Պատերազմ Ուկրաինայում (լայվ բլոգ, թարմացվող)

Այսօր հեռախոսազրույց են ունեցել Ֆրանսիայի նախագահ Էմանյուել Մակրոնն ու Ռուսաստանի նախագահ Վլադիմիր Պուտինը: Ելիսեյան պալատի հաղորդագրության համաձայն՝ Մակրոնը պատրաստակամություն է հայտնել աշխատել միջազգային կազմակերպությունների հետ` օգնելու վերացնել Ռուսաստանի էմբարգոն ուկրաինական պարենային ապրանքները Սև ծովով արտահանելու համար։

Մակրոնը, ով բազմիցս հայտարարել է Ուկրաինայում կրակը դադարեցնելու անհրաժեշտության մասին, Պուտինին ասել է, որ խորապես մտահոգված է Դոնբասի և Մարիուպոլի իրավիճակով։

Կրեմլի մամուլի ծառայության փոխանցմամբ` Վլադիմիր Պուտինն ասել է, որ Եվրամիության երկրները անտեսում են ուկրաինական ուժերի ռազմական հանցագործությունները, Դոնբասի քաղաքների ու բնակավայրերի զանգվածային հրետակոծությունները, որի հետևանքով խաղաղ բնակիչներ են զոհվում։ Պուտինը ասել է, որ «Արևմուտքը կարող է նպաստել այդ չարագործությունների դադարեցմանը՝ ազդելով Կիևի իշխանությունների վրա, ինչպես նաև դադարեցնելով զենքի մատակարարումը Ուկրաինա»։

Պուտինը նաև ասել է, որ Ռուսաստանը պատրաստ է շարունակել երկխոսությունը Կիևի հետ։

Հռոմի Ֆրանցիսկոս պապը Coriera della Sera իտալական օրաթերթին տված հարցազրույցում ասել է, թե վերջերս տեսակապով զրուցել է Մոսկվայի և Համայն Ռուսիո պատրիարք Կիրիլի հետ:

Պապի փոխանցմամբ՝ Պատրիարքը 20 րոպե շարունակ, թղթի վրա տպված տեքստ կարդալով, փորձել է արդարացնել Ուկրաինայի դեմ Ռուսաստանի պատերազմը:

Հարցազրույցում Հռոմի պապը պատմել է պատերազմի ավարտին ուղղված իր ապարդյուն ջանքերի մասին:

Ֆրանցիսկոսն իտալական պարբերականին նաև ասել է, թե իր համոզմամբ՝ Պատրիարք Կիրիլը դժվար թե ի զորու լինի օգնել պատերազմը կանգնեցնելու հարցում:

Պապը կարծիք է հայտնել, թե «Պատրիարքը չպետք է վերածվի Պուտինի տիրացուի»:

Ֆրանցիսկոս պապը նաև ասել է, թե Հունգարիայի վարչապետ Վիկտոր Օրբանից տեղեկացել է, որ Պուտինն, իբր, ցանկանում է ինչ-որ արդյունք ապահովել և այս պատերազմն ավարտել մինչև մայիսի 9-ը:

Ավստրալիայի կառավարությունը պատժամիջոցներ է սահմանել Ռուսաստանի Պետդումայի պատգամավորների, Դոնեցկի և Լուգանսկի չճանաչված հանրապետությունների պաշտոնյաների, ինչպես նաև ռուս լրագրող և հեռուստահաղորդավար Վլադիմիր Սոլովյովի նկատմամբ։

Ավստրալիայի ներքին գործերի նախարարության այսօր տարածած հաղորդագրությունում նշվում է, որ պատժամիջոցները վերաբերում են Պետդումայի 75 պատգամավորների, Դոնեցկի 20 և Լուգանսկի 12 նախարարների։

Երեկ հեռախոսազրույց է կայացել Միացյալ Նահանգների պետքարտուղար Էնթոնի Բլինքենի և Մեծ Բրիտանիայի արտաքին գործերի նախարար Էլիզաբեթ Թրասի միջև, նրանք քննարկել են Ուկրաինային լրացուցիչ ռազմական օգնություն տրամադրելու հարցը։

ԱՄՆ Պետդեպարտամենտի խոսնակ Նեդ Փրայսի փոխանցմամբ՝ դիվանագիտական գերատեսչությունների ղեկավարները «քննարկել են Ուկրաինային հավելյալ հումանիտար ու ռազմական օգնությունն ու տրանսատլանտյան միասնության պահպանումը»։

Բլինքենը և Թրասը խոսել են նաև «տնտեսական հետևանքների մասին նրանց համար, ովքեր շարունակում են ֆինանսական և նյութական աջակցություն ցուցաբերել» Ուկրաինայում ռուսական ռազմական ներխուժմանը։

Եվրամիությունն ընդունել է Ռուսաստանի դեմ պատժամիջոցների վեցերորդ փաթեթը, դաշինքի գործադիր մարմնի ղեկավարի խոսքով՝ ԵՄ-ը մինչև տարեվերջ ամբողջությամբ կսահմանափակի ռուսական նավթի և նավթամթերքի ներմուծումը։

«Մենք վեց ամսվա ընթացքում աստիճանաբար կդադարեցնենք ռուսական հում նավթի մատակարարումները, իսկ մինչև տարեվերջ՝ նավթամթերքի», - ելույթ ունենալով Եվրախորհրդարանում՝ հայտարարել է Եվրահանձնաժողովի նախագահ Ուրսուլա ֆոն դեր Լայենը:

Եվրամիության բարձրաստիճան պաշտոնյան հնարավոր բացառությունների մասին չի խոսել, մինչ այդ Հունգարիան և Սլովակիան, որոնք մեծապես կախված են ռուսական էներգակիրներից, ավելի վաղ հայտարարել էին, որ դեմ են արգելքին:

Մոսկվան սպառնում է ոչնչացնել Ուկրաինայի համար սպառազինություն տեղափոխող ՆԱՏՕ-ի տրանսպորտային միջոցները։

«Միացյալ Նահանգները և ՆԱՏՕ-ի նրա դաշնակիցները շարունակում են զենք լցնել Ուկրաինա: Նշեմ, որ Հյուսիսատլանտյան դաշինքի ցանկացած տրանսպորտ, որը երկրի տարածք է ժամանել Ուկրաինայի զինված ուժերի կարիքների համար նախատեսված զենքով կամ նյութական միջոցներով, մեր կողմից համարվում է ոչնչացման օրինական թիրախ», - հայտարարել է ՌԴ պաշտպանության նախարար Սերգեյ Շոյգուն։

Հաղթանակի օրը Ռուսաստանում համընդհանուր մոբիլիզացիա հայտարարելու ծրագրերի մասին հրապարակումներին չպետք է հավատալ, դա անհեթեթություն է և սուտ։ Այս մասին լրագրողներին ասել է Ռուսաստանի նախագահի խոսնակ Դմիտրի Պեսկովը։

Արևմտյան մի շարք աղբյուրներ՝ այդ թվում CNN-ը, վկայակոչելով ամերիկացի և եվրոպացի պաշտոնյաներին, հայտնել են, թե Ռուսաստանի նախագահը կարող է մայիսի 9-ին պաշտոնապես պատերազմ և պահեստազորի մոբիլիզացիա հայտարարել։ Հավելյալ ուժերն, ըստ նույն աղբյուրների, անհրաժեշտ են Ուկրաինայի արևելյան և հարավային տարածքները գրավելու համար։

Ռուսական իշխանությունները հետախուզում են հայտարարել երկրի հայտնի հեռուստալրագրողներից մեկի՝ Կրեմլի կոշտ քննադատ Ալեքսանդր Նևզորովի նկատմամբ։

Նևզորովի անունը Ներքին գործերի նախարարության կողմից հետախուզվող անձանց ցանկում է հայտնվել չորեքշաբթի օրը, գերատեսչության տվյալներով՝ նախկին պատգամավորը, որը ներկայումս Ռուսաստանում չէ, կասկածվում է «Ռուսաստանի զինված ուժերի մասին կեղծ տեղեկություններ տարածելու մեջ»:

Ռուսաստանյան նոր օրենքը, որը Պուտինը ստորագրել է Ուկրաինայում պատերազմի մեկնարկի ֆոնին, երկարաժամկետ՝ ընդհուպ մինչև 10 տարվա ազատազրկում է նախատեսում ռուսական ռազմական գործողությունների մասին «կանխամտածված կեղծ տեղեկություններ» տարածելու համար։

Ռուսաստանի արտաքին գերատեսչության մամլո վարչության ղեկավար Մարիա Զախարովան ասել է, թե անդամակցելով ՆԱՏՕ-ին՝ Ֆինլանդիան և Շվեդիան կհայտնվեն Ռուսաստանի հետ առճակատման գոտում:

«Անդամակցությունից կբխեն համապատասխան հետևանքներ, այդ թվում՝ ժամանակի փորձությանը դիմացած մեր բարիդրացիական հարաբերությունների համար: Արդյո՞ք դրան են ձգտում Շվեդիայի և Ֆինլանդիայի ժողովուրդները», - նշել է Զախարովան:

«Մենք նախազգուշացնում ենք Հյուսիսային Եվրոպայից մեր հարևաններին, որ ՆԱՏՕ-ի ուղեծիր ներքաշվելու փաստը կարող է քայքայել եվրոպական անվտանգության համակարգը, ընդ որում՝ դա վերջին շաբաթների միտում չէ, դա բավական վաղուց է սկսվել և պարբերաբար է արվում», - հայտարարել է ՌԴ ԱԳՆ խոսնակը։

Ուկրաինական լրատվամիջոցները գիշերը հաղորդեցին, որ երկրի բոլոր քաղաքներում օդային տագնապ է հայտարարվել:

Ուկրաինայի նախագահ Վլադիմիր Զելենսկին երեկ խնդրել է ՄԱԿ-ի գլխավոր քարտուղար Անտոնիու Գուտերեշին օգնել փրկել մարդկանց, ովքեր դեռ չեն կարողանում լքել Մարիուպոլի «Ազովստալ» գործարանի տարածքը։

Ռուսաստանի պաշտպանության նախարարությունը հայտարարել է, որ խաղաղ բնակիչների համար «Ազովստալ»-ից մարդասիրական միջանցքներ կբացի երեք օրով՝ մայիսի 5-ին, 6-ին և 7-ին Մոսկվայի ժամանակով ժամը 8-ից մինչև 18-ը։