Պատերազմ Ուկրաինայում (լայվ բլոգ, թարմացվող)

ԱՄՆ Պետդեպարտամենտը հայտարարել է, որ հավանություն է տվել 165 միլիոն դոլար արժողությամբ նախկին «Վարշավայի պայմանագրի» զինամթերքի և այլ ոչ ստանդարտ սպառազինության վաճառքին Ուկրաինային:

Լեհաստանն էլ տանկեր է ուղարկել Ուկրաինա, հայտարարել է Լեհաստանի վարչապետ Մատեուշ Մորավեցկին՝ չմանրամասնելով։

Ռուսաստանի և Թուրքիայի նախագահներ Վլադիմիր Պուտինն ու Ռեջեփ Էրդողանը այսօր հեռախոսազրույց են ունեցել՝ քննարկելով Ուկրաինան։ Այս մասին հայտնել է Ռուսաստանի նախագահի մամուլի խոսնակը։

«Անադոլու» գործակալության փոխանցմամբ՝ Էրդողանը վերահաստատել է Անկարայի պատրաստակամությունը՝ օժանդակելու Ռուսաստանի և Ուկրաինայի միջև կայուն խաղաղության հաստատմանը։ Նա նշել է, որ պետք է պահպանել ու շարունակել ստամբուլյան հանդիպման դրական լիցքերը և կրկին առաջարկել է, որ Ռուսաստանի և Ուկրաինայի նախագահները հանդիպեն Ստամբուլում։ Էրդողանը նաև շեշտել է Ուկրաինայում հումանիտար միջանցքներով մարդկանց ապահով տարհանելու կարևորությունը։

Միացյալ Նահանգների պաշտպանության նախարար Լլոյդ Օսթինը Գերմանիայի Ռամշտեյն ավիաբազայում ավելի քան չորս տասնյակ երկրների պաշտպանական բնագավառի ներկայացուցիչների հետ բանակցություններ է վարում Ուկրաինային ռազմական օգնությունը շարունակելու հարցով։

Օսթինը համոզմունք է հայտնել, որ Ուկրաինան կարող է հաղթել Ռուսաստանի սկսած պատերազմում։ «Ուկրաինան հստակ հավատում է, որ կարող է հաղթել պատերազմում, ինչպես և այստեղ գտնվող յուրաքանչյուրը»,- ասել է նա։

Ուկրաինայի Զապորոժիեի մարզային իշխանությունները տեսանյութ են հրապարակել՝ ցուցադրելով, թե ինչպես են ամրացնում քաղաքի պաշտպանությունը, խրամատներ փորում՝ ռուսական զորքերի հնարավոր հարձակմանը դիմակայելու նպատակով։

«Մենք ամրություններ ենք կառուցում, որոնք կփրկեն մեր զինվորների կյանքը և կօգնեն նրանց արդյունավետ պաշտպանել քաղաքը», - ասել է Զապորոժիեի շրջանի ղեկավար Ալեքսանդր Ստարուխը։

Զապորոժիեի վերջին հրթիռակոծման հետևանքով առնվազն մեկ մարդ է զոհվել, ևս մեկը վիրավորվել է։ Մարզի վարչակազմը այսօր հայտնել է, որ երկու հրթիռ է ընկել առևտրային տարածքում, երրորդ հրթիռը մինչ թիրախին հասնելը պայթել է օդում։

ՄԱԿ-ի գլխավոր քարտուղար Անտոնիո Գուտերեշը Մոսկվայում այսօր հանդիպել է Ռուսաստանի արտգործնախարար Սերգեյ Լավրովին։

Բանակցություններին հաջորդած մամուլի համատեղ ասուլիսում Գուտերեշն ասել է, որ ՄԱԿ-ը պատրաստ է իր ամբողջ ջանքերն ուղղել Մարիուպոլում մնացած մարդկանց կյանքը փրկելու համար։ Նա ասել է, որ Կարմիր Խաչի հետ միասին պատրաստ են հումանիտար միջանցք ապահովել «Ազովստալի» տարածքից մարդկանց տարհանելու համար։ ՄԱԿ-ի գլխավոր քարտուղարը նաև կոչ է արել անկախ հետաքննություն անցկացնել՝ ուսումնասիրելու Ուկրաինայում պատերազմական հանցագործությունների մասին հաղորդագրությունները։

Ռուսաստանի արտգործնախարար Սերգեյ Լավրովը Ուկրաինային մեղադրել է բանակցություններին «անբարեխիղճ» մասնակցելու մեջ, իսկ Արևմուտքին մեղադրել է Ուկրաինային զինելու համար՝ ռազմաճակատում գերազանցության հասնելու նպատակով։

ՄԱԿ-ի Փախստականների հարցերով գերագույն հանձնակատարի գրասենյակի փորձագետները նախազգուշացնում են, որ Ուկրաինայից փախստականների թիվն այս տարվա ընթացքում էապես կավելանա և, ըստ հաշվարկների, կհասնի 8 միլիոն 300 հազարի:

