Պատերազմ Ուկրաինայում (լայվ բլոգ, թարմացվող)

Human Rights Watch-ը Ուկրաինային կոչ է անում հետաքննել ենթադրյալ ռազմական հանցագործությունները։

Հեղինակավոր իրավապաշտպան կազմակերպության հայտարարությունը հաջորդում է շրջանառվող տեղեկություններին, տեսանյութերին, որոնց համաձայն՝ ուկրաինացի զինվորները խոշտանգում են գերության մեջ գտնվող ռուս զինվորներին։

«Ուկրաինան պետք է ցույց տա, որ ի վիճակի է և ցանկանում է կանխել և պատժել միջազգային մարդասիրական իրավունքի լուրջ խախտումները», - հայտարարել է Human Rights Watch-ը։

Թուրքիայի համար առաջնահերթություն է մնում Ռուսաստանի և Ուկրաինայի նախագահներ Վլադիմիր Պուտինի և Վլադիմիր Զելենսկու հանդիպման կազմակերպումը։ Այս մասին ուրբաթ օրը հայտարարել է Թուրքիայի նախագահ Ռեջեփ Էրդողանը ռուսաստանցի պաշտոնակցի հետ հեռախոսազրույցի ժամանակ։

Չեխ դիվանագետների անունից Չեխիայի արտգործնախարարությունը բաց նամակ է հրապարակել, որում ռուսաստանցի դիվանագետներին կոչ են անում դադարել աջակցել Ուկրաինայում պատերազմին:

«Ձեզնից շատերը երևի արդեն գիտակցում են, որ պետության ղեկավարությունը ձեզ խաբել է Ուկրաինայի պատերազմի հետ կապված»,- գրում են չեխ դիվանագետները՝ կարծիք հայտնելով, որ Ռուսաստանին սպառնում է «կտրուկ անկում դեպի անցյալի խավար»։

Ամերիկայի Միացյալ Նահանգների պետական քարտուղար Էնթոնի Բլինքենը և Մեծ Բրիտանիայի արտաքին գործերի նախարար Լիզ Թրասը հեռախոսով քննարկել են Ուկրաինայի վրա հարձակման համար Ռուսաստանի նկատմամբ նոր պատժամիջոցներ սահմանելու հարցը:

Այդ մասին հայտնել է Միացյալ Նահանգների պետական դեպարտամենտի մամլո խոսնակ Նեդ Փրայսը:

Նրա փոխանցմամբ, Բլինքենը և Թրասն ընդգծել են «Ուկրաինային աջակցելու և Ռուսաստանի գործողությունները սատարողների դեմ արագ և նշանակալի քայլերի իրականացումը կարգավորելու կարևորությունը»:

Ամերիկայի Միացյալ Նահանգների պետական քարտուղարի քաղաքական հարցերով տեղակալ Վիկտորիա Նուլանդն ապրիլի 2-ից 9-ը կայցելի Ֆրանսիա, Թուրքիա, Հունաստան, Կիպրոս և Գերմանիա:

Այցերի ընթացքում Նուլանդը քննարկելու է Ուկրաինայի պատերազմի և Ռուսաստանի նկատմամբ պատժամիջոցների հարցերը: Այդ մասին հայտնել է ԱՄՆ-ի պետական դեպարտամենտի մամլո ծառայությունը:

Ուկրաինայի Զինված ուժերի գլխավոր շտաբը առաջին անգամ մտահոգություն է հայտնել, որ Ռուսաստանը Ուկրաինայի դեմ կարող է օգտագործել Մոլդովայի Մերձդնեստրի շրջանում տեղակայված ռուսական զորախումբը։

Ուկրաինայի այսօրվա իրավիճակի մասին Ալեքսանդր Շպուտունն ասել է, որ Ռուսաստանը զորքերը դուրս է բերում Ուկրաինայի որոշ շրջաններից՝ հավանաբար այլ ուղղություններով կենտրոնացնելու համար։

Եվրամիության առաջնորդները՝ Եվրոպական խորհրդի նախագահ Շառլ Միշելը, Եվրահանձնաժողովի ղեկավար Ուրսուլա ֆոն դեր Լայենը և ԵՄ արտաքին քաղաքականության հարցերով բարձր հանձնակատար Ժոզեպ Բորելը ուրբաթ օրը տեսակապի միջոցով բանակցել են Չինաստանի նախագահ, Չինաստանի կոմունիստական կուսակցության առաջնորդ Սի Ծինփինի հետ՝ ակնկալելով Պեկինի աջակցությունը Ուկրաինայում պատերազմը դադարեցնելու համար։

Պեկինը հայտարարում է, որ հակամարտ կողմերից ոչ մեկին չի պաշտպանում, միաժամանակ ընդգծելով իր անսահմանափակ գործընկերությունը Ռուսաստանի հետ և հրաժարվում է:

Թուրքիան առաջարկել է նավերով տարհանել ռուսական ուժերի կողմից պաշարված Մարիուպոլ քաղաքում մնացած խաղաղ բնակիչներին։ Թուրքիայի պաշտպանության նախարար Հուլուսի Աքարը այսօր ասել, որ Անկարայի պատրաստակամության մասին տեղեկացվել է Թուրքիայում Ռուսաստանի ռազմական կցորդին։

Պաշարված Մարիուպոլում, ուկրաինական կողմի տվյալներով, դեռ մոտավորապես 150 մարդ կա։ Նրանց ցամաքով տարհանելու փորձերը ձախողվում են։ Քաղաքում փողոցային մարտերը չեն դադարել։

ԱՄՆ-ի պաշտպանության նախարարությունը հայտարարել է, որ ևս 300 միլիոն դոլարի զենք կպատվիրի Ուկրաինայի համար։

Ըստ Պենտագոնում հավատարմագրված «Ռոյթերսի» թղթակցի՝ ռազմական օգնության նոր թափեթում կլինեն լազերային նշանառության հրթիռներ, հարվածային և հետախուզական անօդաչու թռչող սարքեր, դրոնների դեմ պայքարի միջոցներ, գնդացիրներ, զինամթերք, դեղորայք և արբանյակային հետախուզության համար կոմերցիոն վճարումներ։

Լրագրողներն ու ուկրաինական իշխանությունների ներկայացուցիչները հայտնել են Կիևից հյուսիս-արևմուտք գտնվող Բուչա քաղաքի փողոցներում տասնյակ զոհվածների մասին։

Քաղաքացիական հագուստով մարդկանց լուսանկարները` երբեմն ձեռքերը կապած, հրապարակել են Reuters-ը, AFP-ն: 16 մահացած մարդ, ըստ AFP-ի, պառկած է մայթեզրին, մի քանիսը` ճանապարհին:

Ուկրաինայի նախագահի գրասենյակի խորհրդական Միխայիլ Պոդոլյակը ենթադրում է, որ լուսանկարներում պատկերված մարդիկ սպանվել են ռուս զինվորականների կողմից։ «Փողոցներում ձեռքերը կապած մարդկանց դիեր են, որոնց գնդակահարել են ռուս զինվորները, այդ մարդիկ զինվոր չեն եղել, զենք չեն ունեցել, ոչ մի վտանգ չեն ներկայացրել, էլի քանի՞ նման դեպք է կատարվում այս պահին օկուպացված տարածքներում»,- գրել է Պոդոլյակը։