Պատերազմ Ուկրաինայում (լայվ բլոգ, թարմացվող)

Եվրամիության արտաքին քաղաքականության հարցերով հանձնակատար Ժոզեպ Բորելը հայտնել է, որ առաջիկա օրերին Եվրահանձնաժովի ղեկավարի հետ այցելելու են Կիև՝ հանդիպելու Ուկրաինայի նախագահին և պաշտպանության նախարարին։

Ուկրաինայի նախագահի մամուլի խոսնակ Սերգեյ Նիկիֆորովը ազգային հեռուստատեսությամբ ասել է, որ նախագահ Վլադիմիր Զելենսկին ուրբաթ օրը Կիևում բանակցելու է Եվրահանձնաժողովի ղեկավար Ուրսուլա ֆոն դեր Լայենի հետ։ Նա ասել է, որ Եվրամիության արտաքին քաղաքականության հարցերով հանձնակատար Ժոզեպ Բորելը ևս այս շաբաթվա ընթացքում այցելելու է Կիև։

Ուկրաինացի հազարավոր փախստականներ հասել են նաև Մեքսիկա։ Կալիֆորնիային սահմանակից Տիխուանա քաղաքում նրանք սպասում են սահմանը հատելու և Միացյալ Նահանգներ մտնելու ժամին։

ՄԱԿ-ի տվյալներով՝ Ռուսաստանի ներխուժումից հետո Ուկրաինայում 10 միլիոն մարդ տեղահանվել է մշտական բնակության վայրից, որոնցից 4 միլիոնը դուրս է եկել երկրից, մեծ մասը ապաստանել է հարևան Լեհաստանում։

Ռուսաստանի պաշտպանության նախարարության մամուլի խոսնակ, գեներալ Իգոր Կոնաշենկովը այսօր ասել է, որ անցած գիշերը ռուսական ուժերը օդային և ծովային տեղակայման սպառազինություններից հրթիռակոծել են Ուկրաինայի բանակի վառելիքի չորս բազաները՝ Նիկոլաևում, Զապորոժիեում, Խարկովում և Չուգուևում։

Ամենօրյա հաղորդագրությունում նա հայտնել են, որ անցած մեկ օրվա ընթացքում թիրախավորվել է ուկրաինական 29 ռազմական օբյեկտ։

Ուկրաինայի Զինված ուժերի այսօր ներկայացրած տվյալների համաձայն՝ պատերազմի սկզբից ի վեր Ուկրաինայում առնվազն 18 հազար 900 ռուսաստանցի զինվոր է զոհվել։ Ոչնչացվել է շուրջ երեք հազար զինտեխնիկա՝ տանկեր, զրահամեքենաներ, օդանավեր, ուղղաթիռներ։

Ռուսաստանի արտգործնախարար Սերգեյ Լավրովն այսօր ասել է, որ բանակցային խմբում Ուկրաինան ապրիլի 6-ին համաձայնության նոր նախագիծ է ներկայացրել, որտեղ, նրա խոսքերով՝ ակնհայտորեն նահանջ կա Ստամբուլում մարտի 29-ի հանդիպմանը ամրագրված կարևոր դրույթներից։

«Ընդ որում, փաստաթղթով ամրագրված, որտեղ կա ուկրաինական պատվիրակության ղեկավար Արախամիի ստորագրությունը»,- նշել է Լավրովը։

Ռուսաստանի նախագահ Վլադիմիր Պուտինը Անվտանգության խորհրդի մշտական անդամների հետ այսօր նիստ է անցկացրել՝ քննարկելով Ուկրաինայում «հատուկ գործողության» ընթացքը, ինչպես նաև ռուսական և ուկրաինական պատվիրակությունների միջև բանակցային գործընթացը, հայտնել է Կրեմլի խոսնակ Դմիտրի Պեսկովը։

ՄԱԿ-ի Գլխավոր վեհաժողովը երեկ որոշեց դադարեցնել Ռուսաստանի անդամակցությունը Մարդու իրավունքների խորհրդին՝ Ուկրաինայի դեմ ռազմական հարձակման, և ռուս զինվորականների կողմից «մարդու իրավունքների կոպիտ և համակարգված խախտումների համար»։

Ռուսաստանի դեմ ներկայացված բանաձևին հավանություն են տվել կառույցի անդամ 93 պետություններ, 24-ը՝ դեմ, 58-ը՝ ձեռնպահ։

Ռուսաստանը երկրորդ երկիրն է, որի անդամակցությունը դադարեցվում է 47 անդամ ունեցող խորհրդում․ ավելի վաղ՝ 2011-ին, կառույցից հեռացվել էր նաև Լիբիան՝ նախկին բռնապետ Մուամար Քադաֆիի օրոք տեղի ունեցած հանցագործություններին ի պատասխան։

Հայաստանը քվեարկությանը չի մասնակցել։

«Ռոյթերզ»-ը, հղում անելով իր աղբյուրներին, հաղորդում է, թե Ռուսաստանը քվեարկությունից առաջ զգուշացրել է ՄԱԿ-ի անդամներին, որ բանաձևին կողմ կամ ձեռնպահ քվեարկությունը կդիտարկվի որպես «ոչ բարեկամական քայլ, որն իր ազդեցությունը կունենա հետագա երկկողմ հարաբերությունների վրա»։

Ռուսաստանի Դաշնության նախագահ Վլադիմիր Պուտինի մամլո խոսնակ Դմիտրի Պեսկովը Sky News բրիտանական հեռուստատեսությանը տված հարցազրույցում ընդունել է, որ ռուսական կողմն Ուկրաինայի պատերազմում «նշանակալից կորուստներ է կրել»:

«Դա մեծ ողբերգություն է մեզ համար», - ասել է Պեսկովը՝ կորուստների վերաբերյալ որևէ թիվ չհայտնելով:

Ռուսաստանի և Թուրքիայի պաշտպանության նախարարներ Սերգեյ Շոյգուն և Հուլուսի Աքարն ապրիլի 7-ին հեռախոսով քննարկել են Ուկրաինայի պատերազմի խնդիրը:

Այդ մասին հայտնել է Ռուսաստանի պաշտպանության նախարարությունը, նշելով, որ զրույցը տեղի է ունեցել թուրքական կողմի նախաձեռնությամբ:

«Քննարկման ընթացքում հատուկ ուշադրություն է հատկացվել մարդասիրական հարցերին», - ասվում է ՌԴ պաշտպանության նախարարության հաղորդագրությունում:

Համաշխարհային ռոքի պատմության ամենահայտնի խմբերից մեկը՝ լեգենդար «Փինք Ֆլոյդ»-ը ձայնագրել է առաջին երգը 1994 թվականից ի վեր:

Բրիտանացիները երգն անվանել են Hey Hey Rise Up («Հե՜յ, հե՜յ, վե՛ր կաց») և հայտնել են, որ այդ սինգլի վաճառքից ստացված ամբողջ եկամուտը որպես մարդասիրական օգնություն կփոխանցվի Ուկրաինային:

Այս երգի ձայնագրությանը մասնակցել է «Բումբոքս» ուկրաինական ռոք խմբի լիդեր և երգիչ Անդրեյ Խլիվնյուկը, ով միացել է Կիևի տարածքային պաշտպանության գումարտակին: