Պատերազմ Ուկրաինայում (լայվ բլոգ, թարմացվող)

Ուկրաինայի նախագահ Վլադիմիր Զելենսկին ելույթ կունենա ՄԱԿ-ի Անվտանգության խորհրդի նիստում: Այն անցկացվելու է այսօր և նվիրված կլինի Ուկրաինային, կքննարկվեն նաև Բուչայում տեղի ունեցած սպանությունները:

Ուկրաինայի ղեկավարն արդեն տեսակապով ելույթ է ունեցել ավելի քան մեկ տասնյակ խորհրդարանների դիմաց, այդ թվում՝ ԱՄՆ Կոնգրեսի, Մեծ Բրիտանիայի խորհրդարանի և Եվրախորհրդարանի:

Ամերիկացի 44 կոնգրեսականներ՝ Հանրապետական և Դեմոկրատական կուսակցություններից, երեկ դիմել են նախագահ Ջո Բայդենին՝ կոչ անելով արձագանքել Ուկրաինայի նախագահ Վլադիմիր Զելենսկու խնդրանքին և ընդլայնել զենքի մատակարարումները Ուկրաինա։

Կոնգրեսականները հիշեցրել են, որ Ուկրաինան արդեն նշել է իրեն անհրաժեշտ սպառազինությունների հիմնական տեսակները, և կոչ են արել մատակարարել Կիևին նաև «երկիր-օդ» հեռահար հրթիռներ, կործանիչներ ու հականավային հրթիռներ:

Ռուսաստանն այս պահին, ամենայն հավանականությամբ, փոխում է նպատակները, որոնց մտադիր էր հասնել Ուկրաինայում պատերազմի ընթացքում։ Այս մասին երկուշաբթի ուշ երեկոյան հայտարարել է ԱՄՆ նախագահի ազգային անվտանգության հարցերով խորհրդական Ջեյք Սալիվանը։

Սպիտակ տան բարձրաստիճան պաշտոնյայի խոսքով՝ Ռուսաստանը հարձակողական գործողությունները կկենտրոնացնի Ուկրաինայի արևելքում և հարավում՝ Դոնեցկի և Լուգանսկի շրջաններում, փորձելով ավելի մեծ տարածքներ գրավել Դոնբասում, «որպեսզի քողարկի նախորդած ռազմական ձախողումները»։

Փարիզում Ռուսաստանի դեսպան Ալեքսեյ Մեշկովին այսօր կանչել են Ֆրանսիայի արտգործնախարարություն, հաղորդում է BFMTV հեռուստաալիքը՝ վկայակոչելով դիվանագիտական աղբյուրները։

Ըստ նույն աղբյուրի՝ դեսպանին տեղեկացնելու են Ֆրանսիայից ռուս դիվանագետների խմբի վտարման մասին, որոնց գործունեությունը Փարիզը դիտել է որպես պետության անվտանգությանը սպառնալիք։

Եվրահանձնաժողովի նախագահ Ուրսուլա ֆոն դեր Լայենը և Եվրամիության դիվանագիտության ղեկավար Ժոզեպ Բորելը կայցելեն Կիև։

Եվրահանձնաժողովի մամլո խոսնակ Էրիկ Մամերի փոխանցմամբ՝ այցը տեղի կունենա այս շաբաթ, Եվրամիության բարձրաստիճան պաշտոնյաները Կիևում կհանդիպեն Ուկրաինայի նախագահ Վլադիմիր Զելենսկու հետ, ապրիլի 9-ին Վարշավայում կմասնակցեն Ուկրաինային նվիրված միջոցառման։

Այլ մանրամասներ չեն հաղորդվում։

Վլադիմիր Զելենսկին հայտարարել է, որ Վլադիմիր Պուտինի հետ դեմ առ դեմ հանդիպումը «կարող է տեղի չունենալ», սակայն նույնիսկ Բուչայի ողբերգությունից հետո անհրաժեշտ է շարունակել Մոսկվայի հետ բանակցությունները։

Ուկրաինայի նախագահը Բուչայում տեղի ունեցածն անվանել է «մեծ ողբերգություն» և «ցեղասպանություն»՝ վստահություն հայտնելով, որ բոլոր ռազմական հանցագործները կպատժվեն։

Եվրոպական մի շարք երկրներ արտաքսում են տասնյակ ռուսաստանցի դիվանագետների։ Գերմանիան՝ 40, Իտալիան՝ 30, Շվեդիան՝ 3, Դանիան՝ 15, Իսպանիան՝ 25 ռուսաստանցի դիվանագետների են արտաքսում։

Ավելի վաղ նման որոշում է կայացրել նաև Ֆրանսիան, Լիտվան ու Լատվիան էլ արտաքսել են Ռուսաստանի դեսպաններին։ Լատվիան նաև հայտարարել է Մոսկվայից իր դեսպանի հետկանչի մասին։

Ղազախստանը չի ճանաչում Ուկրաինայի արևելքում գտնվող Դոնեցկի և Լուգանսկի ինքնահռչակ հանրապետությունները, հայտարարել է երկրի արգործնախարար Մուխթար Թլեուբերդին։

«Այս պահին մենք չենք ճանաչում ո՛չ Լուգանսկի ժողովրդական հանրապետությունը, ո՛չ Դոնեցկի հանրապետությունը», - «Ազատության» ղազախական ծառայության հետ զրույցում ասել է Թլեուբերդին, միևնույն ժամանակ հավելել, որ Նուրսուլթանը չի պատրաստվում նաև միանալ Ռուսաստանի դեմ պատժամիջոցներին։

Ուկրաինայի նախագահ Վլադիմիր Զելենսկին ապրիլի 5-ին հատուկ ուղերձով դիմել է ՄԱԿ-ի Անվտանգության խորհրդի նիստին և կոչ է արել փոխել աշխարհում անվտանգային համակարգը:

Բացի այդ, Ուկրաինայի ղեկավարն ասել է, որ անհրաժեշտ է անհապաղ բարեփոխել ամբողջ Միավորված Ազգերի Կազմակերպության համակարգը:

«Եթե այս իրավիճակը շարունակվի, ապա երկրներն իրենց անվտանգությունն ապահովելու հարցում կսկսեն ապավինել միայն զենքի ուժին: Այդ դեպքում ՄԱԿ-ը կարելի կլինի ընդհանրապես փակել», - ասել է Զելենսկին: - «Պետք է իրականացնել այնպիսի բարեփոխում, որ ՄԱԿ-ի Անվտանգության խորհրդում վետոյի իրավունքը չդառնա սպանելու իրավունք»:

ՄԱԿ-ում Ռուսաստանի մշտական ներկայացուցիչ Վասիլի Նեբենզյան պնդել է, թե ռուսական բանակն Ուկրաինայում խաղաղ բնակիչների կյանքը խնայելու համար հարվածներ չի հասցնում քաղաքացիական օբյեկտներին:

«Մենք ձեզ մոտ ենք եկել ոչ թե ուկրաինական տարածքը գրավելու, այլ Դոնբաս խաղաղություն բերելու համար», - ասել է Նեբենզյան՝ դիմելով Զելենսկուն: