Պատերազմ Ուկրաինայում (լայվ բլոգ, թարմացվող)

Միացյալ Նահանգների նախագահ Ջո Բայդենը ՄԱԿ-ի քվեարկությունը Մարդու իրավունքների խորհրդին Ռուսաստանի մասնակցությունը կասեցնելու վերաբերյալ անվանել է «զգալի քայլ համաշխարհային հանրության կողմից»։

Բայդենը խոստացել է ընդլայնել համագործակցությունը «պատասխանատու պետությունների» հետ ամբողջ աշխարհում՝ Ռուսաստանին միջազգային հարթակում մեկուսացնելու և ենթադրյալ ռազմական հանցագործությունների համար պատասխանատվության ենթարկելու համար:

Պետքարտուղար Էնթոնի Բլինքենը հայտարարել է, որ արևմտյան երկրներն ուսումնասիրում են Ուկրաինային աջակցության շրջանակում մատակարարվող զենքի տեսականու ընդլայնման հնարավորությունը։

Միացյալ Նահանգների ֆինանսների նախարարությունը հայտարարել է Մոսկվայի դեմ պատժամիջոցների ընդլայնման մասին՝ «սև ցուցակում» ներառելով ՌԴ ևս 8 քաղաքացիների և 29 կազմակերպությունների։

ԱՄՆ Կոնգրեսի վերին պալատը պաշտպանել է Ռուսաստանից ցանկացած էներգակիրների ներմուծումն արգելող օրինագիծը։ Ինչպես հաղորդում է Սենատի կայքը, փաստաթուղթն ընդունվել է միաձայն՝ կողմ են քվեարկել երկու կուսակցությունների բոլոր 100 սենատորները։

Գերմանիայի կանցլեր Օլաֆ Շոլցը հերթական անգամ կոչ է արել Ռուսաստանի նախագահ Վլադիմիր Պուտինին անհապաղ դադարեցնել Ուկրաինայի դեմ պատերազմը։

«Պետք է զինադադար լինի, և Ռուսաստանը պետք է դուրս բերի իր զորքերը Ուկրաինայից», - հայտարարել է Շոլցը՝ պնդելով, թե Պուտինը կործանում է ոչ միայն Ուկրաինան, այլև սեփական երկրի ապագան։

ՄԱԿ-ի թարմացված տվյալներով՝ Ռուսաստանի ներխուժման սկզբից ի վեր Ուկրաինայում 1611 խաղաղ բնակիչ է զոհվել, այդ թվում՝ 131 երեխա, վիրավորվել է 2 հազար 227 մարդ, մեծ մասը՝ ծանր հրետանու և հրթիռային համակարգերի կիրառման արդյունքում։

ՄԱԿ-ը նշել է, որ զոհերի իրական թիվը շատ ավելի մեծ է, քանի որ զեկույցներում ներառված են միայն հաստատված դեպքերը, իսկ որտեղ մարտեր են ընթանում, հնարավոր չէ արագ ճշտել տեղեկություննները։

Ուկրաինայի մի շարք շրջանների վարչակազմերը հայտնում են, որ այս գիշեր ռուսական զորքերը շարունակել են հարվածները երկրի տարածքում։

Գիշերը հարված է հասցվել Խարկովին, որտեղ մեկ մարդ մահացել է, ևս 14-ը՝ վիրավորվել։

Լուգանսկի շրջանում մեկ մարդ է զոհվել Լիսիչանսկ քաղաքի հրետակոծության ժամանակ։

«Շրջափակում, հումանիտար աղետ, մաքրման գործողություն, փողոցային դիրքային մարտեր», - Մարիուպոլում տիրող իրավիճակն են նկարագրում քաղաքային իշխանությունները։

Երեկ ժամը 22:50-ի սահմաններում Օդեսայի ենթակառուցվածքը հարձակման է ենթարկվել ծովից: Մանրամասներ դեռևս չկան։

Այսօր նախատեսվում է 10 մարդասիրական միջանցք՝ բնակչության տարհանման համար։ Այս մասին Telegram-ի իր ալիքում հայտնել է Ուկրաինայի փոխվարչապետ Իրինա Վերեշչուկը։

Եվրահանձնաժողովի ղեկավար Ուրսուլա ֆոն դեր Լայենն այս գիշեր գնացքով մեկնել է Կիև։

Հաղորդվում է, որ ֆոն դեր Լայենը մտադիր է հանդիպել Ուկրաինայի նախագահ Վլադիմիր Զելենսկու հետ։

Պատվիրակության կազմում են Եվրամիության դիվանագիտության ղեկավար Ժոզեպ Բորելը, Սլովակիայի վարչապետ Էդուարդ Հեգերը և Եվրախորհրդարանի մի շարք պատգամավորներ։

«Ռուսական բանակը շարունակում է Ուկրաինայում ճշգրիտ զենքերով հարվածներ հասցնել ռազմական թիրախներին», - ասել է Ռուսաստանի պաշտպանության նախարարության խոսնակ, գեներալ-մայոր Իգոր Կոնաշենկովը:

Ռուսները պնդում են, որ անցած գիշեր Խարկովի, Նիկոլաևի և Դոնբասի շրջաններում հրթիռներով ոչնչացրել են ուկրաինական բանակի վառելիքի չորս պահեստներ:

Կոնաշենկովի փոխանցմամբ, ոչնչացվել են նաև մի ամրացված մեքենայացված հետևակային վաշտ, տանկային դասակ և Ժիտոմիրի կայարանում մի գնացք, որը պետք է ռազմական տեխնիկա փոխադրեր ուկրաինական բանակի համար:

Ուկրաինայի նախագահ Վլադիմիր Զելենսկին ասել է, թե Բորոդյանկա ավանում իրավիճակն էլ ավելի սարսափելի է, քան Բուչայում: Տեղացի պաշտոնյաները պնդում են, որ Բորոդյանկայում ռուսներն ավելի քան 300 մարդու են սպանել:

«Բորոդյանկայում ավերակների մաքրման աշխատանքը սկսվել է: Այնտեղ կացությունն էապես ավելի ծանր է, կան ռուս զավթիչների կողմից սպանված ավելի մեծ թվով տեղացիներ: Եվ ի՞նչ կլինի, երբ աշխարհի լիդերներն ամբողջ ճշմարտությունն իմանան Մարիուպոլում ռուս զինծառայողների արաքների մասին: Այնտեղ գրեթե յուրաքանչյուր փողոցում կա այն, ինչ տեսել ենք Բուչայում և Կիևի շրջանի մյուս ավաններում՝ ռուսական ուժերի հեռանալուց հետո: Նույն դաժանությունը, նույն սարսափելի հանցանքները»,- ասել է Զելենսկին:

Եվրոպական միությունը հաստատել է Ռուսաստանի նկատմամբ տնտեսական պատժամիջոցների 5-րդ փաթեթը: Սանկցիոն ցուցակում են նաև ֆիզիկական անձինք ոչ միայն Ռուսաստանից, այլև Բելառուսից:

Սանկցիաների 5-րդ փաթեթով ենթադրվում է արգելել ռուսական դրոշով նավերի մուտքը եվրոպական նավահանգիստներ: Բացառություն կարվի միայն գյուղատնտեսական, պարենային և մարդասիրական նշանակության արտադրանք փոխադրող նավերի համար:

Նոր փաթեթով արգելվում է ռուսական ածխի ներկրումը: Էմբարգոն ուժի մեջ կմտնի ամռան վերջին:

Եվրամիության տարածքում արգելվում է ռուսական և բելառուսական ավտոտրանսպորտային ձեռնարկությունների գործունեությունը, այդ թվում՝ տարանցման դեպքում, եթե դա խոչընդոտելու է բեռնափոխադրումները:

Արգելվում է ռեակտիվ վառելիքի, քվանտային համակարգիչների, կիսահաղորդիչների, արդիական էլեկտրոնիկայի, ծրագրային ապահովման և արդիական այլ սարքավորումների փոխադրումը Ռուսաստան:

Արգելվում են գործարքներ ռուսական չորս առաջատար բանկերի հետ: Խոսքը ռուսական շուկայի 23 տոկոսը գրաված բանկերի մասին է: Այդ քառյակում է նաև ՎՏԲ-ն:

Արգելվում է արժույթի և արժեթղթերի վաճառքը Ռուսաստանի և Բելառուսի ֆիզիկական անձանց:

Ճապոնիայի վարչապետ Ֆումիո Կիշիդան ասել է, թե «Մեծ քսանի» խմբում գտնվող երկրները պետք է քննարկեն Ուկրաինայի պատերազմի պայմաններում Ռուսաստանի անդամության նպատակահարմարությունը:

«Մեծ յոթնյակի գործընկերների հետ մենք որոշել ենք, որ չի կարելի նախկինի պես Ռուսաստանի մասնակցությամբ անցկացնել բազմակողմանի հավաքներ: Ինչ վերաբերում է Մեծ քսանյակին՝ ես կարծում եմ, որ անհրաժեշտ է հարցը քննարկել խմբում այսօր նախագահող Ինդոնեզիայի և մնացած անդամների հետ», - ասել է Կիշիդան:

Bloomberg գործակալությունն ավելի վաղ հաղորդել է, որ Միացյալ Նահանգները ճնշում է բանեցրել Ինդոնեզիայի վրա՝ համոզելով այդ երկրին թույլ չտալ Ռուսաստանի նախագահ Վլադիմիր Պուտինի մասնակցությունն առաջիկա գագաթնաժողովին:

Կրեմլի խոսնակ Դմիտրի Պեսկովն ասել է, թե Պուտինի մասնակցությունն առաջիկա գագաթնաժողովին կախված կլինի ընդհանուր իրավիճակի զարգացումից: Խոսնակի փոխանցմամբ՝ Մոսկվան այդ հարցում նախևառաջ հաշվի է առնելու կազմակերպիչ պետության՝ Ինդոնեզիայի դիրքորոշումը: