- Հեղինակ՝ Լուսինե Մուսայելյան
Ուկրաինայի իշխանությունները հայտարարում են, որ Ռուսաստանի հետ ինը մարդասիրական միջանցքի շուրջ են պայմանավորվել, ինչը թույլ կտա տարհանել շրջափակման մեջ հայտնված մի շարք քաղաքների բնակիչներին։
Ուկրաինայի փոխվարչապետ Իրինա Վերեշչուկի խոսքով՝ Մարիուպոլից դեպի Զապորոժիե միջանցքներն անցնում են պաշարված քաղաքի ծայրամասերից, այլ ոչ թե կենտրոնական հատվածից, որտեղ տասնյակ հազարավոր մարդիկ մնացել են առանց հոսանքի և այլ մատակարարումների։ Ըստ ուկրաինացի պաշտոնյայի՝ մի քանի երթուղիներ են համաձայնեցվել նաև Կիևի մարզում։
- Հեղինակ՝ Լուսինե Մուսայելյան
Ռուսաստանն ու Ուկրաինան երկու անգամ գերիների փոխանակում են իրականացրել, այս մասին հայտարարել է Ռուսաստանի արտգործնախարարության խոսնակ Մարիա Զախարովան։
Թե երբ է տեղի ունեցել գերիների փոխանակումը, քանի մարդ է փոխանակվել, Զախարովան չի հստակեցրել։
Կրեմլը նույնպես գերիների փոխանակման մասին տեղեկություն չի հայտնել։
Անցած շաբաթ հաղորդվել է, որ 9 ռուս զինվորների դիմաց ռուսական կողմը համաձայնել է ազատ արձակել Մելիտոպոլի քաղաքապետ Իվան Ֆյոդորվին։ Փոխանակում պաշտոնապես տեղի է ունեցել , թե ոչ՝ հստակ չէ։
Մարտի 21-ին Ռուսաստանի մարդու իրավունքների պաշտպան Տատյանա Մոսկալկովան RT-ի եթերում հայտարարել է, որ Մոսկվան ավելի քան 500 ուկրաինացի ռազմագերիների մասին տվյալներ է փոխանցել Միջազգային Կարմիր Խաչին։ Ավելի վաղ Ուկրաինայի փոխվարչապետ Իրինա Վերեշչուկը ТСН-ին տված հարցազրույցում հայտնել է, որ ուկրաինական գերության մեջ է 562 ռուս։
- Հեղինակ՝ Լուսինե Մուսայելյան
Ուկրաինայում Ռուսաստանի հատուկ ռազմական գործողություններում Հավաքական անվտանգության պայմանագրի կազմակերպության (ՀԱՊԿ) երկրների ուժերն օգտագործելու հարցը կառույցում չի բարձրացվել։ Այս մասին չորեքշաբթի օրը լրագրողների հետ զրույցում հայտարարել է ՌԴ նախագահի մամուլի խոսնակը։
Պատասխանելով հարցին՝ հնարավո՞ր է արդյոք, որ ՀԱՊԿ-ի միջոցով այլ երկրների զորքերը ներգրավվեն այդ գործողություններում, Դմիտրի Պեսկովն ասել է․ - «Որքան ինձ է հայտնի՝ ՀԱՊԿ-ի հարթակում նման հարցեր չեն բարձրացվել»։
- Հեղինակ՝ Լուսինե Մուսայելյան
«Ռոսնանո» պետական կորպորացիայի նախկին ղեկավար, Ռուսաստանի նախկին փոխվարչապետ Անատոլի Չուբայսը, որը վերջին տարիներին Վլադիմիր Պուտինի ներկայացուցիչն էր Միջազգային կազմակերպություններում կայուն զարգացման և կլիմայի հարցերով, հրաժարական է տվել այդ պաշտոնից և լքել Ռուսաստանը։
Այս մասին հայտնում է Bloobmerg-ը՝ վկայակոչելով իր աղբյուրները, որոնք որպես պատճառ են նշել Ռուսաստանի ներխուժումն Ուկրաինա։ ՌԴ նախագահի հատուկ ներկայացուցչի պաշտոնից Չուբայսի հրաժարականի մասին լուրը հաղորդում է նաև ՏԱՍՍ պետական գործակալությունը։
66-ամյա Չուբայսը դարձավ առաջին բարձրաստիճան պաշտոնյան, որը խզեց հարաբերությունները Կրեմլի հետ՝ Ուկրաինա Ռուսաստանի ներխուժման պատճառով:
- Հեղինակ՝ Գեւորգ Ստամբոլցյան
«Ուկրաինական բանակի սպառազինությունը սպառվում է», - գրում է լոնդոնյան The Times պարբերականը՝ պնդելով, որ Կիևի եվրոպական դաշնակիցները չեն շտապում լրացնել ուկրաինական ԶՈւ-ի կորուստները։
Մարտի 15-ին Ուկրաինայի ԱԳ նախարար Դմիտրի Կուլեբան հայտնել է, որ ուկրաինական բանակը երկու շաբաթ ունի մինչև զենիթային և հակատանկային զինատեսակների ամբողջական սպառումը։ «Այդ օրվանից իրադրությունը մասնակիորեն է բարելավվել», - նշել են թերթի զրուցակիցները։
«Կիևի հիմնական դժգոհությունը վերաբերում է Գերմանիայի և Ֆրանսիայի պահվածքին, որոնք չեն կատարում Ուկրաինային զենք տրամադրելու՝ նախկինում տրված խոստումը», - The Times-ի թղթակցին ասել է Ուկրաինացիների համաշխարհային կազմակերպության նախագահ Փոլ Գրոդը։
«Ուկրաինայի նախագահ Զելենսկին այս խնդրի մասին խոսել է նաև Մեծ Բրիտանիայի վարչապետ Բորիս Ջոնսոնի և Հյուսիսային Եվրոպայի երկրների ղեկավարների հետ անցած շաբաթ կայացած հեռավար հանդիպման ժամանակ», - գրում է թերթը՝ պնդելով, թե, ըստ Զելենսկու, ուկրաինական կողմը 20 ժամում սպառում է Արևմուտքից ստացված սպառազինության շաբաթական չափաբաժինը։
Ուկրաինական կողմի հիմնական պահանջները վերաբերում են օդային թիրախների և տանկերի դեմ պայքարի համար նախատեսված շարժական միջոցներին՝ Stinger-ներին և Javelin-ններին։
Մեծ Բրիտանիայի վարչապետն այսօր Բրյուսելում մեկնարկող ՆԱՏՕ-ի գագաթնաժողովի ընթացքում պատրաստվում է օրակարգ մտցնել այս հարցը՝ դաշնակիցներին հորդորելով մեծացնել Ուկրաինային մատակարարվող սպառազինության ծավալները։
- Հեղինակ՝ Արմեն Քոլոյան
Կիևում խմբագրության հանձնարարությունը կատարելիս կրակի տակ է հայտնվել և զոհվել է The Insider պարբերականի լրագրող Օքսանա Բաուլինան:
«Նա Կիևի Պոդոլսկի շրջանում նկարահանում էր ռուսների կողմից ռմբահարված թաղամասի ավերակները և հայտնվել է հրթիռակոծման տակ: Օքսանայի հետ միասին զոհվել է մի քաղաքացիական անձ, Օքսանային ուղեկցող երկու մարդ վիրավորվել և փոխադրվել է հիվանդանոց», - հաղորդել է The Insider պարբերականը:
- Հեղինակ՝ Անուշ Մկրտչյան
Այսօր ՆԱՏՕ-ում հատուկ նիստ է նախատեսված Ուկրաինայի հարցով, ԱՄՆ նախագահ Ջո Բայդենը ժամանել է Բրյուսել։ Հաղորդվում է, որ նա առիթը կօգտագործի Մոսկվայի դեմ ավելի շատ պատժամիջոցներ հայտարարելու համար:
Interfax-Ukraine-ի փոխանցմամբ՝ Հյուսիսատլանտյան դաշինքի գագաթնաժողովում ելույթ կունենա նաև Ուկրաինայի նախագահ Վլադիմիր Զելենսկին։
- Հեղինակ՝ Անուշ Մկրտչյան
Մեծ Բրիտանիայի վարչապետ Բորիս Ջոնսոնը երեկ երեկոյան հայտարարել է, որ իր երկիրը ևս 6 հազար հրթիռ և մոտ 33 միլիոն դոլար ֆինանսական օգնություն կուղարկի Ուկրաինայի բանակին:
«Միացյալ Թագավորությունը կաշխատի մեր դաշնակիցների հետ՝ ուժեղացնելու ռազմական և տնտեսական աջակցությունն Ուկրաինային: Մենք անտարբեր չենք կանգնի այն ժամանակ, երբ Ռուսաստանը փոշիացնում է Ուկրաինայի քաղաքները», - ասել է Ջոնսոնը։
- Հեղինակ՝ Անուշ Մկրտչյան
Միացյալ Նահանգների նախագահ Ջո Բայդենը հայտարարել է, որ Ռուսաստանի կողմից Ուկրաինայի դեմ քիմիական զենքի կիրառման սպառնալիքը «իրական է»։
ՆԱՏՕ-ի գլխավոր քարտուղար Յենս Ստոլտենբերգը նախազգուշացրել է՝ ինչ հետևանքներ կլինեն, եթե Մոսկվան օգտագործի այդպիսի զենք։ «Քիմիական զենքի ցանկացած կիրառում լիովին կփոխի հակամարտության բնույթը, դա կլինի միջազգային իրավունքի բացահայտ խախտում և կունենա հեռուն գնացող հետևանքներ», - երեկ Բրյուսելում ասել է Ստոլտենբերգը:
Այս ամսվա սկզբին Ռուսաստանն էր ՄԱԿ-ի Անվտանգության խորհրդում բարձրացրել Ուկրաինայում ԱՄՆ-ի ենթադրյալ «կենսաբանական գործունեության» հարցը։ Վաշինգտոնն ու Կիևը հերքել էին մեղադրանքը։