրո արժողությամբ գույքը։