Պատերազմ Ուկրաինայում (լայվ բլոգ, թարմացվող)

Էմանյուել Մակրոնը թվիթերյան իր էջում գրել է, որ զանգահարել է Վլադիմիր Զելենսկուն՝ իր աջակցությունը հայտնելու Ուկրաինային։

«Ապրիլի 14-ին լրացավ ուկրաինական սարսափի 50-րդ օրը։ 50 օր պատերազմ է մեր Եվրոպայի սրտում։ Նախագահ Զելենսկու հետ իմ զրույցի ժամանակ ես ևս մեկ անգամ հայտնեցի մեր վճռականությունը՝ կանգնելու նրա կողքին և վերջ դնելու հակամարտությանը», - գրել է Ֆրանսիայի նախագահը:

«Ուկրաինայում սարսափելի հանցագործություններ են կատարվել: Դեպքի վայրում գտնվող մեր փորձագետներն օգնում են ուկրաինացի և միջազգային դատական մարմինների պաշտոնյաներին ապացույցներ հավաքել ու բացահայտել մեղավորներին: Ռուսաստանի իշխանությունները պետք է պատասխանատվության ենթարկվեն: Առանց արդարության խաղաղություն չկա», - հավելել է Մակրոնը:

Նա ընդգծել է, որ պատերազմի անցած 50 օրերի ընթացքում Ֆրանսիան ուկրաինական բանակին տրամադրել է ավելի քան 100 միլիոն եվրո արժողությամբ զինտեխնիկա և կշարունակի ռազմական աջակցությունը։ Բացի այդ, Ֆրանսիան Ուկրաինային ուղարկում է 24 հրշեջ և 50 շտապ բուժօգնության մեքենա։

ԱՄՆ պետքարտուղար Էնթոնի Բլինքենը համոզմունք է հայտնել, որ Չինաստանն ի վերջո պետք է ընտրություն կատարի Ուկրաինայի շուրջ ներկայիս հակամարտությունում, քանի որ դա «ազդում է աշխարհում նրա հեղինակության վրա»։

Հիշեցնելով՝ Չինաստանը բազմիցս հայտարարել է, որ իր քաղաքականությունը հիմնված է ՄԱԿ-ի Կանոնադրության և դրա հիմքում ընկած սկզբունքների վրա, Բլինքենն ընդգծել է՝ «այժմ այդ սկզբունքներին ձեռնոց է նետված» Ռուսաստանի կողմից Ուկրաինա զինված ներխուժման պատճառով։

Ռուսաստանցի ընդդիմադիր Ալեքսեյ Նավալնին Միացյալ Նահանգների, Մեծ Բրիտանիայի եւ Եվրամիության երկրների առաջնորդներին, համաշխարհային IT ընկերությունների ղեկավարներին կոչ է անում «սոցիալական ցանցերի հնարավորությունների օգնությամբ ջախջախել Պուտինի քարոզչությունը»։

Բանտարկված քաղաքական գործչի ուղերձը հրապարակվել է Twitter-ում, դրանում Նավալնին առաջարկում է օրական ռուսներին ցույց տալ տասնյակ միլիոնավոր գովազդային հաղորդագրություններ՝ այդկերպ Պուտինի դեմ բացելով «տեղեկատվական ճակատ»։

«Ճշմարտությունն ու ազատ տեղեկատվությունը հարվածում են Պուտինի խելագար ռեժիմին ոչ պակաս, քան Javelin-ները », - հայտարարել է Նավալնին՝ շեշտելով, որ ինտերնետում գովազդի ծախսերը ռազմական ծախսերից անհամեմատ ցածր են։

Միացյալ Նահանգների Կենտրոնական հետախուզական վարչության (ԿՀՎ) ղեկավար Ուիլյամ Բըրնսը կարծում է՝ Ռուսաստանի կողմից Ուկրաինայում միջուկային զենքի կիրառման սպառնալիքին չի կարելի անլուրջ վերաբերվել։ Այդուհանդերձ, Բըրնսի ղեկավարած գերատեսչությունն այդ մտահոգությունը խորացնող փաստեր չի տեսնում։

Հաշվի առնելով նախագահ Պուտինի և Ռուսաստանի ղեկավարության հնարավոր հուսահատությունը, հաշվի առնելով այն անհաջողությունները, որոնց նրանք բախվել են մինչ այս պահը՝ ռազմական առումով, մենք չեն կարող անլուրջ մոտենալ մարտավարական միջուկային զենքի կամ ցածր հզորության միջուկային զենքի հնարավոր կիրառման սպառնալիքին», - նախօրեին հայտարարել է ամերիկացի բարձրաստիճան պաշտոնյան։

Հյուսիսային Մակեդոնիան «անցանկալի անձ» է հայտարարել վեց ռուս դիվանագետների՝ «դիվանագիտական նորմերը խախտելու» համար։

«Այդ անձինք իրականացնում էին գործողություններ, որոնք հակասում են դիվանագիտական հարաբերությունների մասին Վիեննայի կոնվենցիային, և առաջիկա հինգ օրվա ընթացքում պետք է լքեն Հյուսիսային Մակեդոնիայի Հանրապետության տարածքը», - ասվում է ԱԳՆ հայտարարությունում։

Անցած ամիս պաշտոնական Սկոպյեն արդեն մի խումբ ռուս դիվանագետների է արտաքսել երկրից՝ «անպատշաճ» դիվանագիտական գործունեության համար։

Փետրվարի 24-ին Ռուսաստանի ներխուժումից ի վեր Ուկրաինան լքել է ավելի քան հինգ միլիոն մարդ, այս մասին հայտնում է ՄԱԿ-ը։

Սա համարվում է Երկրորդ համաշխարհային պատերազմից ի վեր Եվրոպայի ամենաարագ աճող փախստականների ճգնաժամը։

Կառույցի տվյալներով՝ ավելի քան 2,7 միլիոն ուկրաինացի փախստական՝ 10-ից վեցը, ապաստանել են հարևան Լեհաստանում, 725 հազարը՝ Ռումինիայում։ Ուկրաինացի փախստականների 90 տոկոսը կանայք և երեխաներ են։

Վրաստանի անվտանգության պետական ծառայությունը հետաքննություն է սկսել Քրեական օրենսգրքի 325-րդ հոդվածով (Հարձակում Վրաստանի պետական քաղաքական պաշտոնյայի վրա)՝ կապված խորհրդարանի փոխնախագահ Գիա Վոլսկու հայտարարության հետ։

Իշխող մեծամասնության ներկայացուցիչը հայտարարել է, որ նախկին նախագահ Միխեիլ Սաակաշվիլիի գլխավորած ընդդիմադիր կուսակցության ներկայացուցիչները մաս չեն կազմի Ուկրաինա մեկնող խորհրդարանական պատվիրակությանը, քանի որ ընդդիմադիր ուժը այցի ընթացքում «որոշակի սադրանք» էր ծրագրում։ Ոչ Վոլսկին, ոչ էլ Վրաստանի իրավապահ մարմինները մանրամասներ չեն հայտնում։

Վրաստանի խորհրդարանի խոսնակի գլխավորած պատվիրակության մեկօրյա այցը Ուկրաինա նախատեսված է ապրիլի 15-ին:

Ուկրաինայի պաշտոնական աղբյուրների համաձայն, յոթ մարդ է զոհվել, ավելի քան երկու տասնյակը վիրավորվել խաղաղ բնակիչներին տեղափոխող ավտոբուսների վրա ռուսական հարձակման հետևանքով:

«Ապրիլի 14-ին ռուս զինծառայողները կրակել են Իզյումի շրջանի Բորովա գյուղից տարհանված խաղաղ բնակիչներին տեղափոխող ավտոբուսների վրա: Նախնական տվյալներով զոհվել է յոթ մարդ, ևս 27 մարդ վիրավորվել է», - ասվում է Ուկրաինայի գլխավոր դատախազության հայտարարության մեջ։

Միացյալ Նահանգները կշարունակի ռազմական օգնություն տրամադրել Ուկրաինային: Այդ մասին պետական դեպարտամենտի մամլո խոսնակ Նեդ Փրայսն ասել է CNN հեռուստակայանին:

Խոսնակն այդ մեկնաբանությամբ արձագանքել է մամուլում հայտնված հրապարակումներին, որոնց համաձայն ռուսներն ամերիկացիներից պաշտոնապես պահանջել են դադարեցնել ռազմական օգնությունն Ուկրաինային:

«Ռուսաստանն ինչ-որ բան ասել է փակ ձևաչափով, ինչ-որ բան՝ բաց ձևաչափով, բայց ոչինչ չի կարող մեզ ստիպել հրաժարվել մեր ընտրած ռազմավարությունից»,- ասել է Փրայսը:

Ռուսաստանի Սևծովյան նավատորմի դրոշակակիր «Մոսկվա» հածանավը խորտակվել է ուկրաինացիների արձակած երկու հրթիռների հարվածից: Այդ մասին է հայտնել մի բարձրաստիճան ամերիկացի պաշտոնյա, ով խնդրել է չհրապարակել իր անունը: Նրա փոխանցմամբ, հավանաբար, նավը խոցել են «Նեպտուն» տեսակի հրթիռներ:

Պաշտոնյայի համոզմամբ, «Մոսկվայի» հրթիռակոծության և հետագա խորտակման հետևանքով, ամենայն հավանականությամբ, ռուսական կողմը կորուստներ է կրել, սակայն որևէ թիվ դեռևս հայտնի չէ: