Պատերազմ Ուկրաինայում (լայվ բլոգ, թարմացվող)

Ուկրաինայում ձերբակալել են ռուսամետ ամենահայտնի լիդերներից «Պուտինի քավոր» Վիկտոր Մեդվեդչուկին: Նախագահ Վլադիմիր Զելենսկին իր Տելեգրամ-ալիքում տեղադրել է պետական դավաճանության համար մեղադրվող Մեդվեդչուկի լուսանկարը և հաղորդել, որ Ուկրաինայի անվտանգության ծառայությունը հատուկ գործողություն է անցկացրել նրան գտնելու ու ձերբակալելու համար:

Մեդվեդչուկը, որին անվանում են «Պուտինի քավորը», տնային կալանքի տակ էր և Ուկրաինա ռուսների ներխուժման առաջին օրը՝ փետրվարի 24-ին, փախուստի էր դիմել:

Ուկրաինայում նա մեղադրվում է մի շարք հոդվածներով, 2021 թվականի հոկտեմբերին կոռուպցիային գումարվել է նաև պետական դավաճանության մեղադրանքը:

Նախկինում Մեդվեդչուկը ղեկավարել է Գերագույն Ռադայում «Հանուն կյանքի» ամենախոշոր ընդդիմադիր կառույցը:

Այն, ըստ դրա քաղաքական ընդդիմախոսների, 2014 թվականին ռուսների կողմից Ղրիմը բռնազավթելուց հետո դրսևորել է բացահայտ ռուսամետ դիրքորոշում և սատարում է Դոնբասի ռուս անջատականներին:

Միացյալ Նահանգները որոշել է Ուկրաինային տրամադրել ևս 750 միլիոն դոլարի սպառազեն: Այդ մասին հայտարարությունը Սպիտակ տունը կհրապարակի այսօր:

Զենքի տրամադրման ֆինանսավորումը նախագահ Ջո Բայդենը կհաստատի իրեն վերապահված հատուկ իրավասությունների շրջանակում:

Ուկրաինայի նախագահ Վլադիմիր Զելենսկին առաջարկել է Վիկտոր Մեդվեդչուկին փոխանակել ուկրաինացի ռազմագերիների հետ։

«Ես առաջարկում եմ Ռուսաստանի Դաշնությանը փոխանակել [Մեդվեդչուկին] ռուսական գերության մեջ գտնվող մեր տղաների հետ: Ուստի կարևոր է, որ մեր իրավապահ մարմինները և զինվորականները նույնպես դիտարկեն այդ հնարավորությունը»,- ասել է Զելենսկին չորեքշաբթի օրը տեսաուղերձում։

Միացյալ Նահանգների նախագահ Ջո Բայդենն Ուկրաինայում ռուս զինվորականների գործողությունների կապակցությամբ առաջին անգամ օգտագործել է «ցեղասպանություն» բառը։

ԱՄՆ նախագահն ասել է. - «Ես դա անվանեցի ցեղասպանություն, քանի որ գնալով ավելի պարզ է դառնում, որ Պուտինը փորձում է երկրի երեսից ջնջել ուկրաինացի լինելու գաղափարը»:

Ուկրաինայի նախագահ Վլադիմիր Զելենսկին Twitter-ում արձագանքել է Բայդենի խոսքերին՝ գրելով. - «Չարին դիմակայելու հարցում իրերն իրենց անուններով կոչելը շատ կարևոր է»: «Մենք երախտապարտ ենք ԱՄՆ-ի կողմից մինչ այժմ ցուցաբերված օգնության համար, և մեզ շտապ անհրաժեշտ է ավելի շատ ծանր սպառազինություն՝ կանխելու ռուսական հետագա վայրագությունները», - հավելել է Զելենսկին:

Ուկրաինայի խորհրդարանի մարդու իրավունքների հանձնակատար Լյուդմիլա Դենիսովան հաղորդել է, որ պատերազմի սկսվելուց ի վեր զոհվել է 191 ուկրաինացի երեխա, տուժել է 350-ը:

Ավելի քան 1000 ուկրաինացի զինծառայող կամավոր հանձնվել է Մարիուպոլում, այդ թվում՝ 162 սպա և 47 կին զինվորական։ Այդ մասին այսօր հայտարարել է Ռուսաստանի պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը։

Գեներալը հայտնել է, որ 151 վիրավոր ուկրաինացի զինծառայողներ առաջնային բուժօգնություն են ստացել տեղում, ինչից հետո բոլորը տեղափոխվել են Մարիուպոլի քաղաքային հիվանդանոց՝ բուժման։

Պաշտոնական Կիևն այս կապակցությամբ առայժմ որևէ բան չի հաղորդում:

Լեհաստանի, Լիտվայի, Էստոնիայի և Լատվիայի նախագահներն Ուկրաինայում են և Կիևում կհանդիպեն երկրի նախագահ Վլադիմիր Զելենսկու հետ։

Ինչպես կարելի է եզրակացնել լրատվամիջոցներում և սոցիալական ցանցերում հրապարակված լուսանկարներից, չորս պետությունների ղեկավարները Կիև են մեկնում ուկրաինական գնացքով։

Անջեյ Դուդան, Գիտանաս Նաուսեդան, Էգիլս Լևիցը և Ալար Կարիսը կհանդիպեն Զելենսկու հետ՝ նրան «քաղաքական և ռազմական աջակցության խոսքեր փոխանցելու համար», - գրել է Նաուսեդան Twitter-ում։ «Միասին մինչև հաղթանակ», - հավելել է Լիտվայի նախագահը։

Ֆրանսիայի նախագահ Էմանյուել Մակրոնը հայտարարել է, որ ծրագրում է առաջիկա օրերին նոր հեռախոսազրույցներ ունենալ Ռուսաստանի առաջնորդ Վլադիմիր Պուտինի և Ուկրաինայի նախագահ Վլադիմիր Զելենսկու հետ։ Այդ մասին նա հայտարարել է France 2 հեռուստաալիքի եթերում։

Մակրոնը հավելել է, որ կգործադրի «առավելագույն ջանքերը՝ այս մարտերը դադարեցնելու կարողությունը պահպանելու համար»։

Ռուսաստանի նախագահ Վլադիմիր Պուտինն այսօր ասել է, որ Ռուսաստանը իր հարուստ էներգակիրները Արևմուտքի փոխարեն կարող է հեշտությամբ ուղղել դրանց կարիքն ունեցող այլ երկրներ, ինպես նաև ավելացնել նավթի, գազի և քարածխի ներքին սպառման ու վերամշակման ծավալները։

Ուկրաինա ներխուժելու պատճառով Միացյալ Նահանգները, Կանադան, Բրիտանիան և Ավստրալիան արգելք են դրել ռուսական էներգակիրների ներմուծման վրա։ Եվրոպական երկրները քննարկում են ռուսական էներգակիրներից կախվածությունը նվազեցնելու հնարավորությունը։

Պուտինն ասել է, որ էներգետիկ ճգնաժամի համար Արևմուտքն է մեղավոր, որովհետև չի ցանկանում համագործակցել Ռուսաստանի հետ։