Պատերազմ Ուկրաինայում (լայվ բլոգ, թարմացվող)

Ուկրաինայի պատերազմի հետևանքով Ռուսաստանում աննախադեպ ավելացել է հակադեպրեսանտների և քնաբեր հաբերի սպառումը:

DSM Group միջազգային վերլուծական խմբի մոսկովյան մասնաճյուղը երեկ հրապարակել է զեկույց, որի համաձայն, մարդիկ երկու շաբաթում գնել են այնքան հակադեպրեսանտ և քնաբեր, որքան պատերազմից առաջ սովորաբար գնում էին մեկ ամսվա ընթացքում:

Ռուսաստանի արտաքին գերատեսչության ղեկավար Սերգեյ Լավրովն այսօր ասել է, թե երկրին հայտարարել են տոտալ հիբրիդային պատերազմ:

«Այսօր մեզ հայտարարել են իսկական հիբրիդային պատերազմ, «տոտալ պատերազմ», այդ եզրույթն են օգտագործել հիտլերական Գերմանիայում, և այն հիմա կիրառում են եվրոպացի գործիչներից շատերը, երբ ասում են, թե ինչ են ուզում անել Ռուսաստանի Դաշնության հետ: Նպատակները չեն թաքցնում և հրապարակավ են հնչեցվում՝ քանդել, ավերել, ոչնչացնել, խեղդել ռուսաստանյան տնտեսությունը և Ռուսաստանն ընդհանրապես»,- ասել է նախարարը:

Ամերիկայի Միացյալ Նահանգների նախագահ Ջո Բայդենը մարտի 25-ին Լեհաստանում ասել է, որ ի պատասխան Ուկրաինայի վրա հարձակման Վաշինգտոնը «Ռուսաստանի նկատմամբ սահմանել է պատմության ընթացքում երբևէ ընդունված ամենակոշտ պատժամիջոցները»:

Բայդենը՝ չմանրամասնելով, նշել է, որ առաջիկայում սանկցիաները դեռ կխստացվեն:

ԱՄՆ ղեկավարը Լեհաստանում այցելել է Ուկրաինայի հետ սահմանի մոտ գտնվող Ռժեշուվ ավան, որտեղ գտնվող մեծ պահեստ է հասցվում մարդասիրական օգնությունը և ռազմական նշանակության բեռն Ուկրաինայի բանակի համար:

Պատերազմի 31-րդ օրը Ռուսաստանի Զինված ուժերը նոր հրթիռային հարվածներ են հասցրել Կիևի մերձակա շրջաններին, ինչպես նաև մայրաքաղաքից արևմուտք գտնվող Ժիտոմիրի մարզի մի շարք բնակավայրերին։

Ուկրաինական աղբյուրների փոխանցմամբ՝ ինչպես և նախորդ մի քանի օրերին, այսօր ևս հարվածների թիրախներից են եղել Ուկրաինայի մայրաքաղաքի մերձակայքում գտնվող վառելիքի պահեստները։

Կիևին հասցված նոր հարվածների ֆոնին ուկրաինական մայրաքաղաքի վարչակազմը այսօր հաղորդել է Կիևում ևս մեկ 36-ժամյա պարետային ժամ հայտարարելու մասին։ Այն ուժի մեջ է մտնելու այսօր երեկոյան ժամը 8-ից և գործելու է մինչև երկուշաբթի առավոտյան ժամը 7-ը։

ԵՄ անդամ պետությունները հաստատակամ են ռուսական էներգակիրներից կախվածությունը նվազեցնելու հարցում։ Մի քանի ժամ շարունակված դռնփակ քննարկումներից հետո երեկ ուշ երեկոյան Բրյուսելում նման հայտարարությամբ են հանդես եկել դաշինքի ղեկավարները։

Եվրոպական կառույցներին մոտ կանգնած աղբյուրների համաձայն ԵՄ անդամ պետությունները նախօրեին մի փաստաթղթի նախագիծ են պատրաստել, որի համաձայն եվրոպական պետությունները շարունակելու են ջանքեր գործադրել Ռուսաստանում արդյունահանված գազից, նավթից և ածխից կախվածությունը նվազեցնելու նպատակով։

Վարշավայում այսօր կայացել է Միացյալ Նահանգների նախագահ Ջոզեֆ Բայդենի հանդիպումը Ուկրաինայի արտաքին գործերի նախարար Դմիտրի Կուլեբայի և պաշտպանության նախարար Ալեքսեյ Ռեզնիկովի հետ։

Սա ԱՄՆ նախագահի առաջին հանդիպումն է պաշտոնական Կիևի բարձրաստիճան ներկայացուցիչների հետ՝ փետրվարի 24-ին ռուսական ուժերի Ուկրաինա ներխուժումից ի վեր։

Հանդիպմանը ներկա են եղել նաև ԱՄՆ պետքարտուղար Էնթոնի Բլինքենը և Պենտագոնի ղեկավար Լոյդ Օսթինը։

Ուկրաինայում ծավալված ռազմական գործողությունների ընթացքում զոհված վրաց կամավորների թիվը հասել է չորսի։ Այսօր այդ մասին է հայտնել է երկրի հանրային հեռուստատեսությունը՝ վկայակոչելով Ուկրաինայում Վրաստանի դեսպան Գեորգի Զաքարաշվիլիին։

Դիվանագետի խոսքով` վրաց կամավորականը զոհվել է Կիևի մերձակայքում գտնվող Իրպեն քաղաքում։ Վրացական կողմի փոխանցմամբ` զոհված կամավորականի ինքնությունը հայտնի է, բայց առայժմ չի հանրայնացվում։

Միացյալ Նահանգների նախագահ Ջո Բայդենը Վարշավայում մարտի 26-ին ուկրաինացի փախստականների հետ հանդիպումից հետո Ռուսաստանի նախագահ Վլադիմիր Պուտինին անվանել է «դահիճ» (butcher):

Կրեմլի խոսնակ Դմիտրի Պեսկովն ասել է, թե Բայդենի վիրավորական մեկնաբանությունները սահմանափակում են երկու երկրների հարաբերությունները մեղմելու հնարավորությունը:

Եվրոպական ուղևորությունն ավարտող Միացյալ Նահանգների նախագահ Ջո Բայդենն այսօր Վարշավայում՝ Թագավորական ամրոցում ունեցած ելույթում աննախադեպ սուր քննադատության է ենթարկել Ռուսաստանի նախագահ Վլադիմիր Պուտինին:

«Ռուսաստանը երբեք չի հաղթի Ուկրաինայում, որովհետև ազատ մարդիկ հրաժարվել են ապրել անհուսության և խավարի աշխարհում: Մենք ունենք ուրիշ՝ ավելի լուսավոր և դեմոկրատիայի վրա հիմնված ապագա», - ասել է Բայդենը:

Միացյալ Նահանգների ղեկավարը հայտարարել է, որ ամերիկյան զորքերը Եվրոպայում են գտնվում ՆԱՏՕ-ի դաշնակիցներին պաշտպանելու, այլ ոչ թե ռուսական զինված ուժերի հետ առճակատվելու նպատակով: Բայդենի խոսքով՝ պաշտպանական դաշինքը երբեք չի փորձել խախտել Ռուսաստանի սահմանները:

ԱՄՆ նախագահն ասել է, որ Ռուսաստանը չի կարողանա հասնել այն նպատակներին, որոնք ծրագրել է փետրվարի 24-ին Ուկրաինայի վրա հարձակվելիս: