Պատերազմ Ուկրաինայում (լայվ բլոգ, թարմացվող)

Ամերիկայի Միացյալ Նահանգների պետական քարտուղար Էնթոնի Բլինքենը Վաշինգտոնում ընդունել է Չեխիայի Հանրապետության արտաքին գործերի նախարար Յան Լիպավսկուն:

Հանդիպման մեկնարկին Բլինքենը գովեստով է խոսել Ուկրաինային սատարելու Չեխիայի դիրքորոշման մասին:

«Միացյալ Նահանգները և Չեխիան վաղեմի բարեկամներ են, հզոր դաշնակիցներ և գործընկերներ, որոնք համագործակցում են շատ բնագավառներում: Մեր դաշինքի ամրությունն ապացուցվում է այս օրերին, երբ Ուկրաինան ենթարկվում է Ռուսաստանի ագրեսիային: Չեխիան Ուկրաինայի ամենաակտիվ աջակիցներից է և ապաստան է տվել ավելի քան 300 հազար ուկրաինացի փախստականների»,- ասել է Բլինքենը:

Ռուսաստանի Հաշվիչ պալատի նախագահ Ալեքսեյ Կուդրինի փոխանցմամբ՝ առաջիկա մեկուկես-երկու տարիների ընթացքում Դաշնությունը շատ բարդ վիճակում կլինի: Այդ մասին Կուդրինն ասել է այսօր Սանկտ Պետերբուրգում գումարված Օրենսդիրների խորհրդի նիստում:

Նրա փոխանցմամբ, սղաճը 2022 թվականին կկազմի ավելի քան 20 տոկոս, իսկ 2023-ին՝ ավելի քան 6 տոկոս:

Արևմտյան պատժամիջոցների պայմաններում տնտեսությանը սատարելու համար արդեն այս տարվա ընթացքում կպահանջվի ավելի քան 6 տրիլիոն ռուբլի: Տնտեսական անկումը կհասնի գրեթե 9 տոկոսի:

Ռուսաստանն անձնական սանկցիաներ է սահմանում Մեծ Բրիտանիայի խորհրդարանի Համայնքների պալատի 287 պատգամավորների նկատմամբ: Այդ մասին այսօր հայտնել է Ռուսաստանի արտաքին գործերի նախարարությունը:

«Ի պատասխան Ռուսաստանի Պետական դումայի 386 պատգամավորների նկատմամբ պատժամիջոցներ սահմանելու Մեծ Բրիտանիայի կառավարության 2022 թվականի մարտի 11-ի որոշման, փոխադարձության սկզբունքով սահմանվում են անձնական պատժամիջոցներ բրիտանական խորհրդարանի Համայնքների պալատի 287 անդամների վերաբերյալ»,- ասվում է ՌԴ ԱԳՆ-ի հաղորդագրությունում:

Եվրոպական խորհրդարանը Եվրոպական միությանը հորդորում է հրաժարվել ռուսական էներգակիրներից:

«Եվրախորհրդարանը Եվրոպական միության պետություններին կոչ է անում անհապաղ էմբարգո սահմանել Կրեմլի կողմից վերահսկվող էներգակիրների մատակարարման վրա: Եկել է բռնապետերից մեր կախվածությանը մեկընդմիշտ վերջ տալու ժամանակը», - Թվիթերում գրել է Եվրոպական խորհրդարանի նախագահ Ռոբերտա Մեցոլան:

Նա աջակցություն է խոստացել Բուլղարիային և Լեհաստանին այն բանից հետո, երբ «Գազպրոմը» դադարեցրել է գազ մղել ռուբլով վճարելու պահանջը մերժող այդ երկու երկրներ:

Ռուսաստանի Դաշնության նախագահ Վլադիմիր Պուտինը հայտարարել է, որ եթե դրսից որևէ մեկը միջամտի Ուկրաինայի իրավիճակին, և դա Ռուսաստանի համար ստեղծի անընդունելի սպառնալիքներ, ապա Ռուսաստանն ի զորու է կայծակնային հարվածներ հասցնել: Այդ մասին Պուտինն ասել է Սանկտ Պետերբուրգում Օրենսդիրների խորհրդի նիստում:

«Եթե որևէ մեկը մտադրվի միջամտել տեղի ունեցող իրադարձություններին և ստեղծի Ռուսաստանի համար անընդունելի ռազմավարական սպառնալիքներ, ապա պետք է իմանա, որ մեր պատասխանները հանդիպակած հարվածներիին կայծակնային կլինեն»,- ասել է Պուտինը:

Ֆինլանդիան մտադիր չէ կատարել Ռուսաստանի ներկայացրած պահանջը և ռուբլով վճարել գազի համար: Այդ մասին հայտարարել է Եվրոպայի և սեփականության կառավարման հարցերով Ֆինլանդիայի նախարար Տիուտտի Տուպուրայնենը:

Նրա փոխանցմամբ, դա լիովին համապատասխանում է Եվրոպական հանձնաժողովի դիրքորոշմանը, ըստ որի՝ ռուբլով վճարելու պահանջը չի կատարվի, քանի որ դրանով կխախտվի Ռուսաստանից գազ ներկրելու գործող պայմանագիրը:

Նախարարն ասել է, որ կառավարության դիրքորոշումը փոխանցվել է գազի ներկրումն ու բաշխումն իրականացնող Gasum պետական ընկերությանը:

"Медуза" լրատվական կայքի փոխանցմամբ` Դոնեցկի, Լուգանսկի և Խերսոնի շրջաններում, որոնք հիմա գտնվում են ռուսական բանակի հսկողության տակ, մայիսի կեսերին կարող են անցկացվել «հանրաքվեներ» Ռուսաստանին միանալու հարցով: Այդ մասին "Медуза"-ին հայտնել է Կրեմլի վարչակազմին մոտ կանգնած մի անանուն աղբյուր:

Դոնեցկի և Լուգանսկի շրջանների մաս կազմող մի շարք քաղաքներ՝ Սլավյանսկը, Կրամատորսկը և Լիսիչանսկը, տակավին գտնվում են Ուկրաինայի հսկողության ներքո:

Խերսոնի շրջանում հանրաքվեի կարող է ներկայացվել նաև Ուկրաինայից անկախ «Խերսոնի ժողովրդական հանրապետություն» հռչակելու հարցը:

Ըստ անանուն աղբյուրի՝ դա կարող է տեղի ունենալ մայիսի 14-15-ը: "Медуза"-ն նշում է, որ եթե ռուսական բանակը ռազմաճակատում անհաջողություններ կրի, այդ «հանրաքվեների» ժամկետները կարող են հետաձգվել:

Ֆրանսիայի իշխանությունները կալանքի որոշում են կայացրել Լազուրի ափին գտնվող՝ ենթադրաբար ռուսաստանցի մեծահարուստներին պատկանող երեք շքեղ առանձնատների նկատմամբ: Այս մասին հայտնել է BFM ֆրանսիական հեռուստակայանը:

Հաղորդագրության համաձայն՝ խոսքը Սեն-Տրոպե, Բիարից և Սեն-Ժան-Կապ-Ֆերրա ավաններում երեք շքեղ վիլլաների մասին է, որոնք պատկանում են, համապատասխանաբար, Օլեգ Դերիպասկային, Կիրիլ Շամալովին և Մուսա Բաժաևին:

Շամալովը համարվում է Ռուսաստանի ամենաերիտասարդ մեծահարուստներից մեկը, նա ենթադրաբար նախագահ Վլադիմիր Պուտինի դստեր՝ Եկատերինա Տիխոնովայի նախկին ամուսինն է:

BFM հեռուստակայանի փոխանցմամբ՝ Ռուսաստանի նկատմամբ Եվրամիության սահմանած պատժամիջոցների կապակցությամբ, այսօրվա դրությամբ, Ֆրանսիայում կալանք է դրվել ենթադրաբար ռուս օլիգարխներին պատկանող 4 զբոսանավերի, 6 ուղղաթիռների և մոտ տասնյակ առանձնատների վրա:

Միացյալ Նահանգների Կոնգրեսի Ներկայացուցիչների պալատը հավանություն է տվել մի օրինագծի, որով նախատեսվում է բռնագրավել պատժամիջոցների տակ գտնվող ռուսական որոշ գույք՝ այն վաճառելու և Ուկրաինային լրացուցիչ օգնություն ցուցաբերելու համար։

Նախագիծը պաշտպանել են 417 կոնգրեսականներ, դեմ են քվեարկել 8-ը:

Ըստ այդ նախաձեռնության՝ ԱՄՆ նախագահը պետք է «ձեռնարկի Սահմանադրությամբ նախատեսված բոլոր քայլերը՝ կալանքի տակ առնելու և բռնագանձելու ԱՄՆ-ի իրավասության տակ գտնվող օտարերկրացիների ակտիվները, որոնց միջոցները մասամբ ձեռք են բերվել կոռուպցիայի միջոցով»:

Օրինագիծը վերաբերում է նաև այն ակտիվներին, որոնք սեփականատերերը ձեռք են բերել Ռուսաստանի Դաշնության ղեկավարներին աջակցություն տրամադրելու շնորհիվ:

Փաստաթղթի համաձայն՝ ԱՄՆ-ը պետք է ստեղծի միջգերատեսչական խումբ՝ պետքարտուղարի գլխավորությամբ, որը կորոշի փաստաթուղթը կյանքի կոչելու սահմանադրական մեխանիզմները։

Ռուսաստանն ուժեղացնում է հարձակողական գործողության տեմպերը Ուկրաինայում։ Այս մասին հայտարարել է Ուկրաինայի պաշտպանության նախարարության ներկայացուցիչը։

Նրա խոսքով՝ ռուսական զորքերն ինտենսիվ կրակում են գրեթե բոլոր ուղղություններով։ Հատկապես ակտիվ ռազմական գործողություններ են ընթանում Խարկովի և Դոնեցկի շրջաններում։

Ըստ Ուկրաինայի ռազմական գերատեսչության՝ ռուսական զորքերի գլխավոր նպատակը մնում է Դոնեցկի և Լուգանսկի շրջանների նկատմամբ լիակատար վերահսկողության հաստատումը։