Պատերազմ Ուկրաինայում (լայվ բլոգ, թարմացվող)

Եվրամիությունը պատրաստվում է Ռուսաստանի դեմ նոր պատժամիջոցների, կիրակի օրը հայտարարել է Եվրոպական խորհրդի նախագահ Շառլ Միշելը։

Բացի այդ, ԵՄ բարձրաստիճան պաշտոնյան գործարկել է #Bucha Massacre հեշթեգը` կից գրելով, որ ցնցված է Կիևի ազատագրված շրջանում ռուսական բանակի կողմից իրականացված վայրագությունների սարսափելի պատկերներից:

ՄԱԿ-ի Անվտանգության խորհուրդը երկուշաբթի օրը կքննարկի Ուկրաինայում ստեղծված իրավիճակը:

Ենթադրվում է, որ քննարկումները տեղի կունենան Նյու Յորքի ժամանակով օրվա առաջին կեսին: Նիստի ստույգ օրակարգի մասին տեղեկություններ չեն հրապարակվել:

Այս տարվա ապրիլին ՄԱԿ-ի Անվտանգության խորհրդում հերթագայության կարգով նախագահում է Մեծ Բրիտանիան:

Գերմանիայի կանցլեր Օլաֆ Շոլցը կոչ է արել քննել և ամբողջությամբ բացահայտել Ուկրաինայի Բուչա անվամբ բնակավայրում տեղի ունեցած դեպքերը:

«Խաղաղ բնակիչների սպանությունը պատերազմի հանցագործություն է: Ես պահանջում եմ միջազգային կազմակերպություններին, մասնավորապես՝ Կարմիր խաչի միջազգային կոմիտեին, թույլ տալ այցելել այդ շրջան», - ասել է կանցլերը:

Ուկրաինական կողմը պնդում է, որ ռուսաստանցի զինծառայողները բնակիչների են գնդակահարել: Ռուսները պնդում են, որ խաղաղ բնակիչների չեն գնդակահարել, և զարմանք են հայտնում այն կապակցությամբ, որ ուկրաինացիները «միայն երեք օր անց են բարձրաձայնում խաղաղ բնակիչների սպանության հարցը»:

Միացյալ Նահանգներն առաջիկայում նոր պատժամիջոցներ կսահմանի Ռուսաստանի ղեկավարների նկատմամբ:

Պետդեպարտամենտի մամլո խոսնակ Նեդ Փրայսի փոխանցմամբ՝ Վաշինգտոնը շարունակում է Ուկրաինայի վրա հարձակման համար Վլադիմիր Պուտինին և նրա շրջապատին հետզհետե ավելի ծանր ճնշումների ենթարկելու քաղաքականությունը:

Ռուսաստանի արտաքին գործերի նախարարության մամլո վարչության ղեկավար Մարիա Զախարովան հայտարարել է, որ ռուսաստանցի դիվանագետների արտաքսումը «վկայում է Ռուսաստանի Դաշնությանը պատժելու Արևմուտքի գործելակերպի մասին»:

«Դա ճգնաժամի առաջացման համար մեզ մեղադրելու և այդպես Ռուսաստանին քաղաքականապես պատժելու՝ հավաքական Արևմուտքի ցուցադրական դիրքորոշումն է», - ասել է Զախարովան:

Ուկրաինայում պատերազմի հետևանքով զոհված և վիրավորված երեխաների թիվը շարունակում է աճել։ Երկրի գլխավոր դատախազությունը Telegram-ի իր ալիքում հայտնում է, որ զոհված երեխաների թիվը հասել է 161-ի, վիրավորվածներինը՝ 264-ի։

Երեխաներն ամենաշատը տուժել են Դոնեցկի և Կիևի մարզերում։ Ռմբակոծությունների և հրետակոծությունների հետևանքով տուժել է 869 ուսումնական հաստատություն, որոնցից 83-ն ամբողջությամբ ավերվել է։

Ուկրաինայի նախագահ Վլադիմիր Զելենսկին կոչ է անում ամերիկյան շոու բիզնեսի ներկայացուցիչներին՝ աջակցել Ուկրաինային։ Այս մասին ուկրաինական պետության ղեկավարը հայտարարեց անցած գիշեր՝ դիմելով ամերիկյան երաժշտական աշխարհի ամենահեղինակավոր ամենամյա մրցանակաբաշխության՝ Grammy-ի մասնակիցներին։

«Ես կոչ եմ անում ձեզ՝ պատմել պատերազմի մասին ճշմարտությունը սոցիալական ցանցերի ձեր օգտահաշիվներում և հեռուստատեսության եթերում։ Աջակցեք հնարավոր ցանկացած ձևով, բայց մի լռեք։ Միայն այդ դեպքում է, որ հնարավոր կլինի խաղաղություն հաստատել այն բոլոր ուկրաինական քաղաքներում, որոնք այսօր ենթարկվում են ավերածությունների», - հայտարարում էր Զելենսկին։

Ռուսաստանի ՊՆ այսօր հաղորդել է Ուկրաինայի տարածքում գտնվող ռազմական օբյեկտներին հասցված նոր հարվածների մասին։ Ռուսաստանի ռազմական գերատեսչության պաշտոնական ներկայացուցիչ, գեներալ-մայոր Իգոր Կոնաշենկովի խոսքով՝ հարվածների հիմնական թիրախները եղել են Դոնբասում և Սև ծովի ափամերձ գոտում։