Պատերազմ Ուկրաինայում (լայվ բլոգ, թարմացվող)

Ռուսական զինված ուժերի կողմից Մարիուպոլի դրամատիկական թատրոնի շենքի ռմբահարման հետևանքով զոհվել է մոտ 300 հոգի, հաղորդում է քաղաքային իշխանությունը։

«Ականատեսների վկայությամբ` շուրջ 300 հոգի զոհվել է ռուսական ռազմական օդանավի կողմից Մարիուպոլի դրամատիկական թատրոնի շենքի ռմբահարման հետևանքով»,- Telegram-ում հրապարակված քաղաքային իշխանության հաղորդագրությունը ներկայացնում է BBC-ին՝ հիշեցնելով, որ ցայսօր հնարավոր չէր որևէ թիվ հաղորդել զոհերի մասին:

Ռուսաստանի պաշտպանության նախարարությունը հայտնել է, թե մարտանավերը ծովից արձակած «Կալիբր» տեսակի գերճշգրիտ հրթիռների հարվածով ոչնչացրել են Կիևից ոչ հեռու գտնվող Ուկրաինայի բանակի վառելիքի պահեստը:

Գեներալ-մայոր Իգոր Կոնաշենկովի փոխանցմամբ՝ Ուկրաինայի տարածքի կենտրոնում տեղակայված բանակի ստորաբաժանումներն այդ պահեստից են վառելիք ստացել:

Մեծ Բրիտանիայի վարչապետ Բորիս Ջոնսոնն ասել է, թե իրեն նույնիսկ նվազագույն չափով չի կարելի հակառուս համարել: Այդպես նա արձագանքել է Կրեմլի այն մեկնաբանությանը, թե Բրիտանիայի վարչապետը հակառուսական դիրքորոշում ունեցող ամենաակտիվ արևմտյան լիդերն է:

«Ինչ վերաբերում է պարոն Ջոնսոնին, մենք նրան համարում ենք հակառուսական մրցավազքի ամենաակտիվ մասնակիցը», - «Նովոստի» լրատվական գործակալությանն ասել է Կրեմլի խոսնակ Դմիտրի Պեսկովը:

«Բոլորի համար շատ կարևոր է ըմբռնել, որ թե՛ ՆԱՏՕ-ի, թե՛ «Մեծ յոթնյակի» սեղանի շուրջ նստած ղեկավարներից և ոչ մեկը տրամադրված չէ Ռուսաստանի, կամ ռուս ժողովրդի դեմ, բացարձակ այդպես չէ, առնվազն իմ դեպքում, ես, թերևս, Բրիտանիայի պատմության ընթացքում միավ վարչապետն եմ, որին Բորիս են անվանել»,- ասել է Բորիս Ջոնսոնը:

ՆԱՏՕ-ն երեկ հաստատել է դաշինքի արևելյան թևը չորս մարտական հզոր միավորումներով ամրացնելու ծրագիրը․ լրացուցիչ ստորաբաժանումները կտեղակայվեն Բուլղարիայի, Հունգարիայի, Ռումինիայի և Սլովակիայի տարածքներում: Այդ մասին հայտնել է գլխավոր քարտուղար Յենս Ստոլտենբերգը:

Ընդհանուր հաշվով՝ ՆԱՏՕ-ն արևելյան ճակատում տեղակայել է 8 մարտական միավորումներ՝ Բալթյան ծովից մինչև Սև ծով:

Միացյալ Նահանգները խոստացել է 15 միլիարդ խորանարդ մետր հեղուկ գազ ուղարկել Եվրամիության շուկա: Այդպիսով Եվրոպան պետք է կրճատի ռուսական էներգակիրների ներկրման ծավալը:

Միացյալ Նահանգների նախագահ Ջո Բայդենը և Եվրոպական հանձնաժողովի նախագահ Ուրսուլա ֆոն դեր Լայենը Բրյուսելում հայտնել են, որ ստեղծվում է հատուկ աշխատանքային խումբ, որի նպատակն է Ուկրաինայի վրա Ռուսաստանի հարձակման կապակցությամբ նվազեցնել Եվրոպայի կախվածությունը ռուսական էներգակիրների մատակարարումից:

«Այսօր մենք համաձայնեցրել ենք համատեղ ծրագիրը, որի նպատակն է առաջ շարժվել դեպի ապահով և մաքուր էներգիա», - ասել է Բայդենը:

Ֆինլանդիայի VR Group երկաթուղային ընկերությունը մարտի 28-ից դադարեցնում է Հելսինքի-Սանկտ Պետերբուրգ երթուղին կատարող Allegro գնացքների աշխատանքը: Այդ մասին հայտնել է Helsingin Sanomat պարբերականը:

«Ռուսաստանի նկատմամբ սահմանված պատժամիջոցների կապակցությամբ Allegro գնացքների հետագա շահագործումն այլևս նպատակահարմար չէ: Մինչ օրս մենք շարունակել ենք աշխատեցնել այդ երթուղին, քանի որ պետք է ապահովեինք Ֆինլանդիայի քաղաքացիների վերադարձը հայրենիք: Այս շաբաթների ընթացքում նրանք, ովքեր մտադիր էին լքել Ռուսաստանը, հասցրել են դուրս մեկնել այդ երկրից», - ասել է VR Group ընկերության ուղևորափոխադրումների բաժնի տնօրեն Տոպի Սիմոլան:

Ուկրաինայի դեմ արդեն մեկ ամսից ավելի շարունակվող պատերազմի ընթացքում Ռուսաստանն այսօր երկրորդ անգամ տվյալներ է հրապարակել սեփական զոհերի մասին։

Ըստ Գլխավոր շտաբի, մինչ օրս ռուսական կողմից զոհվել է 1351 զինվորական, 3825-ը վիրավորվել են։

Կրեմլը պնդում է, թե ոչ մի լուրջ հարց չի ծագի, եթե Ռուսաստանը վտարվի աշխարհի տնտեսապես առավել զարգացած «Մեծ քսանի» խմբից: «Մեծ քսանի» անդամներ են 19 պետություններ և Եվրոպական միությունը որպես կազմակերպություն:

Նախագահ Վլադիմիր Պուտինի խոսնակ Դմիտրի Պեսկովն ասել է, թե այդ արշավի նախաձեռնողն, իհարկե, Միացյալ Նահանգներն է:

Ամերիկացի կինոբեմադրիչ, դերասան և պրոդյուսեր Շոն Փենն այսօր Լեհաստանում՝ Ռժեշուվ ավանում այցելել է ուկրաինացի փախստականների կենտրոն:

«Ես ունեմ ծրագիր՝ մասնակցել մեծ տոնակատարության, երբ Ուկրաինան հաղթի այս պատերազմում: Դա կլինի, նրանք դա կանեն, մենք չգիտենք, թե դեռ ինչքան սարսափելի կորուստներ, անիմաստ կորուստներ և ողբերգություններ կլինեն, բայց մենք գիտենք, որ ուկրաինացիները կհաղթեն»,- ասել է Փենը: