Պատերազմ Ուկրաինայում (լայվ բլոգ, թարմացվող)

Լեհաստանի սահմանամերձ Մեդիկա գյուղը դարձել է ուկրաինացի փախստականների ընդունման անցակետերից մեկը։ Գյուղում փախստականների հաշվառման կետ է բացվել, նրանց տրամադրված դպրոցի մարզադահլիճի հատակին այլևս տեղ չկա պառկելու համար, գյուղը փախստականներին օգնում է ինչով կարող է։

Գյուղապետ Մարեկ Իվասիեցկոն ասել է, որ երազում են այս իրավիճակի ավարտ ու կայունության մասին։ «Մենք հոգնել ենք, բայց պատրաստ ենք օգնել մինչև վերջ»,- ասել է ուկրաինացի փախստականներին ընդունող լեհական գյուղի գյուղապետը։

Ուկրաինայի նախագահի գրասենյակը հրապարակել է Վլադիմիր Զելենսկու ձայնագրված ելույթը, որը հեռարձակվելու է ՆԱՏՕ-ի գագաթաժողովում։

Զելենսկին ՆԱՏՕ-ի առաջնորդներից խնդում է ավելացնել զենքի մատակարարումները ռուսական ուժերին դիմակայելու համար և զգուշացնում, որ եթե Ռուսաստանը Ուկրաինայում հաջողության հասնի, նրա հաջորդ թիրախում են լինելու Արևելաեվրոպական և Բալթյան երկրները։

Ռուս-ուկրաինական պատերազմի հետևանքով արդեն ավելի քան 3 միլիոն 600 հազար ուկրաինացի փախստականների մոտավորապես կեսը երեխաներ են։ Այդ մասին հայտնում է UNICEF-ը։

Եվրոպական երկրներում ջանքեր են գործադրվում դպրոցականների ուսումը ինտերնետային ծրագրերով շարունակելու համար։

Ուկրաինայի բանակի գլխավոր շտաբը մարտի 24-ին հայտնել է, որ Բերդյանսկի նավահանգստում խորտակել են ռուսական դեսանտային «Օրսկ» նավը։

Ռուսական պետական լրատվամիջոցները երեք օր առաջ հաղորդել էին, որ դեսանտային մեծ նավը ռազմական տեխնիկա է տեղափոխել Բերդյանսկ։

Ազովի նավահանգիստ Բերդյանսկը ռուսական ուժերի վերահսկողությանն էր անցել փետրվարի վերջին։

Հյուսիսատլանտյան դաշինքը կշարունակի աջակցել Ուկրաինային` մասնավորապես տրամադրելով զենք և սարքավորումներ, դաշինքի գագաթնաժողովին հաջորդած մամուլի ասուլիսում ասել է ՆԱՏՕ-ի գլխավոր քարտուղար Յենս Ստոլտենբերգը:

Միաժամանակ նա նշել է, որ դաշնակիցները նախկինի պես դեմ են հակամարտության հետագա սրացմանը և զորք չեն ուղարկի Ուկրաինա, ինչպես նաև ոչ թռիչքային գոտի չի հայտարարվի։

ՄԱԿ-ի Գլխավոր ասամբլեան ընդունել է բանաձև, որով Ռուսաստանի վրա է պատասխանատվություն դրվել Ուկրաինայում ստեղծված իրավիճակի համար:

Ուկրաինայում հումանիտար կացության մասին բանաձևի նախագիծը ներկայացրել են Ֆրանսիան և Մեքսիկան, այն ընդունվել է քվեների 140 կողմ, 5 դեմ և 38 ձեռնպահ հարաբերակցությամբ:

Բանաձևին դեմ են քվեարկել Ռուսաստանը, Բելառուսը, Սիրիան, Էրիթրեան և Հյուսիսային Կորեան: Չինաստանը ձեռնպահ է մնացել:

Արևմուտքի լիդերները հավաքվել են Բրյուսելում, որտեղ երեք արտահերթ գագաթնաժողովներ են անցկացվում: ՆԱՏՕ-ի հավաքն արդեն ավարտվել է, օրակարգում Եվրամիության և «Մեծ յոթնյակի» հանդիպումներն են:

Միակ խոշոր թեման Ուկրաինայի պատերազմն է: Արևմուտքը ցանկանում է օգնել Ուկրաինային և դաժան ագրեսիայի համար պատժել Մոսկվային:

