Պատերազմ Ուկրաինայում (լայվ բլոգ, թարմացվող)

Ստամբուլում Դոլմաբահչեի նախագահական գրասենյակում մեկնարկել են Ռուսաստանի և Ուկրաինայի պատվիրակությունների բանակցությունները:

Anadolu լրատվական գործակալության փոխանցմամբ, հանդիպումից առաջ պատվիրակություններին ողջունել է Թուրքիայի նախագահը՝ հայտարարելով, որ շատ գոհ են բանակցությունները հյուրընկալելու և խաղաղության հաստատման ճանապարհին ներդրում ունենալու համար: Ռեջեփ Թայիփ Էրդողանը հաջողություն է մաղթել պատվիրակներին:

Ռոման Աբրամովիչը գտնվում է Դոլմաբահչեի պալատում, որտեղ ընթանում են ռուս-ուկրաինական բանակցությունները։

Ուկրաինայի նախագահ Վլադիմիր Զելենսկին երեկ ուշ երեկոյան իր տեսաուղերձում հայտնել է, որ ուկրաինական ուժերը Կիևի մարզի որոշ շրջաններ հետ են վերցրել։ Իրպեն քաղաքը ազատագրվել է։

«Այսօր մենք լավ լուր ունենք։ Մեր պաշտպանները առաջ են շարժվում Կիևի մարզում՝ վերականգնելով ուկրաինական տարածքների վրա վերահսկողությունը։ Իրպենը ազատագրվել է»,- հայտարարել է նա։

Զելենսկին նշել է, որ Կիևից հյուսիս ընկած շրջանները դեռ գտնվում են ռուսական ուժերի վերահսկողության տակ։ Չեռնիգովի, Սումիի, Խարկովի մարզերում, Դոնբասում, երկրի հարավում իրավիճակը մնում է լարված և շատ ծանր։

Ռուսաստանի պաշտպանության նախարարության մամուլի խոսնակ գեներալ Իգոր Կոնաշենկովն այսօր ասել է, որ երեկ երեկոյան թևավոր հրթիռների ճշգրիտ հարվածներով Ուկրաինայի Ռովնոյի մարզում ոչնչացվել է վառելիքի մեծ բազա, որտեղից վառելիք էր մատակարարվում Կիևի մարզի ուկրաինական զորքերին։

Նա նաև հայտնել է, որ հակաօդային պաշտպանության համակարգերը ուկրաինական ուժերի երեք անօդաչու թռչող սարք են ոչնչացրել։

Վերջին շրջանում ռուսական ուժերն Ուկրաինայում թիրախավորում են վառելիքի բազաներն ու պահեստները՝ կտրելով ուկրաինական բանակի սնուցման աղբյուրները։

Ռուսական բանակը որոշել է կտրուկ նվազեցնել ռազմական ակտիվությունը Կիևի ու Չեռնիգովի մերձակայքում. ըստ ՏԱՍՍ-ի, հայտարարել է պաշտպանության փոխնախարար Ալեքսանդր Ֆոմինը։

Ուկրաինայի հետ բանակցություններում ռուսական պատվիրակության ղեկավար Վլադիմիր Մեդինսկին էլ նշել է, թե Մոսկվան քայլեր է անում լարվածությունը թուլացնելու ուղղությամբ։ Հայտարարությունները հնչել են կողմերի միջև այսօր Ստամբուլում կայացած բանակցություններից հետո։

Նախագահներ Պուտինն ու Զելենսկին կարող են հանդիպել խաղաղության համաձայնագրի նախաստորագրման ժամանակ, այսօր Ստամբուլում կայացած ռուս-ուկրաինական բանակցություններից հետո հայտարարել է ռուսական կողմի գլխավոր բանագնաց Վլադիմիր Մեդինսկին։

«Այսօրվա բովանդակալից հանդիպումից հետո համաձայնեցրել ենք և առաջարկում ենք լուծում, որով նախագահների հանդիպումը հնարավոր է՝ համաձայնագրի նախաստորագրման հետ», - ասել է Ռուսաստանի նախագահի օգնականը։

Ուկարինական պատվիրակության անդամ Դավիդ Արախամիան մինչդեռ պնդել է, թե Կիևը պահանջում է, որ այդ փաստաթուղթը լինի միջազգային և այն ստորագրեն ու վավերացնեն Ուկարինայի անվտանգության բոլոր երաշխավորները։

Ռուսաստանի պաշտպանության նախարար Սերգեյ Շոյգուն այսօր հեռախոսային կոֆերանս-կապով անցկացված խորհրդակցության ժամանակ ասել է, որ Ուկրաինայում «ռազմական հատուկ գործողության» առաջին փուլի խնդիրները հիմնականում կատարվել են՝ մարտական գործողությունների 33 օրվա ընթացքում ռուսական օդուժը գերիշխել է Ուկրաինայում, ոչնչացվել է ուկրաինական ռազմական օդանավերի մեծ մասը, մեծ քանակի հակաօդային պաշտպանության համակարգեր, և նրա խոսքերով՝ հիմա ռուսական ուժերը կարող են կենտրոնանալ Դոնբասի «ազատագրման վրա»։

Ստամբուլում ռուս-ուկրաինական բանակցությունների հերթական հանդիպումն ավարտվել է մեկնարկից երեք ժամ անց, չնայած նախապես հայտարարվել էր, որ բանակցությունները երկու օր են տևելու։ Դեռևս հայտնի չէ, թե երբ է անցկացվելու հաջորդ փուլը։

Այսօրվա հանդիպումից հետո Ուկրաինայի պատվիրակության անդամները հայտնել են, որ քննարկվել է Ուկրաինայի անվտանգության միջազգային երաշխիքների հարցը՝ երկրի չեզոք կարգավիճակի դեպքում։ Երաշխավոր հանդիսացող երկրները ագրեսիայի դեպքում պետք է Ուկրաինային ռազմական օգնություն ցուցաբերեն։ Միջազգային երաշխիքները առաժմ չեն տարածվելու Ղրիմի և Ուկրաինայի վերահսկողություից դուրս գտնվող Դոնբասի շրջանների վրա։

Ռուսաստանի նախագահի մամուլի խոսնակ Դմիտրի Պեսկովը PBS-ին անցած երկուշաբթի տված հարցազրույցում ասել է, որ Ռուսաստանը միջուկային զենք կօգտագործի միայն Ռուսաստանի գոյությանը սպառնալիքի դեպքում, որպեսզի վերացվի այդ սպառնալիքը։

Նա նշել է, որ Ուկրաինայում ռազմական գործողության որևէ արդյունք, «իհարկե, առիթ չէ միջուկային զենք օգտագործելու համար»։

Այսօր ռուսական ուժերը հրթիռակոծել են Նիկոլաև քաղաքի վարչակազմի շենքը, որի հետևանքով առնվազն յոթ մարդ է զոհվել, 22-ը` վիրավորվել, հայտնում են քաղաքային իշխանությունները։ Վիրավորներից 18-ին փրկարարները դուրս են հանել փլատակների տակից։