Պատերազմ Ուկրաինայում (լայվ բլոգ, թարմացվող)

Միացյալ Նահանգների պետքարտուղարի բնակչության, փախստականների և միգրացիայի հարցերով օգնական Ջուլիետա Նոյեսը ապրիլի 12-15-ը կայցելի Լեհաստան և Մոլդովա՝ քննարկելու ուկրաինացիների հետ կապված իրավիճակը, ովքեր լքել են իրենց երկիրը հակամարտության պատճառով։

«Վարշավայում նա կհանդիպի Լեհաստանի իշխանությունների և ՄԱԿ-ի ներկայացուցիչների հետ՝ քննարկելու հումանիտար ճգնաժամի լուծումը»,- ասվում է ԱՄՆ Պետդեպարտամենտի հաղորդագրության մեջ։

Քիշնևում Նոյեսը կհանդիպի նաև տեղական իշխանությունների ներկայացուցիչների հետ։ Բացի այդ, նա պատրաստվում է այցելել փախստականների ընդունման կենտրոն։

Ուկրաինայի նախագահ Վլադիմիր Զելենսկին այսօր տեսաուղերձով դիմել է Լիտվայի խորհրդարանին։ Նա կոչ է արել, որ Եվրամիությունը խստացնի պատժամիջոցները Ռուսաստանի դեմ՝ ներառելով ռուսական բոլոր բանկերն ու նավթի գնումները, ինչպես նաև վերջնաժամկետ սահմանի գազի ներմուծումը դադարեցնելու համար։

Լիտվայի վարչապետ Ինգրիդա Շիմոնիտեն Ուկրաինայի վարչապետ Դենիս Շմիգալի ուղեկցությամբ նախօրեին այցելել էր Կիևի մարզի բնակավայրեր, որտեղից ռուսական ուժերը դուրս են եկել։

Կիևից 75 կիլոմետր հյուսիս ընկած Բորոդյանկա ավանի մասին Լիտվայի վարչապետը Թվիթերում գրել է, թե բառեր չկան նկարագրելու ինչ նա զգացել և տեսել է այնտեղ։

Ռուսաստանի պաշտպանության նախարարության խոսնակ, գեներալ Իգոր Կոնաշենկովն այսօր ասել է, որ գիշերը Մարիուպոլի «Իլյիչի» գործարանում շրջափակված ուկրաինական ուժերը փորձել են ճեղքել շրջափակումը, բայց նրանց փորձը ձախողվել է։

«Ուկրաինայի շուրջ 100 զինվորականների խումբը զրահամեքենաներով փորձել է մարտերով դուրս գալ գործարանի տարածքից և հյուսիսային ուղղությամբ հեռանալ քաղաքից։ Հրետանու և ավիացիայի հարվածներով այդ փորձը կասեցվել է։ Ոչնչացվել է ուկրաինական 3 տանկ, 5 հետևակի մարտական մեքենա, 7 ավտոմեքենա և մինչև 50 զինվորական։ Եվս 42 ուկրաինացի զինվորականներ վայր են դրել զենքը և հանձնվել», - ասել է Կոնաշենկովը։

Մինչ Արևմուտքը խոսում է Դոնբասում սպասվող խոշոր ճակամարտի, ռուսական բանակի պատերազմական հանցագործությունների ու պատժամիջոցները խստացնելու մասին, Ռուսաստանի նախագահը այսօր կրկին պնդել է, թե վստահ է իր հաղթանակի մեջ։

«Այդպես էլ կլինի: Կասկած չկա։ Նպատակները միանգամայն հասկանալի են, դրանք վեհ են։ Հիմնական նպատակը Դոնբասի մարդկանց օգնելն է: Մեզ ստիպեցին դա անել, քանի որ Կիևի իշխանությունները՝ Արևմուտքի կողմից դրդված, հրաժարվեցին կատարել խնդիրների լուծմանն ուղղված Մինսկի համաձայնագրերը», - ասել է Պուտինը:

Ընդ որում, «հատուկ օպերացիայի» մասին խոսելիս Կրեմլի ղեկավարն այսօր ընդգծել է, որ այն ընթանում է ոչ թե Ուկրաինայի ողջ տարածքում, այլ Դոնբասում։

Մինչ այդ Ուկրաինայի նախագահը շարունակում է պնդել, որ ռուսական բանակը պատրաստվում է այս շաբաթ կտրուկ հարձակման անցնել Դոնբասի հյուսիսում և հարավում։

Ռազմական վերլուծաբանները կանխատեսում են, որ Դոնբասում կայանալիք մարտերը թեժ են լինելու, ամենամեծը Երկրորդ համաշխարհային պատերազմից հետո։

«Բելառուսը ցանկացած իրավիճակում կլինի Ռուսաստանի կողքին»,- այսօր հայտարարել է Բելառուսի նախագահ Ալեքսանդր Լուկաշենկոն՝ Ամուրի մարզում, «Վոստոչնի» տիեզերակայանում, Ռուսաստանի նախագահ Վլադիմիր Պուտինի հետ հանդիպմանը։

«Բելառուսցիների վրա դուք կարող եք հույս դնել, գիտեք, որ ցանկացած իրավիճակում, ինչ էլ պատահի, դուք դրանում համոզված եք, ռուսաստանցիները պետք է համոզված լինեն, մենք միշտ ձեր կողքին կլինենք՝ ցանկացած իրավիճակում»,- ասել է Լուկաշենկոն` ավելացնելով, թե «Հեռավոր Արևելքը հեռու է, բայց մերն է»:

«Մենք, ի տարբերություն ներկայիս հանրապետությունների, պահպանել ենք այդ միասնությունը և ամբողջովին վճռական ենք ամրապնդելու այն», - նշել է Բելառուսի նախագահը։

Ուկրաինայի պաշտպանության փոխնախարար Հաննա Մալյարն այսօր ասել է, որ զինվորականներն ուսումնասիրում են Մարիուպոլում անօդաչու թռչող սարքի հարձակումից հետո մի խումբ մարդկանց շնչառական և նյարդաբանական հիվանդությունների պատճառները։

Հեռուստատեսության հարցազրույցում Մալյարն այսօր ասել է, թե վարկած կա, որ դա կարող է ֆոսֆորային զենքի հարձակման հետևանք լինել։

Ֆոսֆոր պարունակող զինատեսակը քիմիական զենք չի համարվում, այն հրկիզող զենքի տեսակ է, որի կիրառումն անօրինական չէ, բայց ամեն դեպքում Ժնևյան կոնվենցիաներով բնակչության դեմ ցանկացած զենքի օգտագործում արգելված է։

ԱՄՆ-ը և Բրիտանիան ասել են, որ կստուգեն ռուսական ուժերի կողմից նման զենք կիրառելու կասկածները։

Գերմանական օդուժի օդանավը հատուկ չվերթով անցած երկուշաբթի Գերմանիա է տեղափոխել ուկրաինացի վիրավորներին՝ տեղի հիվանդանոցներում նրանց բուժելու նպատակով։

Գերմանիայի օդուժի բժշկական ծառայության տվյալներով` վիրավորներին վերցրել են Լեհաստանի հարավ-արևելքում, Ուկրաինայի սահմանին մոտ գտնվող Ռժեշով քաղաքի օդանավակայանից։

Երեկ Կիևի Սուրբ Վլադիմիր տաճարում վերջին հրաժեշտն են տվել Ուկրաինայի համար զոհված երկու վրացիներին: Նիկա Շանավան և Դավիդ Մենաբդիշվիլին զոհվել են Խարկովի մարզում Իզյում քաղաքի մարտերում։

Տաճարում հոգեհանգստյան արարողությանը ներկա էին տասնյակ մարդիկ, նրանց մարտական ընկերները, ուկրաինացիներ ու վրացի կամավորներ։

Վրաստանի նախկին փոխվարչապետ Գիորգի Բարամիձեն «Ռոյթերսին» ասել է․ - «Եվս երկու վրացի, որոնք պայքարել են Ուկրաինայի համար, զոհվել են Խարկովի տակ, կռվելով ռասիստների, 21-րդ դարի ֆաշիստների դեմ»։

Մինչ այս հաղորդվել էր, որ Ուկրաինայում արդեն առնվազն չորս վրացի կամավոր է զոհվել։