«Գնահատելով Ուկրաինայում ստեղծված կացությունը, ՄԱԿ-ի փախստականների հարցերով գերագույն հանձնակատարի գրասենյակը և գործընկեր կազմակերպությունները երեկ որոշել են հարևան երկրներում, կոնկրետ՝ Հունգարիայում, Մոլդովայում, Լեհաստանում, Ռումինիայում և Սլովակիայում, ինչպես նաև տարածաշրջանի մյուս պետություններում, այդ թվում՝ Բելառուսում, Բուլղարիայում և Չեխիայում ակնկալվող 8 միլիոն 300 հազար փախստականներին օգնելու համար հայթայթել 1 միլիարդ 850 միլիոն դոլար», - ասել է ՄԱԿ-ի փախստականների հարցերով գերագույն հանձնակատարի գրասենյակի ներկայացուցիչ Շաբիա Մանտուն:

Փետրվարի 24-ին սկսված պատերազմի հետևանքով Ուկրաինայում ավելի քան 12 միլիոն 700 հազար բնակիչներ լքել են տները: Նրանցից 7 միլիոն 700 հազարը ներքին տեդահանվածների կարգավիճակում է, իսկ ավելի քան 5 միլիոնն ապաստանել է արտասահմանում:

Ռուսական «Գազպրոմ»-ը Լեհաստանին և Բուլղարիային ծանուցել է, որ այսօրվանից դադարեցնում է բնական գազի մատակարարումը։

Ռուսաստանի նախագահ Վլադիմիր Պուտինը պահանջել է, որ այն երկրները, որոնց Ռուսաստանը համարում է ոչ-բարեկամական, համաձայնեն սխեմային, որը պահանջում է «Գազպրոմբանկ»-ում բացել հաշիվներ և վճարումներ կատարել ռուսական գազի ներկրման համար եվրոյով կամ դոլարով, որն այնուհետև կվերածվի ռուբլու:

Լեհաստանը բազմիցս հայտարարել է, որ չի կատարելու Ռուսաստանի պահանջները վճարումների նոր սխեմայի վերաբերյալ:

Բուլղարիան հայտարարել է, որ քայլեր է ձեռնարկում գազի այլընտրանքային աղբյուրներ գտնելու համար, և այս պահին սպառողների համար սահմանափակումներ չեն նախատեսվում։

Ռուսաստանում Նիդերլանդների հյուպատոսությունը հայտարարել է, որ ապրիլի 27-ից դադարեցնում է կարճաժամկետ վիզաների տրամադրումը, այդ թվում՝ տուրիստական։ Այս որոշման պատճառ է դարձել դիվանագիտական անձնակազմի կրճատումը։

Ապրիլի 19-ին Ռուսաստանի արտգործնախարարությունը հայտարարեց 15 հոլանդացի դիվանագետների արտաքսման մասին։ Սա պատասխան էր Նիդերլանդների կողմից ձեռնարկված նմանատիպ միջոցառումներին, երբ մարտի վերջին ՌԴ դիվանագիտական առաքելության 17 աշխատակիցներ հռչակվեցին անցանկալի անձինք (persona non grata)։

Գիշերը մի շարք պայթյուններ են տեղի ունեցել Ռուսաստանի Բելգորոդի մարզում, որոնց հաջորդել է հրդեհ Ստարայա Նելիդովկա գյուղի մոտ գտնվող զինամթերքի պահեստում։ Հրդեհն արդեն մարվել է, տուժածներ չկան:

Մոտավորապես նույն ժամանակ պայթյուններ են հնչել Կուրսկի մարզում, նահանգապետը հաղորդել է, որ գործել է հակաօդային պաշտպանության համակարգը (ՀՕՊ)։ Նրա խոսքով՝ զոհեր և ավերածություններ չկան։

Վորոնեժի շրջանի իշխանություններն էլ հայտնել են, որ ՀՕՊ համակարգը Վորոնեժի մոտ խոցել է «փոքր չափի հետախուզական անօդաչու թռչող սարք»։

Ուկրաինա ռուսական ներխուժման սկզբից ի վեր Ռուսաստանի սահմանամերձ շրջանների իշխանությունները պարբերաբար հաղորդում են հրետակոծությունների մասին և մեղադրում Կիևին:

Ռուս զինվորականները նախազգուշացրել են, որ կարող են հարվածել ուկրաինական «որոշում ընդունող կենտրոններին» Կիևում՝ վստահեցնելով, թե իրենց չի խանգարի այնտեղ արևմտյան խորհրդականների հնարավոր ներկայությունը։

Ռուսաստանի պաշտպանության նախարարությունը մեղադրել է Մեծ Բրիտանիային հայտարարություններ անելու մեջ, որոնք խրախուսում են Ուկրաինային օգտագործել արևմտյան զենքը ռուսական տարածքին հարվածներ հասցնելու համար, և նախազգուշացրել է, որ եթե դա տեղի ունենա, ռուս զինվորականները կարող են թիրախավորել կառավարական կառույցները Կիևում։

Մինչ այժմ ռուս զինվորականները խուսափում էին հարվածներ հասցնել Կիևում կառավարական և ռազմական գերատեսչությունների շենքերին: