Պատերազմ Ուկրաինայում (լայվ բլոգ, թարմացվող)

Ուկրաինայի նախագահ Վլադիմիր Զելենսկին դիմել է արևմտյան երկրներին աջակցությունն ուժեղացնելու խնդրանքով: Նա ևս մեկ անգամ խնդրել է իր երկրին տրամադրել ինքնաթիռներ, տանկեր և հականավային զենքեր։

ԱՄՆ-ն ևս 100 մլն դոլար կհատկացնի Ուկրաինայի ոստիկանության և սահմանապահ ծառայության համար զրահատեխնիկա, սարքավորումներ, բժշկական պարագաներ գնելու համար, ասել է պետքարտուղար Էնթոնի Բլինկենը։

Լուգանսկի «ժողովրդական հանրապետությունում» հնարավոր է մոտ ապագայում հանրաքվե անցկացվի՝ Ռուսաստանի կազմում ներառվելու հարցով։ Այս մասին հայտարարել է Լուգանսկի ղեկավար Լեոնիդ Պասեչնիկը:

Թուրքիայի նախագահ Ռեջեփ Թայիփ Էրդողանի ավագ խորհրդական Իբրահիմ Քալընն ասել է, որ Թուրքիան և մյուս երկրներն Ուկրաինայի ճգնաժամը կարգավորելու համար պետք է պահպանեն երկխոսությունը Ռուսաստանի հետ:

«Եթե բոլորն այրեն կամուրջներն, ո՞վ ի վերջո պետք է խոսի Ռուսաստանի հետ: Ուկրաինան պետք է անհրաժեշտ օգնությունը ստանա պաշտպանվելու համար, սակայն Ռուսաստանի փաստարկները հարկ է լսել», - ասել է Թուրքիայի նախագահի խորհրդականը:

Անկարան պատերազմից առաջ և դրա մեկնարկից հետո բազմիցս հայտարարել է, որ ցանկանում է միջնորդի դեր կատարել և պատրաստ է Ռուսաստանի և Ուկրաինայի ղեկավարների հանդիպումներ կազմակերպել: Միաժամանակ Թուրքիան նշել է, որ չի միանում Ռուսաստանի դեմ պատժամիջոցներին:

Մոսկվայում և Սանկտ Պետերբուրգում կիրակի օրը ոստիկանությունը ձերբակալել է Ռուսաստանի իշխանությունների գործողությունների դեմ բողոքող միանձնյա պիկետների մի քանի մասնակիցների։

Մոսկվայի Կարմիր հրապարակում բերման է ենթարկվել Ալեքսանդր Սավինը, ով դուրս է եկել «Բոլորին չես բանտարկում. ազատություն քաղբանտարկյալներին» պաստառով։

Ակտիվիստ Քրիստինա Ռամիրեսին ձերբակալել են Մոսկվայում՝ նախագահի աշխատակազմի շենքի մոտ։ Նա մենահամերգ է կազմակերպել «Ոչ պատերազմ Ուկրաինայի հետ, ազատություն Ալեքսեյ Նավալնիին» պաստառով։ Նրա նկատմամբ բանակը վարկաբեկելու մասին վարչական հոդվածով արձանագրություն է կազմվել։

Թուրքիայի և Ռուսաստանի նախագահները հեռախոսազրույց են ունեցել՝ պայմանավորվելով ռուս-ուկրաինական բանակցությունների հաջորդ փուլն անցկացնել Ստամբուլում:

Թուրքիայի նախագահականի հաղորդմամբ, զրույցի ընթացքում ընդգծվել է Ուկրաինայում հրադադարի անհապաղ հաստատման և հումանիտար իրավիճակի բարելավման անհրաժեշտությունը: Ռեջեփ Թայիփ Էրդողանը Վլադիմիր Պուտինին ասել է՝ շարունակելու են ջանքերը այս գործընթացում:

Եվրամիության արտաքին քաղաքականության և անվտանգության հարվերով պատասխանատու Ժոզեպ Բորելը մարտի 27-ին ասել է, որ եվրոպական երկրները կարող են առաջիկայում հրաժարվել ռուսական գազի մատակարարումներից:

