Պատերազմ Ուկրաինայում (լայվ բլոգ, թարմացվող)

Մեծ Բրիտանիայի վարչապետ Բորիս Ջոնսոնը երեկ խորհրդարանում հնչեցրած ելույթի ընթացքում կոչ է արել պաշտոնական Մոսկվային «մարդասիրաբար և կարեկցանքով» վերաբերվել Մարիուպոլում գերեվարված Միացյալ Թագավորության քաղաքացիներ Էյդեն Էյսլինին և Շոն Փիներին։

«Իմ ընտրատարածքից սերող Էյդեն Էյսլինը վերջին չորս տարիներին ծառայում էր Ուկրաինայի Զինված ուժերում։ Նախորդ շաբաթ Մարիուպոլում նա գերեվարվել է ռուսական բանակի կողմից։ Երեկ արդեն շրջանառության մեջ դրվեց քարոզչական նպատակներով արված մի տեսանյութ, որում պատկերված էր Էյսլինը՝ ձեռնաշղթաներով և ֆիզիկական բռնության հետքերով։ Դա Ժնևյան կոնվենցիայի աղաղակող խախտում է», - հայտարարում էր Մեծ Բրիտանիայի վարչապետը։

Եվրոպական միության արտաքին քաղաքականության և անվտանգության հարցերով պատասխանատու Ժոզեպ Բորելը հայտարարել է, որ կառույցի անդամները կշարունակեն էներգետիկայի բնագավառում նվազեցնել կախվածությունը Ռուսաստանից:

Այդ նպատակով Եվրամիությունը կրճատելու է ռուսական նավթի և գազի ներկրման ծավալները:

Բորելի փոխանցմամբ՝ այդ հարցը կքննարկվի Եվրամիության առաջիկա գագաթնաժողովներում:

«Եվրոպական հանձնաժողովն ունի ռուսական գազի սպառումը երկու երրորդով կրճատելու ծրագիր: Մենք պետք է ազատվենք այդ կախվածությունից, և դա անելու լավագույն ձևը վերականգնվող էներգետիկայի զարգացումն է, մենք չպետք է վերադառնանք ածխին»,- ասել է Եվրամիության հատուկ ներկայացուցիչը:

Սպիտակ տան մամլո խոսնակ Ջեն Սաքին ասել է, թե «Սարմատ» տեսակի նոր միջմայրցամաքային ռուսական հրթիռի փորձարկումը չի կարող որևէ կերպ փոխել Միացյալ Նահանգների դիրքորոշումն Ուկրաինայի հարցում:

Խոսնակի փոխանցմամբ, Վաշինգտոնը որպես նախազգուշացում կամ սպառնալիք չի ընկալում ռուսական ռազմական նոր հրթիռիարձակումը:

«Նրանք ռազմավարական հարձակողական սպառազինությունների պայմանագրի պահանջին համաձան մեզ տեղեկացրել են այդ հրթիռի փորձարկման մասին: Պաշտպանության նախարարությունն ավելի վաղ հայտնել է, որ փորձարկումները չի համարում վտանգ Միացյալ Նահանգների կամ դաշնակիցների համար»,- ասել է Սպիտակ տան մամլո պատասխանատուն:

Ջեն Սաքիի խոսքով, «ռուսական հրթիռների փորձարկումների ժամանակը կամ ծավալը չեն կարող փոխել Ուկրաինայի վրա Ռուսաստանի հարձակմանը հակազդելու Միացյալ Նահանգների մոտեցումը»:

Մեծ յոթնյակի երկրները կուժեղացնեն տնտեսական ճնշումը Ռուսաստանի վրա՝ կապված ուկրաինական պատերազմի հետ։ Այս մասին ասվում է G7-ի ֆինանսական գերատեսչությունների և կենտրոնական բանկերի ղեկավարների հանդիպման արդյունքներով տարածված հայտարարությունում։

Երեկ Վաշինգտոնում կայացած նիստի մասնակիցները նաև ընդգծել են, որ G7-ը գործընկերների հետ միասին կշարունակի քայլեր ձեռնարկել՝ ուղղված «Ռուսաստանի համար այս պատերազմի արժեքը բարձրացնելուն»։

Համատեղ հայտարարությունում նշվում է նաև, որ Մեծ յոթնյակի երկրները կշարունակեն սերտ համագործակցությունը՝ ուղղված Ռուսաստանի դեմ սահմանված պատժամիջոցների իրականացմանը և դրանք շրջանցելու ցանկացած փորձի կանխմանը։

Մեծ յոթնյակի երկրները նաև ափսոսանք են հայտնել Մեծ քսանյակի ֆինանսների նախարարների և կենտրոնական բանկերի ղեկավարների հանդիպմանը Ռուսաստանի մասնակցության համար։

Ի դեպ, աշխարհի առաջատար երկրների, այդ թվում՝ ԱՄՆ-ի և Եվրամիության ֆինանսների նախարարները, ինչպես նաև Ուկրաինայի ներկայացուցիչները, լքել են G20-ի փակ հանդիպումը Վաշինգտոնում ՌԴ ֆինանսների նախարար Անտոն Սիլուանովի՝ տեսակապի միջոցով ելույթի ընթացքում։

Թուրքիայի արտգործնախարարը հայտարարել է, որ Անկարան Մոսկվայի դեմ պատժամիջոցներ չի սահմանի:

Մևլյութ Չավուշօղլուն պնդել է, որ Թուրքիան չի կարող ազնիվ միջնորդ դառնալ Ռուսաստանի և Ուկրաինայի միջև, եթե միանա պատժամիջոցներին։

Ըստ նրա՝ Թուրքիայում Ռուսաստանի և Ուկրաինայի նախագահների հանդիպում կազմակերպելու առաջարկը դեռ սեղանին է։