Ուկրաինայի ղեկավարը գրեթե ամբողջությամբ պաշարված մայրաքաղաքից տեսակապով դիմել է ՆԱՏՕ-ի լիդերներին:

«Ուկրաինական բանակը մեկ ամիս է անհավասար պայքար է մղում, և ես կրկնում եմ այն, ինչ մեկ ամիս է ասում եմ՝ մարդկանց կյանքը, մեր քաղաքները փրկելու համար Ուկրաինային ռազմական օգնություն է պետք, առանց սահմանափակումների»,- ասել է Վլադիմիր Զելենսկին՝ պնդելով, որ Պուտինը բնավ մտադիր չէ կանգ առնել Ուկրաինայում: Հաջորդը կլինեն Բալթյան երկրները, Լեհաստանը:

Ստոլտենբերգը գագաթնաժողովից հետո հանդես է եկել եզրափակիչ հայտարարությամբ: Նա ասել է, որ դաշնակիցները խստորեն դատապարտում են ռուսների ագրեսիան և այն համարում են Եվրատլանտյան անվտանգության դեմ ուղղված ամենամեծ սպառնալիքն անցած մի քանի տասնամյակում:

Ամերիկայի Միացյալ Նահանգները և Եվրոպական միությունը սահմանել են Ռուսաստանի նկատմամբ նոր պատժամիջոցներ: Ցուցակում ավելի քան 600 ֆիզիկական և իրավաբանական անձ է:

Սանկցիաների ցուցակում են «Սբերբանկի» ղեկավար Գերման Գրեֆը, Դոնբասի երկու ինքնահռչակ կազմավորումների «անկախության» օգտին քվեարկած Պետական դումայի 328 պատգամավորները և Պետական դուման՝ որպես կազմակերպություն:

Սանկցիաներով արգելվում են Ռուսաստանի Կենտրոնական բանկի հետ ոսկով գործառնությունները:

Գրեֆը նաև պատժամիջոցների բրիտանական ցուցակում է: Բացի այդ, բրիտանացիները սանկցիաներ են սահմանել գործարարներ Օլեգ Տինկովի և Եվգենի Շվինդլերի նկատմամբ:

Պատժամիջոցների ցուցակում է «Ռուսաստանի երկաթուղիներ» ընկերությունը, «Գազպրոմբանկը», «Ալֆա-Բանկը», Ավիացիոն նյութերի համառուսաստանյան ինստիտուտը, «Պաշտպանական նախաձեռնություններ» սահմանափակ պատասխանատվությամբ միավորումը:

Մեծ Բրիտանիայի վարչապետ Բորիս Ջոնսոնը հայտարարել է, որ Արևմուտքը պետք է սաստկացնի ճնշումը Մոսկվայի վրա և ավելացնի ռազմական օգնությունը Կիևին:

Ամերիկայի Միացյալ Նահանգների նախագահ Ջո Բայդենը մարտի 24-ին Բրյուսելում ասել է, որ կողմ է Ռուսաստանի արտաքսմանը «Մեծ 20»-ի խմբից:

Բայդենը միաժամանակ նշել է, որ Մեծ քսանյակի անդամներից ոչ բոլորն են կիսում այդ տեսակետը:

ԱՄՆ-ի նախագահի ազգային անվտանգության հարցերով խորհրդական Ջեյք Սալիվանն ավելի վաղ ասել է, թե Մեծ քսանյակից ռուսներին արտաքսելու վերաբերյալ հայտարարություններ հնչեցնելուց առաջ նախ հարցը պետք է դաշնակիցների հետ քննարկել:

Չինաստանի ԱԳՆ-ի պաշտոնական ներկայացուցիչ Վան Վենբինն ասել է, թե «Ռուսաստանը «Մեծ 20»-ի կարևոր անդամ է, և այդ ձևաչափի մյուս երկրներից ոչ մեկը չի կարող մեկ ուրիշ անդամի վտարել խմբից»:

Կրեմլի խոսնակ Դմիտրի Պեսկովը մարտի 23-ին ասել է, թե «Մեծ 20»-ը բազմակողմ կառույց է, և մի շարք երկրներ․ չնայած ԱՄՆ-ի ճնշումներին, Ռուսաստանի անդամության հարցում ունեն անկախ դիրքորոշում»: