Պատերազմ Ուկրաինայում (լայվ բլոգ, թարմացվող)

Լիտվայի խորհրդարանը՝ Սեյմն ընդունել է Ուկրաինայի պատերազմի կապակցությամբ սահմանված արտակարգ դրությունը երկարաձգելու որոշում:

Արտակարգ դրության ժամկետը գործել է մինչև ապրիլի 20-ը: Խորհրդարանը 124 կողմ, 0 դեմ և 6 ձեռնպահ քվեների հարաբերակցությամբ որոշել է սահմանել արտակարգ դրություն, որը վաղը կմտնի ուժի մեջ և կգործի մինչև հունիսի 29-ը ներառյալ:

Արտակարգ ռեժիմի մեկօրյա դադարը բացատրվում է տեխնիկական հանգամանքներով, քանի որ Սեյմը պետք է այսօր դեռ քվեարկությամբ հաստատի սահմանադրական երեք լրամշակումներ, ինչն արգելվում է անել արտակարգ դրության պայմաններում:

Մոսկվան տակավին սպասում է ուկրաինացիների պատասխանին խաղաղություն հաստատելու վերաբերյալ Ռուսաստանի ներկայացրած գրավոր առաջարկին: Այդ հայտարարությամբ Կրեմլի խոսնակ Դմիտրի Պեսկովն արձագանքել է Ուկրաինայի նախագահ Վլադիմիր Զելենսկուն, ով երեկ ասել է, թե տեղեկություն չունի ռուսական կողմի առաջարկի մասին:

«Բանագնացների կազմը նույնն է, փորձագետները մշակում են նախագիծը, կրկնում եմ, ինչպես երեկ էի ասել՝ մեր պահանջները, դրանց վերջին տարբերակը, փոխանցվել են մյուս կողմին, ուստի, մենք պատասխանի ենք սպասում: Թեպետ, մենք լսել ենք, որ նախագահ Զելենսկին ասել է, թե ոչ մի տեքստ չի տեսել, և դա էլ է հարցեր հարուցում, քանի որ ոչ ոք Զելենսկուն չի զեկուցում մեր առաջարկների մասին»,- ասել է Ռուսաստանի նախագահ Վլադիմիր Պուտինի խոսնակը:

Ուկրաինայի նախագահ Վլադիմիր Զելենսկին Կիևում ընդունել է Դանիայի և Իսպանիայի վարչապետեր Մետե Ֆրեդերիկսենին և Պեդրո Սանչեսին:

Երկու վարչապետերը Զելենսկու հետ հանդիպունից զատ նաև այցելել են Կիևի շրջանի Բորոդյանկա գյուղ, որտեղ ռուսական բանակը, ենթադրաբար, պատերազմական հանցագործություններ է կատարել:

Դանիան և Իսպանիան խոստանում են մարդասիրական և ռազմական օգնություն տրամադրել Ուկրաինային:

Սանչեսն ասել է, որ Իսպանիան Ուկրաինա կուղարկի 200 տոննա զինամթերք, իսկ Ֆրեդերիկսենը հայտնել է, որ Դանիան առաջիկայում զենքի նոր խմբաքանակ կփոխանցի Ուկրաինայի բանակին:

Միացյալ Նահանգների նախագահ Ջո Բայդենն այսօր հանդես է եկել Ուկրաինայի պատերազմի մասին հատուկ ուղերձով, հայտնելով, որ Վաշինգտոնը ևս 800 միլիոն դոլարի ռազմական օգնություն է տրամադրում Ուկրաինային:

Այս նոր փաթեթով Ամերիկան ուկրաինական բանակին կփոխանցի ծանր հրետանի, հարյուր հազարավոր արկեր, տակտիկական անօդաչուներ, նռնականետեր, ռադարներ, 15 միլիոն միավոր զինամթերք, ռուսական յուրաքանչյուր տանկի հաշվով 10-ը հակատանկային համակարգ:

Ջո Բայդենն ասել է, որ ամերիկացիները կարող են հպարտանալ, որ օգնում են Ռուսաստանի ագրեսիայի դեմ պաշտպանվող Ուկրաինային:

Նա ասել է, թե հիացած է այս պայքարում ուկրաինացիների դրսևորած աներևակայելի արիությամբ և խիզախությամբ:

Միացյալ Նահանգների նախագահ Ջո Բայդենն Ուկրաինայի պատերազմի հարցով այսօրվա ուղերձում հաղորդել է նոր պատժամիջոցի մասին, որը գործելու է Ռուսաստանի քաղաքացիական նավատորմի նկատմամբ:

«Այսօր ես հայտարարում եմ, որ Միացյալ Նահանգներն արգելում է ռուսական նավերի ընդունումը մեր նավահանգիստներում: Այդպես է որոշվել նաև Եվրոպայում: Դա նշանակում է, որ ոչ մի նավ, որը նավարկում է ռուսական դրոշի տակ, հանդիսանում է Ռուսաստանի սեփականությունը կամ շահագործվում է ռուսաստանցու կողմից՝ հետայսու չի կարողանա մոտենալ մեր ափերին կամ խարիսխ գցել մեր նավահանգիստներում»,- ասել է Բայդենը:

Եվրամիության ընդունած նմանօրինակ օրենքը ենթադրում է բացառություններ գյուղմթերք, պարեն, մարդասիրական օգնություն և էներգակիրներ փոխադրող նավերի համար:

Ռուսաստանում չեղարկվել են «Մաշինա վրեմենի» հայտնի ռոք խմբի բոլոր ծրագրված համերգները: Համերգները չեղարկելու պատճառը չի նշվում, սակայն հայտնի է, որ վերջին օրերին Կրեմլին սատարող լրագրողները, հրապարակախոսները, հեռուստամեկնաբանները և սոցցանցերի օգտատերերը խստորեն քննադատել են խմբի հիմնադիր, երգահան և երգիչ Անդրեյ Մակարևիչին՝ պատերազմի վերաբերյալ նրա հայտնած կարծիքների համար:

Ամերիկյան պետությունների կազմակերպության (ԱՊԿ) խորհուրդը երեկ որոշում է կայացրել՝ ի պատասխան Ռուսաստանի Ուկրաինա ներխուժման, կասեցնել Ռուսաստանի մշտական դիտորդի կարգավիճակը կազմակերպությունում: Խորհրդի որոշման մեջ ասվում է, որ Ռուսաստանը հետ կստանա դիտորդի կարգավիճակը, այն ժամանակ, երբ դադարեցնի պատերազմը, դուրս բերի իր բոլոր զորքերը միջազգայնորեն ճանաչված Ուկրաինայի տարածքից և «վերադառնա երկխոսության և դիվանագիտության ուղի»:

ԱՄՆ-ում Ռուսաստանի դեսպան Անատոլի Անտոնովը խորհրդի որոշումը «լուրջ սխալ» է որակել։

Գերմանիան որոշել է Ուկրաինային ևս 37 միլիոն եվրո տրամադրել՝ պատերազմի հետևանքով ավերվածը վերականգնելու համար։ Այս մասին գրում է գերմանական թերթերից մեկը՝ հղում անելով Գերմանիայի զարգացման նախարարությանը։

Թերթի տվյալներով՝ 22,5 մլն եվրո կուղղվի էլեկտրացանցերի վերականգնմանը, իսկ 14,4 մլնը՝ բնակարանային ֆոնդի ու բժշկական սարքավորումների վերականգնմանը։

Ավստրալիան նոր պատժամիջոցներ է սահմանել Ռուսաստանի դեմ։ Այս անգամ պատժամիջոցների ցուցակում են Ռուսաստանի Դաշնության Դաշնային խորհրդի 144 անդամներ, ինչպես նաև Կատերինա Տիխոնովան և Մարիա Վորոնցովան։

Տիխոնովային և Վորոնցովային Ավստրալիայի կառավարությունն անվանել է Վլադիմիր Պուտինի դուստրեր, ինչպես ավելի վաղ արել էին Միացյալ Նահանգները և Մեծ Բրիտանիան:

Արտաքին գործերի նախարար Սերգեյ Լավրովի դստեր՝ Եկատերինա Վինոկուրովայի նկատմամբ նույնպես պատժամիջոցներ են կիրառվել։

Հինգշաբթի օրը Պենտագոնը հայտարարել է, որ Ուկրաինա է ուղարկում անօդաչու թռչող սարքեր, որոնք ամերիկյան ընկերության կողմից արտադրվել են ուկրաինական բանակի պահանջները հաշվի առնելով։

Խոսքը 121 անօդաչու թռչող սարքերի մասին է, որոնք Ուկրաինա կուղարկվեն ԱՄՆ նախագահ Ջո Բայդենի կողմից հայտարարված ամերիկյան օգնության փաթեթի շրջանակներում։