«Երկու տարում Եվրոպան կհրաժարվի ռուսական գազից»,- ասել է Բորելը Sky News Arabia հեռուստակայանի թղթակցին:

Եվրամիության բարձր ներկայացուցիչը նշել է, որ եվրոպական երկրները փորձում են դիվերսիֆիկացնել բնական վառելիք ներկրելու աղբյուրները և նվազեցնել կախվածությունը ռուսական էներգակիրներից, «բայց չարգելել դրանք»:

Ժոզեպ Բորելը նաև ասել է, թե Եվրոպան ցանկանում է ստեղծել հատուկ բանակ, որը պետք է հակազդի ընդհանուր մարտահրավերներին

Բարձր ներկայացուցչի փոխանցմամբ, Եվրոպան բախվել է աննախադեպ դժվարության՝ Ուկրաինայից միլիոնավոր փախստականների ալիքին: Նա նշել է, որ «փախստականների կարիքները հոգալու բեռը կիսելու են Եվրոպայի բոլոր երկրները»:

Ուկրաինայի չեզոք կարգավիճակի, ՆԱՏՕ-ին անդամակցելուց հրաժարվելու հարցում Կիևը պատրաստ է համաձայնել։ Այդ մասին հայտարարել է Ուկրաինայի նախագահ Վլադիմիր Զելենսկին ռուսական մի շարք լրատվամիջոցների տված հարցազրույցում։ Նման գործընթաց սկսելու հիմնական պայմանը ռուսական զորքերի դուրսբերումն է, ասել է նա։

Բացի այդ, Ուկրաինայի նախագահը պնդում է, որ սրա հետ մեկտեղ մի շարք երկրների առաջնորդներ պետք է երաշխավորեն իր երկրի անվտանգությանը։ Ընդ որում, այդ երաշխիքները ոչ թե պարզապես պետք է գրվեն թղթի վրա, այլ նաև վավերացվեն երաշխավոր երկրների խորհրդարանների կողմից։ Բացի այդ, Ուկրաինայում պետք է համապատասխան հանրաքվե անցկացվի։

Պատասխանելով հարցին, թե այս փուլում ինչպես կձևակերպեր Ուկրաինայի ռազմական նպատակը և ինչպես է պատկերացնում ռազմական հաղթանակը, Զելենսկին հայտարարել է՝ անհրաժեշտ է հնարավորինս նվազեցնել զոհերի թիվը, դուրս բերել զորքերը Ուկրաինայից։ Ընդ որում, Ուկրաինայի նախագահն ընդգծում է, թե համաձայն է, որ ռուսական կողմը թողնի զորքերը մինչև փետրվարի 24-ը ինքնահռչակ հանրապետությունների կողմից վերահսկվող տարածքում․ - «Ես հասկանում եմ, որ անհնար է ստիպել Ռուսաստանին ամբողջությամբ ազատել տարածքը, դա կբերի երրորդ համաշխարհային պատերազմի… Ուստի ես ասում եմ՝ սա փոխզիջում է․ վերադարձեք այնտեղ, որտեղից ամեն ինչ սկսվեց, և այնտեղ մենք կփորձեք լուծել Դոնբասի բարդ հարցը»։

Ռուսական զորքերի կողմից պաշարված Մարիուպոլում հումանիտար աղետի մասշտաբները պահանջում են միջազգային հանրության անհապաղ միջամտություն, հայտարարել է Ֆրանսիայի արտաքին գործերի նախարար Ժան-Իվ Լը Դրիանը։

«Պարզ է, որ Մարիուպոլը դարձել է երկրորդ Հալեպը», - ասել է Լը Դրիանը:

«Ռազմական պաշարումը պատերազմ վարելու սարսափելի միջոց է, որովհետև տեղի է ունենում խաղաղ բնակչության զանգվածային կոտորած և ոչնչացում։ Տառապանքն ուղղակի սարսափելի է», - եզրափակել է նա։