Պատերազմ Ուկրաինայում (լայվ բլոգ, թարմացվող)

Ամերիկայի Միացյալ Նահանգների նախագահ Ջո Բայդենն ասել է, որ Վաշինգտոնը թույլ չի տա ռուսներին էներգակիրների հարցն օգտագործել սահմանված պատժամիջոցներից խուսափելու նպատակով:

Այդ մասին Բայդենը հայտարարել է Սպիտակ տանը Ուկրաինայի հարցին նվիրված ելույթում: Նա մեկնաբանել է, մասնավորապես, Բուլղարիա և Լեհաստան գազի մատակարարումը դադարեցնելու Մոսկվայի որոշումը:

«Նման գործողություններն ապացուցում են, որ էներգակիրները ոչ միայն հումք են, ապրանք, որը Ռուսաստանը վաճառում է ուրիշներին, այլև զենք, որը Մոսկվան կիրառում է իր ագրեսիային ընդդիմացողների նկատմամբ: Ես հստակ փաստում եմ՝ մենք թույլ չենք տա Ռուսաստանին նավթն ու գազն օգտագործել իր ագրեսիայի հետևանքներից խուսափելու համար: Մենք աշխատում ենք այլ երկրների՝ Հարավային Կորեայի, Ճապոնիայի, Քաթարի և մյուսների հետ, որ էներգետիկ պահանջարկի հարցում օգնենք Ռուսաստանի կողմից շանտաժի ենթարկվող մեր եվրոպացի գործընկերներին»,- ասել է Միացյալ Նահանգների նախագահ Ջո Բայդենը:

• Միացյալ Նահանգների նախագահ Ջո Բայդենը Սպիտակ տանը խոսել է Ուկրաինայի պատերազմի մասին: Նա հայտնել է, որ Կոնգրես է ուղարկում Ուկրաինային սատարելու համար ևս 33 միլիարդ դոլար հատկացնելու հայտ:

  Բայդենի խոսքով, Ռուսաստանն ագրեսոր է, որին հարկ է կանգնեցնել, նույնիսկ եթե դա կպահանջի մեծ գումարներ և մեծ ջանքեր:

  «Եթե թույլ տալ Վլադիմիր Պուտինին հաղթել Ուկրաինայում, դա միայն կմեծացնի ագրեսորի ախորժակը»,- ասել է նախագահ Բայդենը:

  Նա վերստին ընդգծել է, որ Միացյալ Նահանգները զորք չի գործուղի Ուկրաինա, սակայն կշարունակի աջակցել ագրեսիայի ենթարկված երկրին:

  Միացյալ Նահանգները և դաշնակիցները կմեծացնեն ծանր զինատեսակների տրամադրումը և Կիևին կփոխանցեն նաև հրետանի ու տանկեր:

  Բայդենի փոխանցմամբ, Պուտինը զգում է, որ նպատակին չի հասնում Ուկրաինայում, և սկսում է սպառնալիքներ հնչեցնել, այդ թվում՝ ակնարկել միջուկային զենքի մասին:

  ԱՄՆ նախագահն ասել է, որ Պուտինի սպառնալիքներն իրեն չեն մտահոգում, իսկ միջուկային հռետորաբանությունը որակել է որպես «անպատասխանատվություն»:

  Ջո Բայդենը հայտարարել է, որ Միացյալ Նահանգները պատրաստ է հակազդել Ռուսաստանի ցանկացած տեսակի գործողություններին:

Մարիուպոլից խաղաղ բնակչության տարհանումը ՄԱԿ-ի գլխավոր քարտուղար Անտոնիո Գուտերեշի երեկ Ուկրաինա կատարած այցի հիմնական թեմաներից մեկն էր։

Ուկրաինայի նախագահ Վլադիմիր Զելենսկու հետ Կիևում կայացած մամուլի ասուլիսում Գուտերեշն ասել է, որ անում է հնարավոր ամեն ինչ, որպեսզի ռուսական զորքերի կողմից պաշարված Մարիուպոլի «Ազովստալ» գործարանից տարհանումն իրականություն դառնա։

ԱՄՆ Կոնգրեսի Ներկայացուցիչների պալատը երեկ, ձայների ճնշող մեծամասնությամբ, հավանություն է տվել Lend-Lease օրինագծին, որը կոչված է զգալիորեն պարզեցնելու Ուկրաինային ԱՄՆ-ից զենք մատակարարելու ընթացակարգը։

Փաստաթղթին կողմ է արտահայտվել Կոնգրեսի 417 անդամ՝ երկու կուսակցություններից, մինչդեռ դեմ են արտահայտվել միայն 10-ը։ Այժմ այն պետք է ստորագրի նախագահ Ջո Բայդենը։

Ադրբեջանի արտաքին գործերի նախարարության հաղորդագրության համաձայն, Ուկրաինայում ադրբեջանական դեսպանությունը մեկուկես ամիս տևած դադարից հետո վերադարձել է Կիև:

Հաշվի առնելով Ուկրաինայի մայրաքաղաքում պատերազմի բերումով ստեղծված բարդ իրավիճակը՝ Ադրբեջանի դեսպանության աշխատակիցները մարտի 8-ին տեղափոխվել էին Լվով:

Կիևում նախօրեին տեղի ունեցած հրթիռակոծության հետևանքով սպանվել է «Ազատություն» ռադիոկայանի ուկրաինական ծառայության թղթակից Վերա Գիրիչը։

Ուկրաինական մայրաքաղաքի վրա հրթիռային հարված է հասցվել ՄԱԿ-ի գլխավոր քարտուղար Անտոնիու Գուտերեշի Կիևում գտնվելու ժամանակ։

Քաղաքային իշխանությունները հայտնել են, որ հրթիռների թիրախում են հայտնվել ինչպես ռազմական կառույցներ, այնպես էլ բնակելի շենք։

Գիրիչի մարմինը գտնվել է բնակելի շենքի փլատակներում։ Վերա Գիրիչը «Ազատության» կիևյան բյուրոյում աշխատում է 2018 թվականից, մինչ այդ աշխատել է ուկրաինական առաջատար հեռուստաընկերություններում։

Կիևի քաղաքապետ Վիտալի Կլիչկոն այսօր այցելել է նախօրեին ռուսների կողմի հրթիռակոծված թաղամաս: Նա ասել է, որ մայրաքաղաքը դեռ ռուսների համար թիրախ է մնում և կարող է ենթարկվել նոր գրոհների:

«Կիևը վտանգավոր տեղ է և ռուսների թիրախն է: Նրանք ուզում են զավթել մայրաքաղաքը, դա է նրանց նպատակը: Բայց նրանք շանս չունեն, որովհետև ուկրաինական ուժերը, Ուկրաինայի բանակը խափանում են ռուսների այս ծրագրերը: Սակայն հիմա կա գրոհների վտանգ, և իմ խնդիրը մարդկանց կյանքը փրկելն է: Մենք չենք կարող վստահ երաշխավորել, թե առաջիկա րոպեներին, ժամերին կամ օրերին նոր հարվածների չենք ենթարկվի»,- ասել է Վիտալի Կլիչկոն:

Ֆրանսիան սպասում է Ռուսաստանի նկատմամբ Եվրամիության սահմանած պատժամիջոցների վերցերորդ փաթեթի հաստատմանը: Այդ մասին ասել է Ֆրանսիայի արտաքին գերատեչության պաշտոնական ներկայացուցիչ Անն-Կլեր Լեժանդրը:

«Ռուսաստանի վրա ճնշումը կշարունակվի ոչ միայն Ուկրաինային նոր զինատեսակներ տրամադրելու, այլև նոր սանկցիաներ ընդունելու եղանակով: Մենք կշարունակենք ճնշում բանեցնել»,- ասել է Լեժանդրը:

Ռուսաստանի պաշտպանության նախարարությունը հաղորդում է, որ անցած գիշերը գերճշգրիտ հրթիռային հարվածներ են հասցրել Ուկրաինայի զինված ուժերի ռազմական 5 օբյեկտների, այդ թվում՝ վառելիքի և զինամթերքի 4 պահեստներ։ Այս մասին ամենօրյա տեղեկատվական հաղորդագրությունում ասել է Ռուսաստանի պաշտպանության նախարարության խոսնակ, գեներալ Իգոր Կոնաշենկովը։

Հրթիռակոծման ենթարկված նրա նշած պահեստներից երկուսը գտնվում են Դոնեցկի մարզում, մեկը՝ Դնեպրոպետրովսկի, իսկ չորրորդը՝ Խարկովի մարզում։

Դոնեցկի արվարձանում գտնվող առևտրային շուկայում պայթյունների հետևանքով առնվազն 4 մարդ է զոհվել։ Այդ մասին հայտնում են տեղի իշխանությունները։

Երեք պայթյունները որոտացել են Տեքստիլշչիկ շրջանի երկու շուկաներում, կեսօրի սահմաներում: Ոստիկանության քրեական ծառայության աշխատակիցների հետ տեղում աշխատում են նաև պայթուցիկ նյութերի մասնագետներ՝ պարզելու, թե ինչ զենքով է կատարվել հարձակումը։