Չավուշօղլուն հայտնել է, որ Էրդողանը մտադիր է առաջիկա օրերին հեռախոսազրույցներ ունենալ Պուտինի և Զելենսկու հետ։

Թուրքիան նաև Ռուսաստանի և Ուկրաինայի արտգործնախարարներին առաջարկում է հանդիպել Ստամբուլում կամ Անթալիայում։

Ուկրաինան Կիևից Լեհաստան գնացք է գործարկել: Ինչպես հաղորդում են ուկրաինական լրատվամիջոցները, գնացքը կաշխատի օրական երկու անգամ։ Լեհական սահմանամերձ Պերեմիշլ քաղաքից ուղևորները կարող են համեմատաբար հեշտությամբ հասնել Կրակով և Վարշավա, իսկ ավելի ուշ՝ եվրոպական այլ երկրներ:

Պատերազմի երկու ամիսների ընթացքում մոտ 5 միլիոն մարդ է հեռացել Ուկրաինայից, հիմնականում՝ արևմտյան ուղղությամբ, և այդ փախստականների մեծ մասը, գոնե սկզբնական շրջանում, մեկնել է Լեհաստան։ Ընդ որում, նրանք, որպես կանոն, սկզբում հասնում էին Լվով, իսկ հետո Լեհաստանի սահմանն անցնում մեքենաներով, ավտոբուսներով կամ ոտքով։

ՄԱԿ-ի գլխավոր քարտուղար Անտոնիու Գուտերեշի գրասենյակը կազմակերպությունում Ռուսաստանի և Ուկրաինայի մշտական ներկայացուցչություններին առանձին նամակներ է փոխանցել՝ ուղղված նախագահներ Վլադիմիր Պուտինին և Վլադիմիր Զելենսկուն։ Ինչպես հայտնել է Գուտերեշի խոսնակ Ստեֆան Դյուժարիկը, իր ուղերձներում ՄԱԿ-ի գլխավոր քարտուղարը նախագահներին խնդրել է իրեն ընդունել Մոսկվայում և Կիևում։

Օրերս ՄԱԿ-ի գլխավոր քարտուղարի հումանիտար հարցերով տեղակալ Մարտին Գրիֆիթսը Ռուսաստանին և Ուկրաինային առաջարկել էր բանակցություններ վարել հումանիտար հարցերի, այդ թվում՝ հրադադարի և մարդասիրական միջանցքների բացման շուրջ։

Ռուսաստանի պաշտպանության նախարար Սերգեյ Շոյգուն այսօր նախագահ Վլադիմիր Պուտինի հետ հանդիպման ժամանակ հայտարարել է, որ «ազգայնական «Ազով»-ի մայրաքաղաք» Մարիուպոլը վերցվել է վերահսկողության տակ՝ բացառությամբ «Ազովստալ» ձեռնարկության տարածքի։ «Ուկրաինացի մարտիկներն ու օտարերկրյա վարձկաններն» այնտեղ «ապահով փակված են», - հավելել է Շոյգուն։

Պուտինը Մարիուպոլում «մարտական աշխատանքը» «հաջող» է անվանել և խնդրել է պարգևատրման ներկայացնել ռուս զինվորականներին։ Նա հայտարարել է, որ նպատակահարմար չի համարում «Ազովստալ»-ի գրոհը և հրամայում է չեղարկել այն՝ բացատրելով իր հրամանը ռուսաստանցի զինվորականների կյանքը պահպանելու նկատառումներով։

Բուլղարիայի մայրաքաղաք Սոֆիայի ավագանին հաստատել է Ռուսաստանի Դաշնության դեսպանության առջև գտնվող մայթն «Ուկրաինայի հերոսների պուրակ» անվանելու որոշումը:

Բացի այդ, Ռուսաստանի դեսպանատան մոտ գտնվող ևս մեկ անանուն տարածք կստանա Բորիս Նեմցովի անունը:

Սոֆիայի ավագանին, համերաշխություն հայտնելով ռուսների ագրեսիայից պաշտպանվող ուկրաինացիներին, քվեների մեծամասնությամբ թույլատրել է քաղաքապետարանի շենքի վրա Բուլղարիայի ազգային դրոշի կողքին բարձրացնել նաև Ուկրաինայի կապույտ-դեղին դրոշը:

Ռուսաստանցի գործարար, «Լուկօյլ» ընկերության համասեփականատեր, հիմնադիր և նախագահ Վագիտ Ալեքփերովը հայտնել է պաշտոնն ազատելու և ընկերության տնօրենների խորհրդի կազմից դուրս գալու մասին:

Որոշումն ընդունվել է այն բանից հետո, երբ վերջերս Վագիտ Ալեքպերովը հայտնվել է Մեծ Բրիտանիայի սահմանած պատժամիջոցների ցանկում:

Ծնունդով բաքվեցի և ազգությամբ ադրբեջանցի Ալեքպերովի հիմնադրած «Լուկօյլը» Ռուսաստանում ամենախոշոր մասնավոր նավթային ընկերությունն է:

«Ալեքպերովի համապատասխան դիմումը փոխանցվել է «Լուկօյլի» տնօրենների խորհրդին»,- ասվում է ընկերության տարածած հաղորդագրությունում, որում նշվում է, որ գործարարը հանդես չի գալիս իբրև վերահսկիչ բաժնետեր: Նրան պատկանում է ընկերության բաժնետոմսերի 3.12 տոկոսը, ինչպես նաև առանձին հիմնադրամների միջոցով ևս 5.43 տոկոս, որոնց վերաբերյալ Ալեքպերովը ձայնի իրավունք չունի: