Պատերազմ Ուկրաինայում (լայվ բլոգ, թարմացվող)

ՄԱԿ-ի գլխավոր քարտուղար Անտոնիու Գուտերեշը վաղը կժամանի Անկարա, որտեղ նրան կընդունի Թուրքիայի նախագահ Ռեջեփ Էրդողանը։ ՄԱԿ-ի հաղորդագրությունում մանրամասներ նշված չեն։

Ավելի վաղ հայտնի է դարձել, որ ՄԱԿ-ի գլխավոր քարտուղարն ապրիլի 26-ին այցելելու է Մոսկվա՝ հանդիպելու Ռուսաստանի նախագահ Վլադիմիր Պուտինի և արտգործնախարար Սերգեյ Լավրովի հետ, ապրիլի 28-ին էլ այցելելու է Կիև, որտեղ նախատեսված են հանդիպումներ Ուկրաինայի նախագահ Վլադիմիր Զելենսկու և արտգործնախարար Դմիտրի Կուլեբայի հետ։

Նախօրեին, ինչպես փոխանցում են ռուսական լրատվամիջոցները՝ վկայակոչելով թուրքական TRT հեռուստաընկերության հաղորդումը, Թուրքիայի արտգործնախարար Մևլյութ Չավուշօղլուն հայտարարել է, թե Ռուսաստանը և Ուկրաինան համատեղ հռչակագրի նախագիծ են մշակել, որը քննարկում են բանակցողները, և երկու պետությունների միջև «կուլիսներից դուրս կապեր են աշխատում»։

Ղրղըզստանում արգելել են Դոնբասի պատերազմի և Ղրիմի բռնազավթման մասին ռուսական քարոզչական գեղարվեստական կինոնկարների ցուցադրումը: Այդ մասին հայտնել է Ղրղըզստանի մշակույթի, տեղեկատվության, սպորտի և երիտասարդության նախարար Ազամատ Ժամանկուլովը: Նախարարի փոխանցմամբ, որոշումն ընդունվել է «ներկայիս միջազգային կացության կապակցությամբ»:

Ֆիլմերի ցուցադրումը մտադիր էր կազմակերպել «Հարմոնիա» ռուսական մշակութային կենտրոնը: Բիշքեկում և Օշում հանդիսատեսի ուշադրությանն առաջարկելու էին «Ղրիմ», «Դոնբաս», «Աղջիկն աշխարհազորից» և այլ ֆիլմեր, որոնք արդարացնում են Ղրիմի բռնազավթումը և Ուկրաինայի վրա ռուսների հարձակումը:

Ղրղըզստանի պետական անվտանգության կոմիտեն ավելի վաղ քաղաքացիներին կոչ է արել մայիսի 9-ին չհագնել Z տառային նշումով զինվորական համազգեստ: Գերատեսչությունը պարզաբանել է, որ «նման համազգեստը նպաստում է ազգամիջյան ատելության տարածմանը»: Պահանջն անտեսողները պատասխանատվության կենթարկվեն:

Անկարայից ստացված հաղորդագրության համաձայն՝ Ուկրաինայի նախագահ Վլադիմիր Զելենսկու հետ այսօր տեղի ունեցած հեռախոսազրույցում Թուրքիայի նախագահ Ռեջեփ Թայիփ Էրդողանը հայտարարել է, որ Թուրքիան պատրաստ է ստանձնել Ուկրաինայի անվտանգության երաշխավորի դերը: Այդ մասին հայտնել է Թուրքիայի նախագահի գրասենյակը:

«Հեռախոսազրույցի ընթացքում քննարկվել են ռուս-ուկրաինական պատերազմի և բանակցային գործընթացի հարցերը: Նախագահ Էրդողանն ասել է, որ պատրաստ է անհրաժեշտ աջակցությունը տրամադրել բանակցություններում, այդ թվում՝ հանդես գալ որպես միջնորդ: Նախագահը նշել է, որ սկզբունքորեն դրական է տրամադրված Թուրքիայի կողմից Ուկրաինային անվտանգության երաշխիքներ տրամադրելու վերաբերյալ», - ասվում է հաղորդագրությունում:

Էրդողանն ասել է նաև, թե «անհրաժեշտ է հնարավորինս արագ խաղաղ բնակիչներին և վիրավորներին տարհանել Մարիուպոլից, որտեղ իրավիճակն օրըստօրե վատթարանում է»:

Ուկրաինան Ռուսաստանին առաջարկում է Մարիուպոլում հաստատել «Զատկի հրադադար»: Ուղղափառները Ռուսաստանում և Ուկրաինայում այսօր նշում են Փրկչի Հարությունը՝ Սուրբ Զատիկը:

Կիևն առաջարկում է քրիստոնեական համերաշխության կանոններով գոնե տոնական օրը դադարեցնել կրակը և Մարիուպոլում գտնվող «Ազովստալ» գործարանի տարածքից մարդասիրական միջանցքով դուրս հանել խաղաղ բնակիչներին ու դիմադրությունը շարունակող ուկրաինացի զինծառայողներին:

Ուկրաինայի նախագահ Վլադիմիր Զելենսկու աշխատակազմի ղեկավար Միխայիլ Պոդոլյակը սոցցանցում գրել է, թե առաջարկում է Ռուսաստանի Դաշնությանը «մտածել հեղինակության վերջին փշրանքների մասին»: Դրա համար, ըստ Պոդոլյակի, անհրաժեշտ է անել «մարիուպոլյան երեք քայլ»՝ հռչակել «Զատկի հրադարար», բացել մարդասիրական միջանցք, համաձայնել անցկացնել բանակցություններ, որոնք միջոցով կողմերը կփոխանակեն գերիներին:

Միացյալ Նահանգների Պետդեպարտամենտը հաստատել է, որ պետքարտուղար Էնթոնի Բլինքենը և պաշտպանության նախարար Լլոյդ Օսթինը կիրակի օրը Կիևում հանդիպել են Ուկրաինայի նախագահ Վլադիմիր Զելենսկու հետ, միայն երբ երկու պաշտոնյաները լքել են Ուկրաինան։

Սա ԱՄՆ բարձրաստիճան պաշտոնյաների առաջին այցն է Ուկրաինա ռուսական ներխուժման սկզբից ի վեր։ Նրանք Ուկրաինային հավելյալ ռազմական օգնություն են խոստացել 713 միլիոն դոլարի չափով։

«Ես ցանկանում եմ, որ մենք ունենանք ծանր հզոր սպառազինություն», - հանդիպումից առաջ ասել էր Զելենսկին՝ հավելելով, որ վերջին շաբաթվա ընթացքում զենքի մատակարարման հետ կապված իրավիճակը բարելավվել է։

Միացյալ Նահանգների պետքարտուղար Էնթոնի Բլինքենը Կիևում ասել է, որ այսօր նախագահ Ջո Բայդենը Ուկրաինայում ԱՄՆ նոր դեսպան կնշանակի։

Սպասվում է, որ նոր դեսպանը կլինի Սլովակիայում Միացյալ Նահանգների ներկայիս դեսպան Բրիջիթ Բրինքը։

ԱՄՆ պետքարտուղարը խոստացել է նաև, որ պատերազմի պատճառով հեռացած դիվանագետներն այս շաբաթվանից աստիճանաբար կվերադառնան Կիև։

Կիևից հետո ԱՄՆ պաշտպանության նախարար Լլոյդ Օսթինը կմեկնի Գերմանիա, որտեղ ամերիկյան Ռամշտայն ռազմակայանում կհանդիպի 20 երկրների ներկայացուցիչների հետ՝ քննարկելու Ուկրաինային տրամադրվող ռազմական օգնությունը։

Եվրամիությունը «խելացի պատժամիջոցներ» է պատրաստում ռուսական նավթի ներկրման դեմ՝ ԵՄ տնտեսությանը հասցվող վնասը նվազագույնի հասցնելու համար, բրիտանական The Times-ին տված հարցազրույցում ասել է Եվրահանձնաժողովի փոխնախագահ Վալդիս Դոմբրովսկիսը։

«Մենք աշխատում ենք պատժամիջոցների վեցերորդ փաթեթի վրա, և քննարկվող հարցերից մեկը նավթային էմբարգոյի ինչ-որ ձևն է։ Երբ մենք պատժամիջոցներ ենք կիրառում, մենք պետք է դա անենք այնպես, որ հնարավորինս մեծացնենք ճնշումը Ռուսաստանի վրա, բայց միևնույն ժամանակ նվազագույնի հասցնենք ինքներս մեզ պատճառած վնասը», - ասել է Դոմբրովսկիսը:

ԱՄՆ-ը և Մեծ Բրիտանիան արդեն հրաժարվել են ռուսական նավթից և գազից, իսկ Եվրամիությունը՝ Արևմուտքում ռուսական էներգառեսուրսների ամենամեծ գնորդը, մինչ այժմ ձեռնպահ է մնացել նավթի և գազի էմբարգոյից: ԵՄ-ը Ռուսաստանից ներմուծում է նավթի և նավթամթերքի 30 և գազի 40 տոկոսը։

Հանգստյան օրերին արևմտյան մամուլը, հղում անելով իր աղբյուրներին, գրել է, թե Վլադիմիր Պուտինն այս պահին հրաժարվել է բանակցություններից և նպատակ ունի հնարավորինս շատ տարածք գրավել Ուկրաինայում։ Վաշինգտոնն էլ, թեև նախապատրաստել է պատժամիջոցներ Ալինա Կաբաևայի դեմ, դեռ չի հայտարարում դրանց մասին՝ Ռուսաստանի նախագահին է՛լ ավելի չզայրացնելու համար։